Kasi Vyose Ivi Vikung’anamuraci?

YESU KHRISTU wakayowoya kuti: ‘Umaliro wa caru’ uzamumanyikwa na nkhondo, kupeleŵera kwa vyakurya, vilengo (miliri) na vindindindi.—Mateyu 24:1-8; Luka 21:10, 11.

Kwambira mu cilimika ca 1914, umoyo waŵa wakusuzga cifukwa ca nkhondo pakati vyaru na mitundu, ndipo kanandi nkhondo zikucitika cifukwa ca ŵalongozgi ŵa visopo awo ŵakunjizgika mu ndyali, kweniso cifukwa ca kuthandazgika kwa ucigeŵenga.

Nangauli ŵasayansi wali kusanga nthowa zakuti ŵanthu ŵaŵe na cakurya cinandi, kweni ŵanthu mamiliyoni ghanandi ŵakusuzgika na njara. Cilimika cilicose ŵanthu mamiliyoni ghanandi ŵakufwa na njara.

Miliri nchimoza mwa vimanyikwiro ivyo Yesu wakayowoya. Yikati yamara waka Nkhondo Yakwamba ya Caru cose, nthenda yakwambukira ya infuluwenza yikakoma ŵanthu ŵakujumpha 21,000,000. Mwakupambana na nthenda izo zikakoranga ŵanthu mu malo ghacoko waka mu nyengo yakale, nthenda iyi yikakora ŵanthu ŵanandi pa caru cose capasi. Panyengo yasono ŵanthu ŵanandi ŵakulwara matenda gha Ezi (AIDS), ndipo cikhoso ca TB, maleliya, nthenda yakukoma maso, ndiposo ya kugoneska tulo ghakulutilira kupweteka ŵanthu mu vyaru vikavu.

Kuli kuyowoyeka kuti kukucitika vindindindi vinandi comene vya nkhongono zakupambanapambana. Nangauli pali vilwero na nthowa zakumanyira vindindindi na nkhongono yake, mu vigaŵa ivyo mukukhala ŵanthu ŵanandi mukucitika ngozi zinandi cifukwa ca vindindindi ndipo vindindindi ndivyo vikuŵa mitu ya nkhani.

Baibolo likayowoyaso kuti: “Umanye ceneici, kuti mu mazuŵa gha ku umaliro nyengo zinonono ziti zizenge. Cifukwa ŵanthu ŵati ŵaŵenge ŵakujitemwa, ŵakutemwa ndarama, ŵakujitunthumuska, ŵakujiŵikamo, ŵakutuka, ŵambura kupulikira ŵapapi, ŵambura kuwonga, ŵaheni, ŵambura kutemwa ŵanyaŵo, ŵanonono, ŵakusesa, ŵambura kujikora, ŵakali, ŵambura kutemwa uwemi, ŵa ciŵembu, ŵakajilangi, ŵakutukumuka, ŵakutemwa vyakusekereska kwakuluska kutemwa Ciuta; ŵakukora kawonekero ka kusopa Ciuta, kweni ŵakukana nkhongono zake: kwa ŵeneawo naŵo lazgako nkhontho [upatukeko].”—2 Timote 3:1-5.

Kasi mukuzomerezga yayi kuti tikukhala mu “nyengo zinonono”?

Kasi mukuwona kuti ŵanthu mbakujitemwa, ŵakutemwa ndarama ndiposo mbakujiwona?

Ninjani uyo wangasuska fundo yakuti caru nchakuzura na ŵanthu ŵambura kupulikira vya ŵanyawo, ŵambura kuwonga, ŵakajilangi, ndiposo ŵambura kugomezgeka?

Kasi mukumanya kuti kuleka kupulikira ŵapapi pamoza na kuŵa ŵambura citemwa vyathandazgika comene pa caru cose?

 Mwambura kukayika namwe mukumanya kuti tikukhala mu caru ico ŵanthu ŵakutemweseska vinthu vyakusanguluska ndipo ŵakutemwa yayi vinthu viwemi.

Umu ndimo Baibolo likulongosolera mikhaliro iyo yizamuŵako mu “mazuŵa gha ku umaliro.”

Kasi pakukhumbikwira ukaboni unyake kuti timanye nyengo iyo tikukhalamo? Yesu wakayowoyaso kuti mu nyengo yeneyiyo ivi vikucitika, makani ghawemi gha Ufumu wa Ciuta ghapharazgikenge pa caru cose. (Mateyu 24:14) Kasi ici cikucitika?

Gongwe la Mulinda, magazini ghakuzizika pa Baibolo agho nchito yake nkhupharazga makani ghawemi gha Ufumu wa Yehova, ghakusindikizgika mu viyowoyero vinandi kuluska magazini yiliyose.

Cilimika cilicose, Ŵakaboni ŵa Yehova ŵakugwiliskira nchito maora  ghakujumpha wanu biliyoni kuphalira ŵanji za Ufumu wa Ciuta.

Ŵakaboni ŵa Yehova ŵakusindikizga mabuku ghakulongosora Baibolo mu viyowoyero pafupifupi 400, nanga ni mu viyowoyero ivyo vikuyowoyeka na ŵanthu ŵacoko waka. Ŵakaboni ŵa Yehova ŵakupharazgira ŵanthu ŵa mitundu yose; ŵakupharazgaso mu virwa vinandi ndiposo ku vigaŵa ivyo vikuwoneka vyambura kuzirwa. Mu vyaru vinandi, ŵakuŵa na ndondomeko ya masambiro gha Baibolo agho ghakucitika nyengo na nyengo.

Nadi pano, Makani ghawemi gha Ufumu wa Ciuta ghakupharazgika pa caru cose, kuti ŵanthu wose ŵaŵe Ŵakaboni ŵa Yehova cara, kweni kuti ciŵe cipanikizgo ku mitundu yose. Kulikose ŵanthu ŵakupika mwaŵi wakuti ŵalongore usange ŵakupwelerako za uyo wakalenga kucanya na caru capasi na kucindika malango ghake na kulongora citemwa ku ŵanyawo.—Luka 10:25-27; Civumbuzi 4:11.

Sonosono apa, Ufumu wa Ciuta uzamuwuskapo ŵanthu wose ŵaheni na kuzgora caru kuŵa paradiso.—Luka 23:43.

[Bokosi pa peji 6]

Mazuŵa gha ku Umaliro kwa Vici?

Ni mazuŵa gha ku umaliro wa mtundu wa ŵanthu yayi. Baibolo likupeleka cilindizga ca kuzakakhala na umoyo wamuyirayira ku ŵanthu awo ŵakucita khumbo la Ciuta.—Yohane 3:16, 36; 1 Yohane 2:17.

Agha ni mazuŵa gha ku umaliro wa caru yayi. Mazgu gha Ciuta ghakutilayizga kuti caru cizamuŵako kwamuyirayira.—Salmo 37:29; 104:5; Yesaya 45:18.

M’malo mwake, agha ni mazuŵa gha ku umaliro wa ŵanthu ŵaciwawa, ŵambura citemwa na awo ŵakudemelera ku mikhaliro yiheni.—Zintharika 2:21, 22.

[Bokosi/Cithuzithuzi pa peji 7]

Kasi Baibolo Ni Mazgu gha Ciuta Nadi?

Mwakuwelezgawerezga, nchimi izo zikalemba Baibolo zikalemba kuti: “Wakuti Ntheura Yehova.” (Yesaya 43:14; Yeremiya 2:2) Nanga ni Yesu Khristu, Mwana wa Ciuta, nayo wakayowoya mwakudidimizga kuti ‘ivyo wakayowoyanga vikaŵa vyake yayi.’ (Yohane 14:10) Baibolo ilo lene likuyowoya kuti: “Malembo ghose ghakupelekeka na Ciuta.”—2 Timote 3:16.

Mwakuyana na umo ŵakayowoyera ŵa United Bible Societies, palije buku ilo likusangika mu viyowoyero vyakujumpha 2,200. Palije buku ilo likusangika na ŵanthu ŵanandi nakuti sono nthena, makope ghakujumpha 4 biliyoni ghali kusindikizgika. Kasi ndimo viliri yayi na uthenga wakufuma kwa Ciuta wakuya ku ŵanthu ŵa mitundu yose?

Kuti mumanye maukaboni ghanandi agho ghakulongora kuti Baibolo ni Mazgu gha Ciuta, wonani buku lakuti Baibulo—Kodi Ndilo Mawu a Mulungu Kapena a Munthu?, Lakusindikizgika na Ŵakaboni ŵa Yehova.

Usange mukuŵazga Baibolo na kuzomerezga kuti ni Mazgu gha Ciuta mupindulenge comene.

[Bokosi/Vithuzithuzi pa peji 8]

Kasi Ufumu wa Ciuta Ni Vici?

Ni boma la kucanya la kuwusika na Ciuta waunenesko, Yehova, Mlengi wa kucanya na caru capasi.—Yeremiya 10:10, 12.

Baibolo likuyowoya mwakudunjika kuti Ciuta wali kupeleka mazaza gha kuwusa kwa Yesu Khristu. (Civumbuzi 11:15) Peneapo wakaŵa pa caru capasi, Yesu wakalongora kuti wakaŵa kale na mazaza agho wakapika na Ciuta. Mazaza agha, ghakamovwiranga kuwusa nanga ni vinthu vyambura umoyo, kucizga matenda ghakupambanapambana, ndiposo kuwuska ŵanthu ŵakufwa. (Mateyu 9:2-8; Marko 4:37-41; Yohane 11:11-44) Ucimi wa Baibolo ukayowoyerathu kuti Ciuta wazamumupaso ‘kuwusa na nchindi na ufumu, kuti ŵanthu ŵa mitundu yose, na mayowoyero ghose ŵamuteŵetere.’ (Daniel 7:13, 14) Boma ili likucemeka Ufumu wa kucanya; cifukwa cakuti sono Yesu Khristu wakuwusa kufuma kucanya.

[Vithuzithuzi pa peji 7]

Kupharazga makani ghawemi pa caru cose