Cipaturo 71

Ŵafarisi Ŵakulekera Dala Kugomezga

ŴAPAPI ŵa munthu uyo wakaŵa wakupempheska ndiposo wacibulumutira ŵakopa apo ŵakucemeka na Ŵafarisi. Kwayowoyeka kuti waliyose uyo wakupulikana mwa Yesu wasezgekenge mu sunagoge, ndipo iwo ŵakumanya ici. Para munthu ŵamusezga mu sunagoge, ubwezi na ŵanyake ukudumuka ndipo ili lingaŵa suzgo likuru, comenecomene ku mbumba yikavu. Ntheura ŵapapi aŵa ŵakucita mwakucenjera.

Ŵafarisi ŵakuŵafumba kuti: “Kasi uyu ni mwana winu uyo mukuti wakababika wacibulumutira? Ipo vyaŵa wuli kuti sono wakulaŵiska?”

Ŵapapi ŵakuzomera kuti: “Tikumanya kuti uyu ni mwana withu ndiposo kuti wakababika wacibulumutira. Kweni umo vyaŵira kuti sono wakulaŵiska tikumanya cara, panji uyo wajura maso ghake tikumumanya cara.” Nadi, mwana wawo wakwenera kuti waŵaphalira vyose ivyo vyacitika, ndipo mwakucenjera ŵapapi aŵa ŵakuti: “Mufumbani. Ni mulara. Wakwenera kujiyowoyera yekha.”

Ntheura Ŵafarisi ŵakumucemaso munthu uyo wacizgika. Sono ŵakuyezga kumofya mwa kulongora kuti ŵali na ukaboni wakuti Yesu wali na mulandu. Ŵakumuphalira kuti: “Peleka ucindami kwa Ciuta; ise tikumanya kuti munthu uyu ngwakwananga.”

Munthu uyo wakaŵa wacibulumutira wakuŵasuska yayi, wakuti: “Kwali ngwakwananga nkhumanya cara.” Kweni wakusazgirapo kuti: “Cinthu cimoza ico nkhumanya nchakuti, nkhaŵa wacibulumutira, sono nkhulaŵiska.”

Pakukhumba kusanga kafukwa pa ukaboni wake, Ŵafarisi ŵakumufumbaso kuti: “Kasi wangucitaci kwa iwe? Wangujura wuli maso ghako?”

Munthu uyu wakudandawura kuti: “Namuphalirani kale, ndipouli, mukupulika cara. Cifukwa wuli mukukhumba kupulikaso ici?” Ndipo mwaganyavu, wakufumba kuti: “Kasi namwe mukukhumba kuŵa ŵasambiri ŵake?”

Ŵafarisi ŵakukwiya na zgoro ili. Ŵakukalipa kuti: “Ndiwe msambiri wa munthu yura, kweni ise tili ŵasambiri ŵa Mozesi. Tikumanya kuti Ciuta wakayowoya kwa Mozesi; kweni munthu uyu, tikumanya cara uko wali kufuma.”

Pakulongora kuzizwa, wakupempheska wakujiyuyura uyu, wakuti: “Ici nchakuzizwiska nadi, kuti imwe mukumanya cara uko wali kufuma, ndipouli, wajura maso ghane.” Kasi fundo njakuti wuli pa nkhani iyi? Munthu wakupempheska uyu wakuyowoya fundo iyo wose ŵakukolerana nayo, wakuti: “Tikumanya kuti Ciuta wakuŵapulika cara ŵakwananga, kweni usange munthu wakopa Ciuta na kucita khumbo lake, wakumupulika iyo uyu. Kufuma papo kale kundapulikikwepo kuti munthu wajura maso gha uyo wakababika wacibulumutira.” Ntheura fundo apa njakuti: “Munthu uyu waŵenge wakufuma kwa Ciuta cara, mphanyi wacitapo kanthu cara.”

Ŵafarisi ŵalije cakuzgora pa fundo yakudunjika na yakupulikikwa makora iyi. Ŵakumanya kuti uwu mbunenesko, ntheura ŵakumunena munthu uyu kuti: “Iwe wamusuma ukababikira mu zakwananga, kweni kasi ukutisambizga ise?” Pa ici, ŵakumucimbizgira kuwaro, ndipo vikuwoneka kuti ŵamusezga mu sunagoge.

Yesu wati wapulika ivyo ŵacita, wakusangana na munthu uyu, ndipo wakuti: “Kasi ukupulikana mwa Mwana wa munthu?”

Pakuzgora, munthu uyo wakaŵa wakupempheska na wacibulumutira wakufumba kuti: “Ni njani iyo, dada, mwakuti nipulikane mwa iyo?”

Yesu wakuzgora kuti: “Uyo wakuyowoya nawe ni mweneyuyo.”

Nyengo yeneyiyo, munthu uyu wakusindama panthazi pa Yesu na kuyowoya kuti: “Nkhupulikana mwa iyo, Fumu.”

Ndipo Yesu wakulongosora kuti: “Ceruzgo ici ndico nkhizira mu caru cino: kuti awo ŵakulaŵiska cara ŵalaŵiske ndipo awo ŵakulaŵiska ŵaŵe ŵacibulumutira.”

Wati wayowoya nthena, Ŵafarisi awo ŵakupulikizga ŵakufumba kuti: “Kasi nase tili ŵacibulumutira?” Ŵazomerenge kuti mbacibulumutira mu maghanoghano, mphanyi ŵanguŵa na pakugwenthera apo ŵakususka Yesu. Nga umo Yesu wakuŵaphalilira kuti: “Muŵenge ŵacibulumutira, mphanyi mulije kwananga.” Kweni iwo ŵakugwagwamira kuti mbacibulumutira yayi ndipo ŵakukhumbikwira yayi kungweluskika mwauzimu. Ntheura Yesu wakuti: “Sono pakuti mukuyowoya kuti, ‘Tikulaŵiska.’ Kwananga kwinu kukukhalilira.” Yohane 9:19-41.

▪ Cifukwa wuli ŵapapi ŵa munthu uyo wakaŵa wacibulumutira ŵakopa apo ŵakucemeka na Ŵafarisi, ndipo ŵakuzgora wuli mwakucenjera?

▪ Kasi Ŵafarisi ŵakuyezga wuli kumofya munthu uyo wakaŵa wacibulumutira?

▪ Kasi ni fundo wuli yakupulikikwa makora iyo munthu uyo wakaŵa wacibulumutira wakukwiyiska nayo Ŵafarisi?

▪ Cifukwa wuli Ŵafarisi ŵalije pakugwenthera apo ŵakususka Yesu?