Cipaturo 98

Ŵasambiri Ŵakukwesana apo Nyifwa ya Yesu Yikusendelera

YESU na ŵasambiri ŵake ŵali pafupi na Mlonga wa Yorodani, uko ŵakwambuka kufuma ku Pereya kuya ku Yudeya. Ŵanthu ŵanandi ŵakulongozgana nawo apo ŵakuluta ku ciphikiro ca Paska ca cilimika ici ca 33 C.E., ico kwakhala sabata yimoza panji kujumphirapo kuti cicitike.

Yesu wakudangira panthazi pa ŵasambiri ŵake, ndipo ŵakuzizwa na cikanga cake. Kumbukani kuti masabata ghacoko waka kumasinda apo Lazaro wakafwira, ndipo Yesu wakaŵa pafupi kuya ku Yudeya kufuma ku Pereya, Tomasi wakaciska ŵanyake kuti: “Tiyeni nase tilute, mwakuti tikafwe pamoza nayo.” Kweniso kumbukani kuti Yesu wakati wawuska Lazaro, Sanihedirini yikapangana kuti yimukome. Nchakuzizika yayi kuti ŵasambiri wofi ukuŵakora comene apo sono ŵakunjiraso mu Yudeya.

Kuti waŵawovwire kunozgekera ivyo vicitikenge, Yesu wakutolera ŵapositole ŵake 12 pamphepete na kuŵaphalira kuti: “Sono tikusendelera ku Yerusalemu, ndipo Mwana wa munthu wamupelekeka ku ŵalara ŵa ŵasofi na ŵalembi, ndipo ŵamumususkira ku nyifwa na kumupeleka ku ŵanthu ŵa mitundu, ndipo ŵamumuhoya na kumuthunyira mata na kumuthyapura na kumukoma, kweni pamanyuma pa mazuŵa ghatatu wamuwuka.”

Aka nkhacitatu mu myezi yicoko waka apo Yesu waphalira ŵasambiri ŵake za nyifwa na ciwuka cake. Ndipo nangauli ŵakutegherezga, ŵakutondeka kupulikiska. Panji nchifukwa cakuti ŵakugomezga kuti ufumu wa Israyeli uwelerengepo, ndipo ŵakulindilira na kunweka kuzakasanga ucindami na nchindi mu ufumu wa pa caru capasi pamoza na Khristu.

Pakati pa awo ŵakuluta ku Paska pali Salome, nyinawo wa mpositole Yakobe na Yohane. Yesu wakuŵacema kuti “Ŵana Ŵakududumira.” Ndipo tikukayika yayi kuti nchifukwa cakuti ŵakukwiya luŵiro. Kwa nyengo yitali, ŵapositole ŵaŵiri aŵa ŵakhumbisiska comene kuŵa ŵakumanyikwa mu Ufumu wa Khristu, ndipo ŵaphalira anyinawo ico ŵakukhumba. Sono mama uyu wakwiza kwa Yesu m’malo mwa ŵana ŵake, wakumusindamira, kuti wamulombe kanthu kanyake.

Yesu wakufumba kuti: “Kasi ukukhumba vici?”

Wakuzgora kuti: “Mulangure kuti ŵana ŵane ŵaŵiri aŵa ŵazakakhale, yumoza ku woko linu lamalyero na munyake kumazere kwinu, mu ufumu winu.”

Pakumanya uko pempho ili lafuma, Yesu wakuyowoya na Yakobe na Yohane kuti: “Imwe mwaŵanthu mukumanya cara ico mukulomba. Kasi mungamanya kumwa nkhombo iyo nili pafupi kumwa?”

Ŵakuzgora kuti: “Tingamanya.” Nangauli Yesu waŵaphalira kale kuti watambuzgikenge ndipo paumaliro wakomekenge, vikulongora kuti ŵakumanya yayi ico iyo wakung’anamura pakuyowoya mazgu ghakuti “nkhombo” iyo wali pafupi kumwa.

Ndipouli, Yesu wakuŵaphalira kuti: “Mumwenge nadi nkhombo yane, kweni kukhala ku woko lane lamalyero na lamazere uku nkhwa ine cara kupeleka, kweni malo agha nga awo Ŵadada ŵali kuŵanozgera.”

Ŵapositole ŵanyake khumi ŵapulika ivyo Yakobe na Yohane ŵapempha, ndipo ŵakwiya. Panji Yakobe na Yohane ndiwo ŵakaŵa panthazi apo ŵapositole ŵakakwesananga za uyo ni mukuru comene. Pempho lawo ili likulongora kuti ŵandapulikire ulongozgi uwo Yesu wali kupeleka pa nkhani iyi. Cacitima nchakuti khumbo lawo lakuti ŵaŵe ŵakumanyikwa licali likuru comene.

Ntheura kuti wamazge mphindano iyi na suzgo ilo yawuska, Yesu wakucemera ŵapositole 12 pamoza. Wakuŵasambizga mwacitemwa, wakuti: “Mukumanya kuti ŵawusi ŵa mitundu ŵakucita ufumu pa iwo ndipo ŵakuru ŵakucita mazaza pa iwo. Ndimo viliri cara pakati pinu; kweni yose uyo wakukhumba kuŵa mukuru pakati pinu wakwenera kuŵa muteŵeti winu, ndipo yose uyo wakukhumba kuŵa wakwamba pakati pinu wakwenera kuŵa muzga winu.”

Iwo ŵakwenera kuŵa nga ni Yesu, nga umo wakulongosolera kuti: “Mwana wa munthu wakiza kuteŵetereka cara, kweni kuteŵetera na kupeleka umoyo wake kuŵa ciwombolero ca ŵanandi.” Yesu wateŵetera ŵanji kweniso wacitenge ntheura mpaka kuŵafwira. Ŵasambiri ŵakwenera kuŵa na mtima nga ngwa Khristu wakuti ŵateŵetere ŵanji m’malo mwa kuteŵetereka, na kuŵa mucoko m’malo mwa kuŵa na udindo wakuzirwa. Mateyu 20:17-28; Mariko 3:17; 9:33-37; 10:32-45; Luka 18:31-34; Yohane 11:16.

▪ Cifukwa wuli ŵasambiri wofi ukuŵakora?

▪ Kasi Yesu wakovwira wuli ŵasambiri ŵake kunozgekera ivyo vicitikenge?

▪ Kasi Yesu wakupempheka vici, ndipo ŵapositole ŵanyake ŵakujipulika wuli?

▪ Kasi Yesu wakucita wuli na suzgo la ŵapositole ŵake?