Caru Ciphya Mwakuyana na Layizgano la Ciuta

BAIBOLO, Mazgu ghakulembeka gha Ciuta, likutipa cilindizga peneapo likuti: ‘Kwakulingana na layizgano lake, tikulindilira macanya ghaphya na caru ciphya mwenemumo mukukhala urunji.’—2 Petros 3:13.

Kasi “macanya ghaphya” ni vici? Baibolo likukoleraniska kucanya na muwuso. (Milimo 7:49) “Macanya ghaphya” ni boma liphya ilo lizamuwusa caru capasi. Ndiphya cifukwa cakuti lizamunjira m’malo mwa muwuso uwo ulipo sono; ndiposo cizamuŵa cinthu ciphya mu vyakucita vya Ciuta pakufiska vilato vyake. Ni Ufumu uwo Yesu wakatisambizga kuti tiwulomborenge. (Mateyu 6:10) Cifukwa cakuti Ciuta ndiyo wakimika Ufumu uwu ndipo wakukhala kucanya, ukucemeka kuti “Ufumu wa kucanya.”—Mateyu 7:21.

Kasi “Caru Ciphya” ni Vici? Ici kuti cikung’anamura kuti caru ico tikukhalamo cizamwiza cinyake yayi, cifukwa Baibolo likuyowoya makora kuti pa caru capasi pakhalenge ŵanthu kwamuyirayira. “Caru ciphya” cizamuŵa ŵanthu ŵaphya. Cizamuŵa ciphya cifukwa cakuti ŵanthu ŵaheni wose ŵazamuŵa kuti ŵafumamo. (Zintharika 2:21, 22) Pa nyengo iyo, ŵanthu wose awo ŵazamukhalamo ŵazamucindika na kupulikira Mlengi wawo na kucita vinthu mwakuyana na umo iye wakukhumbira. (Salmo 22:27) Ŵanthu ŵamitundu yose sono ŵakucemeka kuti ŵazakasambire ivyo Ciuta wakukhumba na kukhala mwakuyana na vinthu ivi. Kasi imwe mukucita ntheura?

Mu caru ciphya ca Ciuta, waliyose wazamucindika muwuso Wake. Kasi kutemwa Ciuta kukumupangiskani kupulikira malango ghake? (1 Yohane 5:3) Kasi mukulongora kuti mukupulikira malango gha Ciuta pa nyumba pinu, ku nchito panji ku sukulu kwinu? na umo mukucitira vinthu mu umoyo winu?

Mu caru ciphya ici, ŵanthu ŵazamuŵa ŵakukolerana pakusopa Ciuta waunenesko. Kasi mukusopa Mlengi wa kucanya na caru capasi? Kasi kasopero kinu kakumukoleraniskani na ŵasopi ŵanyinu ŵa mu vyaru vyose, mitundu yose, na mafuko ghose?—Salmo 86:9, 10; Yesaya 2:2-4; Zefaniya 3:9.

 [Bokosi pa peji 17]

Ciuta Uyo Wakulayizga Vinthu Ivi

Ni Mlengi uyo wakalenga kucanya na caru capasi. Ni mweneuyo Yesu Khristu wakati ni “Ciuta mweneco [waunenesko] yekha.”—Yohane 17:3.

Ŵanthu ŵanandi ŵakucindika ŵaciuta ŵakupanga ŵekha. Mamiliyoni ghanandi gha ŵanthu ŵakusopa vikozgo. Ŵanji ŵakupeleka ucindami ku mawupu gha ŵanthu, usambazi, panji makhumbiro ghawo. Nanga ni awo ŵakuti ŵakugwiliskira nchito Baibolo ni wose yayi awo ŵakucindika zina la uyo Baibolo likuti ni Ciuta waunenesko.—Duteronome 4:35.

Pakuyowoya za iye mwene, Mlengi wakuti: “Ndine Yehova; ili ndilo zina lane.” (Yesaya 42:5, 8.) Zina ili likusangika nyengo zakukwana 7,000 mu ciyowoyero ico Baibolo likamba kulembekera. Yesu Khristu wakasambizga ŵalondezgi ŵake kuromba kuti: “Ŵadada ŵithu mwa ŵa kucanya, litumbikike zina linu.”—Mateyu 6:9.

Kasi Ciuta waunenesko ni munthu wa mtundu wuli? Iye mwene wakujilongosora kuti ni ‘wa lusungu na ucizi, wakukunthirapo [wakuzizipizga], wakuzara na uwemi na unenesko’ ndiposo kuti wakuleka waka yayi awo ŵakunangira dala malango ghake kwambura kuŵalanga. (Exodus 34:6, 7) Mdauko wa umo Ciuta wacitira na ŵanthu ukupeleka ukaboni wakuti uwu mbunenesko nadi.

Zina na munthu uyo zina ili likwimira vikwenera kutumbikika, panji kutuŵiskika. Pakuŵa Mlengi ndiposo Muwusi wa Cilengiwa Cose, iye ngwakwenelera nadi kuti ise timupulikirenge na kumusopa. Kasi imwe mukumupulikira na kumusopa?

 [Bokosi/Cithuzithuzi pa peji 18]

Kasi ‘Macanya Ghaphya na Caru Ciphya’ Vizamwiziska Masinthiro Wuli?

Caru cizamuzgoka Paradiso Luka 23:43

Caru ico ŵanthu ŵa mitundu Yohane 13:35;

yose, mafuko, na malulimi ghose Civumbuzi 7:9, 10

ŵazamukolerana mu citemwa

Mtende wa pa caru cose, Salmo 37:10, 11;

civikiliro kwa wose Mika 4:3, 4

Nchito yakukhorweska, vyakurya Yesaya 25:6; vinandi 65:17, 21-23

Matenda, citima, nyifwa Yesaya 25:8;

vizamumara Civumbuzi 21:1, 4

Caru cizamuŵa cakukolerana Civumbuzi 15:3, 4

pakusopa Ciuta waunenesko

 [Bokosi pa peji 19]

Kasi Muzamupindura?

Ciuta wangateta yayi!—Tito 1:2.

Yehova wakuti: “Mazgu ghane . . . ntha ghawelerenge waka kwa ine, kweni tighafiske ico nkhuca naco, na kusakata mu ico ndaghatumira.”—Yesaya 55:11.

Yehova wali kwambapo kale kulenga “kucanya kuphya na caru ciphya.” Boma la kucanya liri kwambapo kale kugwira nchito. Malufura gha “caru ciphya” ghali kuŵikika kale.

Pamanyuma pa kuvumbura vinthu viwemi ivyo “kucanya kuphya na caru ciphya” viziskenge ku ŵanthu, buku la Civumbuzi likuyowoya mazgu gha Ciuta iye mweneco, Muwusi wa Cilengiwa Cose. Iye wakuti: “Ehena, vinthu vyose nkhuvizgora viphya.” Ndiposo, wakuti: “Lemba: pakuti mazgu gheneagha ngakugomezgeka na ghakuneneska.”—Civumbuzi 21:1, 5.

Fumbo lakuzirwa ndakuti, Kasi tikupanga masinthiro agho ghakukhumbikwa mwakuti tizakaŵe ŵakwenelera kuzakakhala ŵamoza ŵa “caru ciphya” cakuwusika na “kucanya kuphya”?