Cipaturo 39

Ŵakujikuzga na Ŵakujiyuyura

WATI wayowoya viwemi vya Yohane Mbapatizi, Yesu wakuzgokera ku ŵanthu ŵakujikuzga na ŵakusinthasintha awo ŵamuzingilizga. Wakuti: “Muwiro uwu . . . uli nga mbana ŵacoko awo ŵakukhala mu misika, ŵeneawo ŵakucemerezga ku ŵanyawo, ŵakuti, ‘Tikamulizgirani fyoliro, kweni mukavina cara; tikatengera, kweni mukajipamantha cara cifukwa ca citima.’”

Kasi Yesu wakung’anamuraci? Iyo wakulongosora kuti: “Yohane wali kwiza, kwambura kurya panji kumwa, ndipouli, ŵanthu ŵakuti, ‘Wali na ciŵanda’; Mwana wa munthu wali kwiza, wakurya na kumwa, kweni ŵanthu ŵakuti, ‘Wonani! munthu wakutemwa kurya na kumwa vinyo, mubwezi wa ŵakusonkheska msonkho na ŵakwananga.’”

Nchambura macitiko kuŵakhorweska ŵanthu aŵa. Palije ico cikuŵakondweska. Yohane wakukhala umoyo wa kujinora pakuŵa Munaziri, mwakuyana na mazgu agho mungelo wakayowoya ghakuti “wangamwanga vinyo na cakumwa cikali cara nanga mphacoko.” Ndipouli, ŵanthu ŵakuti wali na ciŵanda. Kweni Yesu wakukhala nga umo ŵanthu wose ŵakukhalira, kwambura kujinora comene, ndipo ŵakumususka kuti wakujumphizga comene.

Nchinonono nadi kukondweska ŵanthu aŵa. Ŵali nga mbana awo ŵakuseŵera na ŵanyawo, awo ŵakukana kuvina para ŵana ŵanyawo ŵakulizga fyoliro panji kuŵa na citima para ŵanyawo ŵakulira. Ndipouli, Yesu wakuti: “Vinjeru vikurunjiskika na milimo yake.” Enya, ukaboni panji kuti milimo, yikulongora pakweru kuti ŵanthu ŵakususka Yohane na Yesu pa vifukwa vyawakawaka.

Yesu wakwamba kucenya misumba yitatu, wa Korazini, Betesayida na Kaperenaumu, uko wacitako milimo yinandi yankhongono. Yesu wakuyowoya kuti wacitenge milimo iyi mu misumba ya Ŵafonike ya Ture na Sidoni, mphanyi misumba iyi yili kupera kale mu cigudulu na vyoto. Pakususka msumba wa Kaperenaumu, uko wakwenera kuti wakutemwa kukhala nyengo ya uteŵeti wake, Yesu wakuti: “Kuzamuŵa mphanyiko ku caru ca Sodomu pa Zuŵa la Ceruzgo kuluska kwa iwe.”

Kufuma apo, Yesu wakulumba Ŵawiske ŵakucanya pamaso pa ŵanthu. Wakucita nthena cifukwa cakuti Ciuta wakubisa unenesko wakuzirwa wauzimu ku ŵavinjeru na ŵamahara kweni wakuwuvumbura ku ŵakujiyuyura, awo ŵakuŵa nga mbanici.

Paumaliro, Yesu wakupeleka nchemo iyi: “Zani kwa ine, mose imwe mukuphyoka na kunyekezgeka, ndipo nimusamphuskaninge. Jitolerani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamusamphuskika mu umoyo winu. Cifukwa joko lane ndipusu na katundu wane ngwakupepuka.”

Kasi Yesu wakusamphuska wuli ŵanthu? Wakuŵasamphuska apo wakuŵafwatura ku maluso agho ŵalongozgi ŵa cisopa ŵaŵanyekezga nagho. Ciyelezgero cimoza nchakuti ŵakunonopeska malango ghakuyowoya za kusunga Sabata. Kweniso ŵanthu awo ŵakutindiŵizgika na ŵandyali ndiposo awo njuŵi zawo zikuŵasuzga cifukwa ca zakwananga, wakuŵalongora nthowa iyo ŵangapumulira. Wakuvumbulira ŵanthu ŵakusuzgika aŵa ivyo ŵangacita kuti zakwananga zawo zigowokereke ndiposo umo ŵangaŵira paubwezi wakuzirwa na Ciuta.

Joko lipusu ilo Yesu wakulayizga nkhujipeleka fikepo kwa Ciuta, kuteŵetera Ŵadada ŵithu ŵakucanya, awo mbaciwuravi na cisungusungu. Ndipo katundu wakupepuka uyo Yesu wakulayizga awo ŵakwiza kwa iyo, nkhupulikira ivyo Ciuta wakukhumba kuti ŵazakasange umoyo. Vinthu ivi ni malango ghake agho ghali mu Baibolo. Ndipo nchinonono yayi kupulikira malango agha. Mateyu 11:16-30; Luka 1:15; 7:31-35; 1 Yohane 5:3.

▪ Kasi ŵanthu ŵakujikuzga na ŵakusinthasintha ŵa mu nyengo ya Yesu ŵakuyana wuli na ŵana?

▪ Cifukwa wuli Yesu wakulumba Ŵawiske ŵakucanya?

▪ Kasi ŵanthu ŵakuzotofyeka mu nthowa wuli, ndipo Yesu wakuŵalayizga kupumura kwa mtundu wuli?