Cipaturo 14

Ŵasambiri Ŵakwambilira ŵa Yesu

WATI wamara mazuŵa 40 mu mapopa, Yesu wakuwelera kwa Yohane, uyo wakamubapatiza. Wacali kwiza patali, Yohane wakulongora kwa iyo na kucemerezga kuti: “Wonani, Mwanamberere wa Ciuta uyo wakuwuskako kwananga kwa caru! Uyu ndiyo nkhayowoyanga kuti, Pamanyuma pane pakwiza yunji uyo wadangirako panthazi pane, cifukwa wakaŵako pambere ine nindaŵeko.” Nangauli Yohane ni mularako kwa Yesu, iyo wakumanya kuti Yesu wakaŵako pambere iyo wandaŵeko, wakaŵa munthu wauzimu kucanya.

Ndipouli, masabata ghacoko waka pambere ivi vindacitike, apo Yesu wakiza kuti wabapatizike, Yohane wakwenera kuti wakasimikizga yayi kuti Yesu ndiyo waŵenge Mesiya. Yohane wakuzomerezga kuti: “Nanga ndine nkhamumanya cara, kweni cifukwa ico nkhizira kuzakabapatiza na maji cikaŵa cakuti iyo wawoneke ku Israyeli.”

Yohane wakulutilira kulongosora ivyo vikacitika apo wakabapatizanga Yesu, wakuti: “Nkhawona mzimu ukukhira nga ni nkhunda kufuma kucanya, ndipo ukakhala pa iyo. Nanga ndine nkhamumanya cara, kweni Uyo wakanituma kubapatiza na maji wakati kwa ine, ‘Yose uyo ukuwona mzimu ukukhira na kukhala pa iyo, iyo uyu ndiyo wakubapatiza na mzimu utuŵa.’ Ndipo nawona, ndipo napanikizga kuti iyo uyu ni Mwana wa Ciuta.”

Pa zuŵa lakulondezgapo, Yohane wimilira pamoza na ŵasambiri ŵake ŵaŵiri. Apa napo, apo Yesu wakwiza patali, Yohane wakuti: “Wonani, Mwanamberere wa Ciuta!” Wati wayowoya nthena, ŵasambiri ŵaŵiri aŵa ŵa Yohane Mbapatizi ŵakulondezga Yesu. Yumoza wawo ni Andireya, ndipo munyake wakwenera kuti ni uyo wakalemba vinthu ivi, uyo wakacemekangaso Yohane. Yohane uyu nayo ni mbali wa Yesu, pakuŵa mwana wa Salome, munung’una wa Mariya.

Pakung’anamuka na kuwona kuti Andireya na Yohane ŵakumulondezga, Yesu wakuŵafumba kuti: “Kasi mukupenja vici?”

Iwo ŵakumufumba kuti: “Rabi, . . . kasi mukukhala nkhu?”

Yesu wakuzgora kuti: “Zaninge muwone.”

Nyengo yili pafupifupi 4 koloko mise, ndipo Andireya na Yohane ŵakukhala na Yesu mpaka zuŵa kunjira. Andireya wakondwa comene mwakuti wakucimbira luŵiro kuluta kwa mukuru wake, uyo wakucemeka Petrosi. Wakumuphalira kuti: “Tamusanga Mesiya.” Ndipo wakuluta na Petrosi kwa Yesu. Panyake mpha nyengo yeneyiyi apo Yohane nayo wakusanga mukuru wake Yakobe na kwiza nayo kwa Yesu; kweni cifukwa cakuti wakukhumba yayi kujilongora, Yohane wakulemba yayi nkhani iyi mu Makani Ghawemi.

Zuŵa lakulondezgapo, Yesu wakusanga Filipu, wa ku Betesayida, msumba uwo Andireya na Petrosi ŵakakhalanga pakwamba. Wakumucema, wakuti: “Uŵe mulondezgi wane.”

Kufuma apo, Filipu wakusanga Nataniyeli, uyo wakucemekaso Batulumeyu, ndipo wakuti: “Tamusanga mweneuyo Mozesi, mu Dango, na Zinchimi, ŵakalemba vya iyo, Yesu, mwana wa Yosefe, wa ku Nazarete.” Nataniyeli wakukayika. Wakufumba kuti: “Kasi ku Nazarete kungafuma kanthu kawemi?”

Filipu wakumuciska kuti: “Zanga uwone.” Apo ŵakwiza kufupi, Yesu wakuyowoya vya Nataniyeli kuti: “Wonani, Muisrayeli nadi, mwa mweneuyo mulije upusikizgi.”

Nataniyeli wakufumba kuti: “Mwanimanya wuli?”

Yesu wakuzgora kuti: “Pambere Filipu wandakuceme, apo wanguŵa musi mu khuni la mkuyu, nangukuwona.”

Nataniyeli wakuzizwa. Ndipo wakuti: “Rabi [kung’anamura Msambizgi], ndimwe Mwana wa Ciuta, ndimwe Themba la Israyeli.”

Yesu wakumufumba kuti: “Kasi ukugomezga cifukwa cakuti nayowoya kuti nangukuwona musi mu khuni la mkuyu? Uwonenge vinthu vikuru kuluska ivi.” Ndipo wakulayizga kuti: “Nadi, nadi nkhumuphalirani imwe mwaŵanthu, Muzamuwona kucanya kwajulika na ŵangelo ŵa Ciuta ŵakukwera na kukhilira kwa Mwana wa munthu.”

Mwaluŵiro ivi vyati vyajumphapo, Yesu, pamoza na ŵasambiri ŵake ŵaphya, ŵakufumako ku Dambo la Yorodani ndipo ŵakuya ku Galileya. Yohane 1:29-51.

▪ Kasi ŵasambiri ŵakwambilira ŵa Yesu mbanjani?

▪ Kasi Petrosi na Yakobe ŵakwiza wuli kwa Yesu?

▪ Nchivici cikukhorweska Nataniyeli kuti Yesu ni Mwana wa Ciuta?