Cipaturo 55

Ŵasambiri Ŵanandi Ŵaleka Kulondezga Yesu

YESU wakusambizga ŵanthu mu sunagoge mu Kaperenaumu umo waliri cingwa canadi cakufuma kucanya. Wakwenera kuti wakulutilira cidumbirano ico wangwamba na ŵanthu awo ŵangumusanga, apo ŵakafumanga ku vigaŵa vyakuvuma kwa Nyanja ya Galileya, uko ŵanthu aŵa ŵakarya vingwa na somba izo Yesu wakandaniska mwamunthondwe.

Yesu wakulutilira kuyowoya, wakuti: “Cingwa ico nipelekenge ni thupi lane m’malo mwa umoyo wa caru.” Vilimika viŵiri pambere ivi vindacitike, mu mwezi wa Malici panji Epulero mu 30 C.E., Yesu wakaphalira Nikodemo kuti Ciuta wakatemwa comene caru mwakuti wakapeleka Mwana wake kuŵa Mponoski. Ntheura, sono Yesu wakulongora kuti munthu waliyose uyo wakurya thupi lake, ico cikung’anamura kuŵa na cipulikano mu sembe iyo wali pafupi kupeleka, wasangenge umoyo wamuyirayira.

Ndipouli, ŵanthu ŵakukhuŵara na mazgu gha Yesu. Ŵakufumba kuti: “Kasi munthu uyu wangatipa wuli thupi lake kuti tirye?” Yesu wakukhumba kuti awo ŵakumupulikizga ŵamanye kuti ŵakwenera kurya thupi lake mwakuyelezgera. Ntheura kuti walongosore fundo iyi, wakuyowoyaso cinthu cinyake ico ŵanthu ŵangakolerana naco yayi usange ŵangacipulika nga umo ciliri.

Yesu wakuti: “Kwambura kuti mwarya thupi la Mwana wa munthu na kumwa ndopa zake, mulije umoyo mwa imwe mwaŵene. Uyo wakurya thupi lane na kumwa ndopa zane wali na umoyo wamuyirayira, ndipo nizamumuwuska pa zuŵa laumaliro; Pakuti thupi lane nchakurya canadi, ndipo ndopa zane nchakumwa canadi. Uyo wakurya thupi lane na kumwa ndopa zane wakukhalilira mu umoza na ine, ndipo ine mu umoza na iyo.”

Nadi, Yesu waŵenge kuti wakuciska ŵanthu kuti ŵaryenge ŵanyawo, mphanyi cisambizgo cake canguŵa cawakawaka. Kweni wakuciska ŵanthu kuti ŵaryenge thupi panji kumwa ndopa za ŵanyawo yayi. Wakukhozgera waka fundo yakuti awo ŵakukhumba umoyo wamuyirayira ŵakwenera kuŵa na cipulikano mu sembe iyo wapelekenge apo wakupeleka thupi lake lakufikapo na kuthiska ndopa zake. Kweni nanga mbasambiri ŵake ŵanandi ŵakukhumba yayi kuti ŵapulikiske cisambizgo cake, ndipo ŵakukana, ŵakuti: “Mazgu agha ghakuzizika; ni njani wangaghapulikizga?”

Pakumanya kuti ŵasambiri ŵake ŵanandi ŵakunyunyuta, Yesu wakuti: “Kasi ici cikumukhuŵazgani? Ntheura vingaŵa wuli usange mungawona Mwana wa munthu wakukwelera uko wakaŵa? . . . Mazgu agho nayowoya namwe ni mzimu ndipo mbumoyo. Kweni pali ŵanji ŵa imwe awo ŵakugomezga cara.”

Yesu wakulutilira kuti: “Ici ndico cifukwa namuphalirani kuti, Palije munthu uyo wangiza kwa ine kwambura kuti kwapika kwa iyo na Ŵadada.” Wati wayowoya nthena, ŵasambiri ŵake ŵanandi ŵakufumapo ndipo ŵakuleka kumulondezga. Ntheura Yesu wakung’anamukira ku ŵapositole ŵake 12 na kuŵafumba kuti: “Kasi namwe mukukhumba kuluta?”

Petrosi wakuzgora kuti: “Fumu, tilute tiye kwa njani? Imwe muli na mazgu gha umoyo wamuyirayira; ndipo tagomezga na kufika pa kumanya kuti imwe ndimwe Mutuŵa wa Ciuta.” Ici nchilongolero ciwemi comene ca kugomezgeka, nangauli Petrosi na ŵapositole ŵanyake, nawo ŵandapulikiske cisambizgo ca Yesu pa nkhani iyi.

Nangauli wakondwa na zgoro la Petrosi, Yesu wakuyowoya kuti: “Asi nkhamusorani khumi na ŵaŵiri? Ndipouli, yumoza wa imwe ngwakusesa.” Apa wakuyowoya za Yudasi Isikariyoti. Panji pa nyengo iyi, Yesu wakuwona kuti Yudasi ‘wamba’ kutora nthowa yiheni.

Ni kale yayi apo Yesu wakagongoweska ŵanthu pakuŵakanira apo ŵakakhumbanga kumukora uthemba, ndipo panji ŵakughanaghana kuti, ‘Kasi munthu uyu wangaŵa wuli Mesiya usange wakucita yayi ivyo Mesiya wakwenera kucita?’ Iyi nayo yingaŵa fundo iyo ŵanthu ŵakughanaghana. Yohane 6:51-71; 3:16.

▪ Kasi Yesu wakupeleka thupi lake cifukwa ca njani, ndipo iwo aŵa ‘ŵakurya wuli thupi lake’?

▪ Ni mazgu wuli ghanyake gha Yesu agho ghakuzizika ŵanthu, kweni iyo wakulongosora vici comenecomene?

▪ Apo ŵanandi ŵakuleka kwenda na Yesu, kasi Petrosi wakutipo wuli?