Cipaturo 81

Ŵakukhumbaso Kukoma Yesu

PAKUTI ni nyengo ya ciwuvi, Yesu wakwenda mu malo ghakucemeka khonde la Solomoni. Ghali mumphepete mwa tempele. Umu, Ŵayuda ŵakumuwungilira na kwamba kuyowoya kuti: “Kasi mutivungenge mu mahamba mpaka pawuli? Usange ndimwe Khristu, tiphalirani pakweru.”

Yesu wakuzgora kuti: “Nkhamuphalirani, kweni mukugomezga cara.” Yesu wandaŵaphalirepo mwakudunjika kuti ni Khristu, nga umo wakaphalilira mwanakazi Musamariya pa cisimi. Kweni wakajivumbura kwa iwo apo wakaŵalongosolera kuti iyo ngwakufuma kucanya ndipo wakaŵako pambere Abrahamu wandaŵeko.

Ndipouli, Yesu wakukhumba kuti ŵanthu ŵadumure ŵekha kuti iyo ni Khristu mwa kuyaniska ivyo wakucita na ivyo Baibolo likayowoyerathu kuti Khristu wazamufiska. Ndico cifukwa kumanyuma uku, wakacinyinthizga ŵasambiri ŵake kuti ŵaleke kuphalira munthu waliyose kuti iyo ni Khristu. Ndiposo lekani sono wakulutilira kuphalira Ŵayuda ŵakali aŵa kuti: “Milimo iyo nkhucita mu zina la Ŵadada, iyi yikunicitira ukaboni. Kweni imwe mukugomezga cara.”

Cifukwa wuli ŵakugomezga yayi? Kasi nchifukwa cakuti palije ukaboni wakuti Yesu ni Khristu? Yayi, kweni nchifukwa ca ivyo Yesu wakuŵaphalira kuti: “Ndimwe mberere zane cara. Mberere zane zikupulika mazgu ghane, ndipo nkhuzimanya, ndiposo zikunilondezga. Ndipo nkhuzipa umoyo wamuyirayira, ndipo zizamuparanyika cara napacoko, ndipo palije uyo wazamuzikwapura mu woko lane. Ico Ŵadada ŵanipa nchinthu cikuru comene kuluska vinthu vinyake vyose, ndipo palije uyo wangazikwapura mu woko la Ŵadada.”

Yesu wakulongosora za ubwezi wake na Ŵawiske, wakuti: “Ine na Ŵadada tili ŵamoza.” Pakuti Yesu wali pa caru capasi ndipo Ŵawiske ŵali kucanya, wakung’anamura kuti iyo na Ŵawiske mbakubanyana yayi. M’malo mwake, wakung’anamura kuti mbamoza mu vyakucita, ndiposo kuti mbakukolerana.

Pakukwiya na mazgu gha Yesu, Ŵayuda ŵakutora malibwe kuti ŵamukome, nga umo ŵakacitira kumasinda, pa Ciphikiro ca Mahema, panji kuti Misasa. Pakulaŵiska mwacikanga ŵanthu awo ŵakukhumba kumukoma, Yesu wakuti: “Nkhamulongorani milimo yiwemi yinandi yakufuma ku Ŵadada. Kasi ni mulimo ngu pa iyo uwo mukukhumba kunidinyirapo na malibwe?”

Ŵakuzgora kuti: “Tikukhumba kukudinya, cifukwa ca mulimo uwemi cara, kweni cifukwa ca muyuyuro, enya, cifukwa cakuti iwe, nangauli ndiwe munthu, ukujizgora wamwene ciuta.” Pakuti Yesu wandayowoyepo kuti iyo ni ciuta, cifukwa wuli Ŵayuda ŵakuyowoya nthena?

Panji nchifukwa cakuti Yesu wakuyowoya kuti wali na mazaza agho iwo ŵakugomezga kuti ghakwenera kuŵa na Ciuta pera. Mwaciyelezgero, Yesu wanguyowoya mazgu ghakuti “mberere,” “nkhuzipa umoyo wamuyirayira,” cinthu ico munthu wangacita cara. Ndipouli, Ŵayuda ŵakuluwa fundo yakuti Yesu wakuzomerezga kuti wakupokera mazaza kufuma ku Ŵawiske.

Yesu wakulongora kuti ni mucoko kwa Ciuta apo wakufumba kuti: “Asi mu Dango linu [pa Salmo 82:6] muli kulembeka kuti, ‘Ine nkhati: “Muli ŵaciuta”’? Usange wakaŵacema ‘ŵaciuta’ ŵeneawo mazgu gha Ciuta ghakiza kwimikana nawo, . . . kasi mukuyowoya kwa ine, mweneuyo Ŵadada ŵamutuŵiska na kumutuma mu caru kuti, ‘Ukuyuyura Ciuta,’ cifukwa cakuti nati, Ndine Mwana wa Ciuta?”

Pakuti Malemba ghakucema ŵeruzgi ŵambura urunji kuti “ŵaciuta,” cifukwa wuli Ŵayuda aŵa ŵakumusanga kafukwa Yesu apo wayowoya kuti: “Ndine Mwana wa Ciuta”? Yesu wakusazgirapo kuti: “Usange nkhucita milimo ya Ŵadada cara, kunigomezga cara. Kweni usange nkhuyicita, nangauli mukunigomezga cara, gomezgani milimo, mwakuti mufike pa kumanya na kulutilira kumanya kuti Ŵadada ŵali mu umoza na ine ndipo ine nili mu umoza na Ŵadada.”

Yesu wati wayowoya ivi, Ŵayuda ŵakukhumba kumukora. Kweni wakucimbira, nga umo wakacitira pa Ciphikiro ca Mahema. Wakufumamo mu Yerusalemu ndipo wakwambukira ku sirya linyake la Mlonga wa Yorodani, uko Yohane wakambira kubapatiza ŵanthu pafupifupi vilimika vinayi ivyo vyajumpha. Malo agha ghakwenera kuti ghali kutali yayi na cigaŵa ca kumwera, mumphepete mwa Nyanja ya Galileya. Ndipo ni ulendo wa mazuŵa ghaŵiri panji kuluska apa kufuma ku Yerusalemu.

Ŵanthu ŵanandi ŵakwiza kwa Yesu ku malo agha ndipo ŵakwamba kuyowoya kuti: “Nadi, Yohane wakacitapo cimanyikwiro nanga nchimoza cara, kweni vinthu vyose ivyo Yohane wakayowoya vya munthu uyu, vyose vikaŵa vyaunenesko.” Ntheura ŵanthu ŵanandi ŵakupulikana mwa Yesu kwenekura. Yohane 10:22-42; 4:26; 8:23, 58; Mateyu 16:20.

▪ Kasi Yesu wakukhumba kuti ŵanthu ŵamumanye wuli kuti iyo ni Khristu?

▪ Kasi Yesu na Ŵawiske mbamoza mu nthowa wuli?

▪ Kasi cingaŵa cifukwa wuli ico Ŵayuda ŵakutiri Yesu wakujizgora ciuta?

▪ Kasi mazgu gha mu buku la Salmo agho Yesu wazunura ghakulongora wuli kuti iyo wakujitora kuti ngwakuyana na Ciuta yayi?