Kasi Umoyo Winu Ukuya Nkhu?

• Ŵanthu ŵanandi mbakutangwanika comene na vyakucita vya zuŵa na zuŵa mwakuti ŵakughanaghanirako yayi za uko ŵakuya.

• Baibolo likutimanyiska za vinthu viwemi ivyo vili kunthazi. Likuticenjezgaso za nthimbanizgo yikuru iyo yizamucitika mu mawupu gha ŵanthu pa caru cose capasi. Kuti ise tipindure na ivyo Baibolo likuyowoya na kucheŵa soka, tikwenera kucitapo kanthu mwaluŵiro.

• Pali ŵanthu ŵanyake awo ŵakumanya ivyo Baibolo likuyowoya na kuyezga kuvigwiliskira nchito kweni ŵakuzomerezga vyenjezgo vya mu umoyo kuŵapatuska pa nthowa iyo ŵasankha.

• Kasi muli ŵakukondwa na uko umoyo ukuluta? Peneapo mukupanga pulani ya vinthu ivyo mukukhumba kucita, kasi mukughanaghanira za umo vinthu ivi vingakhwaskira vilato vinu?

[Bokosi/Vithuzithuzi pa peji 9]

Kasi Cakuzirwa Comene kwa Imwe Nchivici?

Pa vinthu ivyo vili pasi apa ni vici ivyo ni vyakuzirwa comene kwa imwe? Vilembani manambara kwambira na ico nchakuzirwa comene mupaka pa ico cili paumaliro.

Vinandi mwa vinthu ivi ni vyakuzirwa mu umoyo, kweni para mungapempheka kuti musankhe, nchivici ico cingaŵa pakwamba? paciŵiri? antheura pera.

․․․ Vyakusanguluska panji maseŵera

․․․ Nchito yane

․․․ Umoyo wane

․․․ Kuŵa wacimwemwe

․․․ Muwoli panji mfumu wane

․․․ Ŵapapi ŵane

․․․ Ŵana ŵane

․․․ Nyumba yiwemi, vyakuvwara viwemi

․․․ Kucita makora cinthu cilicose kuluska waliyose

․․․ Kusopa Ciuta

 [Bokosi pa peji 10, 11]

Kasi Ivyo Mukusankha Vikumulongozgerani Uko Mukukhumba Nadi Kuya?

AGHANAGHANIRANI MAFUMBO AGHA

VYAKUSANGULUSKA PANJI MASEŴERA: Kasi maseŵera agho nkhucita ghakunovwira kuwezgeramo nkhongono zane? Kasi ghakusazgapo kucita vinthu ivyo vingaŵika umoyo wane pangozi panji kunipendezga? Kasi ghakuŵa ghakukondweska kwa maora ghacoko waka na kwiziska citima kwa nyengo yitali? Nangauli vyakusanguluska ivyo nkhusankha ni viwemi, kasi nkhumalira nyengo yitali comene pa ivyo mwakuti nkhuŵavya nyengo yakukwana yakucitira vinthu vyakuzirwa comene?

NCHITO YANE: Kasi nkhugwira nchito kuti nisange vinthu vyakukhumbikwa mu umoyo, panji ndine muzga wake? Kasi yikukhumba kucita vinthu ivyo vingananga umoyo wane? Kasi ningasankha kugwira nchito maora ghakusazgirapo panji kucezga na uyo nili kutorana nayo panji ŵana ŵane? Usange bwana wane wakukhumba kuti nicitenge nchito iyo yikususkana na njuŵi yane panji iyo yikunitangwaniska kucita vinthu vyauzimu, kasi nigwirenge kuti bwana wane waleke kunifumiska nchito?

UMOYO WANE: Kasi nkhupwelerako yayi za umoyo wane, panji nkhuwuvikilira nyengo zose? Kasi ndiwo ukuŵa nkhani yikuru para nkhuyowoya na ŵanyane? Kasi umo nkhupwelelera umoyo nkhulongora kuti nkhughanaghanira mbumba yane?

KUŴA WACIMWEMWE: Kasi ici ndico cili pakwamba mu umoyo wane? Kasi nkhughanaghanira comene cimwemwe cane kuluska ca uyo nili kutorana nayo panji mbumba yane? Kasi umo nkhupenjera cimwemwe vikukolerana na kuŵa musopi wa Ciuta waunenesko?

MUWOLI PANJI MFUMU WANE: Kasi nkhuwona uyo nili kutorana nayo nga ni munyane pekha para kucita ntheura kukukondweska ine? Kasi nkhumucindika, kumuwona nga ni munthu uyo wakukhumbikwira nchindi? Kasi cigomezgo cane mwa Ciuta cikunilongozga umo nkhuwonera uyo nili kutorana nayo?

ŴAPAPI ŴANE: Usange nicali mwana, kasi nkhupulikira ŵapapi ŵane, kuŵazgora mwanchindi, kucita milimo iyo ŵanipa, kufika pa nyumba pa nyengo iyo iwo ŵakukhumba, kucheŵa kwenda na ŵanthu awo iwo ŵakukana panji kuleka kucita vinthu ivyo iwo ŵakuti ni viheni? Usange nili mulara, kasi nkhutegherezga mwanchindi ku ŵapapi ŵane, kuŵawovwira para nkhwakukhumbikwa? Kasi nkhucita nawo mwakulondezga ivyo ine nkhukhumba panji ulongozgi wa mu Mazgu gha Ciuta?

ŴANA ŴANE: Kasi nkhuwona kuti ni udindo wane kusambizga ŵana ŵane mikhaliro yiwemi, panji nkhughanaghana kuti ni udindo wa sukulu? Kasi nkhucezga na ŵana ŵane, panji nkhughanaghana kuti ŵacezgenge na vidoli, wayilesi ya sinema, panji kompyuta? Kasi nkhucenya ŵana ŵane nyengo yiliyose para ŵaleka kulondezga vikumbusko vya Ciuta, panji nkhucita ntheura pekha para ivyo ŵacita vyanikwiyiska?

NYUMBA YIWEMI, VYAKUVWARA VIWEMI: Ni vici ivyo vikunipangiska kughanaghanira comene pa kawonekero kane na katundu uyo nkhugura, kasi nchifukwa ca kukhumba kujiwoneska ku ŵazengezgani ŵane? uwemi wa mbumba yane? panji cifukwa cakuti ndine musopi wa Ciuta?

KUCITA MAKORA CINTHU CILICOSE KULUSKA WALIYOSE: Kasi nkhughanaghana kuti nchakukhumbikwa kucita makora vinthu? Kasi nkhuyezgayezga comene kuti niluske waliyose? Kasi nkhudandaura usange munthu munyake wacita makora cinthu cinyake kuluska ine?

KUSOPA CIUTA: Kasi kukondweska Ciuta nkhwakuzirwa comene kwa ine kuluska kukondweska uyo nili kutorana nayo, ŵana ŵane, ŵapapi ŵane, panji bwana wane? Kasi niŵenge wakunweka kuŵika uteŵeti wane kwa Ciuta pa malo gha ciŵiri mwakuti nilutilire kukhala na umoyo uwemi?

 GHANAGHANIRANI MWAKUPWELELERA ULONGOZGI WA MU BAIBOLO

Kasi Ciuta wali pa malo wuli mu umoyo winu?

Mupharazgi 12:13: ‘Mopani Ciuta, na kusunga malango ghake, cifukwa ici ndico mulimo wose wa munthu.’

JIFUMBANI KUTI: Kasi umoyo wane ukulongora kuti nkhuwona vinthu nga ni umo lemba ili likuyowoyera? Kasi kupulikira malango gha Ciuta ndiko kukulongozga umo nkhucitira milimo yane panyumba, ku nchito, panji ku sukulu? Panji vinthu vya zuŵa na zuŵa ndivyo vikunipangiska kuwona kuti nipature nyengo yakucitira vinthu vyauzimu panji cara?

Kasi muli na ubwezi wa mtundu wuli na Ciuta?

Zintharika 3:5, 6: “Tamira mwa Yehova na mtima wako wose, ungeghamanga ku umanyi wako. Mu mendero ghako ghose umuzomere iye, ndipo tiwanyoroskenge nthowa zako.”

Mateyu 4:10: “Ulambirenge Fumu Ciuta wako, ndipo umuteŵeterenge iyo yekha.”

JIFUMBANI KUTI: Kasi umu ndimo nkhughanaghanira pakuyowoya za Ciuta? Kasi ivyo nkhucita zuŵa na zuŵa, ndiposo umo nkhucitira na vyakumara mahara, vikulongora cigomezgo na kujipeleka kwanthena uku?

Kasi kuŵazga na kusambira Baibolo nkhwakuzirwa wuli kwa imwe?

Yohane 17:3: “Uwu mbumoyo wamuyirayira, kuti ŵamumanyani imwe, Ciuta mweneco yekha, na Yesu Khristu, uyo mukamutuma.”

JIFUMBANI KUTI: Kasi umo nkhuzirwiskira kuŵazga Mazgu gha Ciuta na kulanguruka pa ivyo naŵazga kukulongora kuti nkhugomezga nadi ivyo lemba ili likuyowoya?

Kasi kufika pa maungano gha mpingo nkhwakuzirwa wuli kwa imwe?

Ŵahebere 10:24, 25: “Tighanaghanirane na kukhuŵirizgana ku kutemwa na ku milimo yiwemi; kuleka kongana cara, . . . ndipo comene comene apo mukuwona zuŵa likuneng’enera.”

Salmo 122:1: “Nkhasekelera para ŵakanena nane, ‘Tiyeni, tikwelere ku nyumba ya Yehova.’”

JIFUMBANI KUTI: Kasi umoyo wane ukulongora kuti nkhumanya na kuwongera ulongozgi wa mu Mazgu gha Ciuta uwu? Kasi mwezi wamara zuŵa linyake nkhakhala ku maungano cifukwa cakuti nkhatangwanika na vinthu vinyake?

Kasi muli ŵamwamphu pa kuphalirako ŵanji za Ciuta na vilato vyake?

Mateyu 24:14: “Makani ghawemi gheneagha gha ufumu ghamkupharazgika mu vyaru vyose ghaŵe cipanikizgo . . . , penepapo ndipo umaliro uti wizenge.”

Mateyu 28:19, 20: “Ntheura lutaninge mukasambizge mitundu yose, . . . muŵasambizge kukoreska vyose ivyo ndamulangulirani.”

Salmo 96:2: “Yimbirani Yehova, tumbikani zina lake; pharazgani kuponoska kwake zuŵa na zuŵa.”

JIFUMBANI KUTI: Kasi nchito iyi nkhuyiŵika nadi pa malo agho yikwenera kuŵa? Kasi kutoramo cigaŵa kwane mu nchito iyi kukulongora kuti nili wakusimikizga nadi za kofya kwa nyengo iyo tikukhalamo?