Cipaturo 115

Ŵasambiri Ŵakukwesana

MISE ya usiku uwu, Yesu wangusambizga sambiro liwemi comene pa nkhani ya kujiyuyura, wangugeziska malundi gha ŵapositole ŵake. Kufuma apo, wangwambiska Cikumbusko ca nyifwa yake iyo yili pafupi. Sono, comenecomene pakuwona vinthu ivyo vyacitika waka, cinthu cakuzizika cikucitika. Ŵapositole ŵake ŵakwamba kukwesana comene za uyo wakuwoneka mulara pa wose. Vikuwoneka kuti ŵanthu aŵa ŵakupindana kanandi waka.

Kumbukani kuti Yesu wakati wasintha mawonekero pa lupiri, ŵapositole ŵake ŵakakwesana za uyo ni mukuru comene pakati pawo. Kweniso Yakobe na Yohane ŵakapempha malo ghakuzirwa mu Ufumu, ico cikapangiska kuti ŵapositole ŵakwesane. Sono ni usiku waumaliro uwo Yesu wali pamoza nawo, ndipo citima cikwenera kuti cikumukora comene pakuwona kuti ŵakupindanaso. Kasi iyo wakucita vici?

M’malo mwa kuŵakalipira cifukwa ca nkharo yawo, Yesu wakudumbiskana nawo mwakuzika, wakuti: “Mathemba gha mitundu ghakucita ufumu pa iwo, ndipo awo ŵali na mazaza pa iwo ŵakucemeka Ŵacileraŵalanda. Ndipouli, imwe mukwenera kuŵa ntheura cara. . . . Pakuti mukuru ni nju, uyo wakukhala pa thebulu panji uyo wakuteŵetera? Asi ni uyo wakukhala pa thebulu?” Ndipo pakuŵakumbuska umo iyo wakucitira, wakuti: “Kweni ine nili pakati pinu nga ni uyo wakuteŵetera.”

Nangauli vinyake ŵakutondeka, ŵapositole ŵakhala na Yesu mu viyezgo vyake. Ntheura iyo wakuti: “Nkhucita phangano na imwe, nga ni umo Ŵadada ŵacitira phangano na ine, la ufumu.” Phangano ili pakati pa Yesu na ŵalondezgi ŵake ŵakugomezgeka likujulira mwaŵi ŵalondezgi ŵake aŵa kuti ŵakawusire lumoza na iyo. Ŵanthu ŵacoko waka ŵakukwana 144,000 ndiwo ŵakuŵa mu phangano la Ufumu ili.

Nangauli ŵapositole ŵapika mwaŵi wapadera uwu wakuti ŵakawusire lumoza na Khristu mu Ufumu, pasono mbakulopwa mwauzimu. Yesu wakuti: “Mose imwe mukhuŵarenge cifukwa ca ivyo vinicitikirenge usiku uno.” Ndipouli, pakuphalira Petrosi kuti wamulombera, Yesu wakumuciska kuti: “Para wawelera, ukhozge ŵabali ŵako.”

Yesu wakulongosora kuti: “Mwatwana, nicali namwe kanyengo kacoko waka. Muzamunipenja; ndipo nga ni umo nkhayowoyera ku Ŵayuda kuti, ‘Uko nkhuya imwe mungizako cara,’ nkhuyowoyaso kwa imwe sono. Nkhumupani dango liphya, lakuti mutemwanenge yumoza na munyake; umo ine namutemwerani, kuti namweso mutemwanenge yumoza na munyake. Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.”

Petrosi wakufumba kuti: “Fumu, kasi mukuya nkhu?”

Yesu wakuzgora kuti: “Uko nkhuya unganilondezga sono cara, kweni uzamunilondezga pamanyuma.”

Petrosi wakufumba kuti: “Fumu, cifukwa wuli ningamulondezgani sono cara? Nipelekenge umoyo wane cifukwa ca imwe.”

Yesu wakufumba kuti: “Kasi upelekenge umoyo wako cifukwa ca ine?” “Nadi pano nkhukuphalira, Muhanya uno, enya, usiku uno, pambere tambala wandalire kaŵiri, iwe apa, unikanenge katatu.”

Petrosi wakuti: “Usange nkhwakuti nifwe pamoza na imwe, nimukananinge cara napacoko.” Ndipo ŵapositole ŵanyake nawo ŵati ŵayowoya kuti ŵamukanenge yayi, Petrosi wakujilongora pakati pa ŵanyake, wakuti: “Nanga ŵanji wose ŵangakhuŵara, kweni ine nikhuŵarenge cara.”

Pakuyowoya za nyengo iyo wakatuma ŵapositole ŵake kukapharazga mu Galileya kwambura kuyegha tuvikwama twa ndalama na mathumba gha vyakurya, Yesu wakufumba kuti: “Kasi mukasoŵerwa kanthu?”

Ŵakuzgora kuti: “Cara!”

Iyo wakuti: “Kweni sono uyo wali na kacikwama ka ndalama wayeghe, ntheura pera thumba la vyakurya; ndipo uyo walije lupanga waguliske laya lake lakuwaro na kugura lumoza. Pakuti nkhumuphalirani kuti ico cili kulembeka ici cikwenera kufiskika mwa ine, cakuti, ‘Ndipo wakapendeka pamoza na ŵacikanamalango.’ Cifukwa ico cikuyowoya vya ine cikufiskika.”

Yesu wakuyowoya za nyengo iyo wamupayikika lumoza na ŵakucita uheni, panji kuti ŵacikanamalango. Wakulongoraso kuti ŵalondezgi ŵake ŵazamutambuzgika comene para ivi vyajumphapo. Iwo ŵakuti: “Fumu, wonani! pano pali malupanga ghaŵiri.”

Iyo wakuzgora kuti: “Ngakukwana.” Nga umo tiwonerenge, pakuti ŵali na malupanga covwirenge kuti Yesu wasambizge sambiro linyake lakuzirwa. Mateyu 26:31-35; Mariko 14:27-31; Luka 22:24-38; Yohane 13:31-38; Uvumbuzi 14:1-3.

▪ Cifukwa wuli nchakuzizika kuti ŵapositole ŵakukwesana?

▪ Kasi Yesu wakuŵalekeska wuli kukwesana ŵapositole?

▪ Nchivici ico cikufiskika cifukwa ca phangano ilo Yesu wakucita na ŵasambiri ŵake?

▪ Kasi Yesu wakupeleka dango wuli liphya, ndipo ndakuzirwa wuli?

▪ Kasi Petrosi wakujilongora wuli, ndipo Yesu wakuti vici?

▪ Cifukwa wuli ivyo Yesu wakuŵaphalira ŵasambiri vyakuti ŵayeghenge tuvikwama twa ndalama na mathumba gha vyakurya vikupambana na ivyo wakayowoya pakwamba?