Cipaturo 60

Ŵakuwonerathu Ucindami Waufumu wa Khristu

YESU wafika mu vigaŵa vya Kesareya Filipi, ndipo wakusambizga mzinda pamoza na ŵapositole ŵake. Wakuyowoya mazgu agho ghakuŵaciluska, wakuti: “Nadi pano, nkhumuphalirani kuti ŵalipo ŵanyake awo ŵakwimilira pano awo ŵacetenge nyifwa cara mpaka ŵazakawone dankha Mwana wa munthu wakwiza mu ufumu wake.”

Ŵasambiri ŵakwenera kuti ŵakuzizwa kuti, ‘Kasi Yesu wakung’anamuraci?’ Pati pajumpha sabata yimoza, Yesu wakutora Petrosi, Yakobe, na Yohane, ndipo ŵakukwera lupiri lutali. Yikwenera kuti ni nyengo ya usiku, pakuti ŵasambiri ŵali na tulo. Uku Yesu wakulomba, wakusintha mawonekero panthazi pawo. Cisko cake cikwamba kuŵala nga ni dazi, ndipo malaya ghake ghakugadima nga mbungweru.

Ndipo ŵanthu ŵaŵiri, awo ŵakuŵa nga ni “Mozesi na Eliya” ŵakuwonekera, ndipo ŵakwamba kudumbiskana na Yesu za ‘kuwukapo kwake uko kwamucitikira mu Yerusalemu.’ Kuwukapo uku ni nyifwa ya Yesu na kuwuka kwake. Ntheura cidumbirano ici cikulongora kuti nyifwa yakulengeska ya Yesu njakuti wangayigwentha yayi, nga umo Petrosi wakakhumbiranga.

Pakuti sono ŵawuka, ŵasambiri ŵakuwona na kupulikizga mwakuzukuma. Nangauli iyi ni mboniwoni, kweni vikuŵa nga kuti vikucitika nadi mwakuti Petrosi wakwamba kuyowoyako, wakuti: “Fumu, nchiwemi kwa ise kuŵa pano. Usange mungakhumba, nijinthenge mahema ghatatu pano, limoza linu, limoza la Mozesi na limoza la Eliya.”

Apo Petrosi wakuyowoya, bingu lituŵa likuŵasikizga, ndipo lizgu lakufuma kucanya likuti: “Uyu ni Mwana wane, wakutemweka, mweneuyo nkhukondwa nayo; pulikizgani kwa iyo.” Pakupulika mazgu agha, ŵasambiri ŵakuwa kavunama. Kweni Yesu wakuti: “Wukani ndipo mungopanga cara.” Ŵati ŵawuka, ŵakuwona kuti pali Yesu pera.

Zuŵa lakulondezgapo, apo ŵakukhira mu lupiri, Yesu wakuŵalangura kuti: “Kuphalira munthu cara mboniwoni iyi mpaka Mwana wa munthu wawuskike ku ŵakufwa.” Cifukwa ca kuwona Eliya mu mboniwoni, ŵasambiri ŵali na fumbo. Ŵakufumba kuti: “Cifukwa wuli ŵalembi ŵakuti Eliya wakwenera kwiza dankha?”

Yesu wakuti: “Eliya wali kwiza kale ndipo iwo ŵakamupanikizga cara.” Ndipouli, Yesu wakuyowoya za Yohane Mbapatizi uyo wakacita mulimo wakuyana waka na wa Eliya. Yohane wakanozgera nthowa Khristu, nga umo Eliya wakanozgera nthowa Elisha.

Mboniwoni iyi njakukhozga comene kwa Yesu na ku ŵasambiri wuwo. Mboniwoni iyi, tingati nkhuwonerathu ucindami Waufumu wa Khristu. Apa vikuyana waka na kuti ŵasambiri ŵakawona “Mwana wa munthu wakwiza mu ufumu wake,” nga umo Yesu wakalayizgira sabata yajumpha. Pamanyuma pa nyifwa ya Yesu, Petrosi wakalemba kuti ‘ŵakawona na maso ukuru wa Khristu apo ŵakaŵa nayo mu lupiri lutuŵa.’

Ŵafarisi ŵakakhumbanga kuwona cimanyikwiro kwa Yesu cakulongora kuti wakaŵa nadi uyo wakalayizgika mu Malemba kuzakaŵa Themba lakusoleka la Ciuta. Ŵakapika cimanyikwiro cilicose yayi. Kweni ŵasambiri ŵa Yesu ŵakutemweka ŵapika mwaŵi wa kuwona kusinthika kwake, ico cikukhozgera maucimi ghakuyowoya za Ufumu. Lekani pamanyuma, Petrosi wakalemba kuti: “Ntheura tili na mazgu gha ucimi ghakukhozgeka nkhanira.” Mateyu 16:13, 28–17:13; Mariko 9:1-13; Luka 9:27-37; 2 Petrosi 1:16-19.

▪ Pambere ŵandacete nyifwa, kasi ŵanji ŵakumuwona wuli Khristu apo wakwiza mu Ufumu wake?

▪ Mu mboniwoni, kasi Mozesi na Eliya ŵakudumbiskana vici na Yesu?

▪ Cifukwa wuli mboniwoni iyi njakukhozga comene ku ŵasambiri?