Cipaturo 22

Ŵasambiri Ŵanayi Ŵakucemeka

ŴANTHU ŵakwake ku Nazarete ŵati ŵayezga kumukoma, Yesu wakuya ku Kaperenaumu kufupi na Nyanja ya Galileya. Ici cikufiska ucimi unyake wa Yesaya. Ni ucimi uwo ukayowoyerathu kuti ŵanthu ŵa mu Galileya awo ŵakukhala mumphepete mwa nyanja ŵazamuwona ungweru ukuru.

Apo Yesu wakulutilira na mulimo wake wa kungweluska ŵanthu, wa kupharazga Ufumu mu cigaŵa ici, wakusanga ŵasambiri ŵake ŵanayi. Aŵa ŵakendanga nayo pakwamba kweni ŵakawelera ku nchito yawo ya ulovi ŵakati ŵawerako ku Yudeya pamoza na Yesu. Yesu wakwenera kuti wakuŵapenja, pakuti nyengo yakwana yakuti waŵe na ŵakumovwira nyengo zose, awo wangaŵasambizga kuti ŵalutilire na uteŵeti para iyo waluta.

Ntheura apo Yesu wakwenda mumphepete mwa nyanja ndipo wakuwona Simoni Petrosi na ŵanyake ŵakucapa mikwawu yawo, wakuluta kwa iwo. Wakukwera mu boti la Petrosi ndipo wakumupempha kuti wakanchizgire pataliko na mlima. Ŵati ŵafika pataliko na mlima, Yesu wakukhala mu boti ndipo wakwamba kusambizga mizinda iyo yimilira pa mlima.

Kufuma apo, Yesu wakuphalira Petrosi kuti: “Kanchizgira apo mphakunyang’amira, ndipo imwe mwaŵanthu ponyani mikwawu yinu kuti mukore somba.”

Petrosi wakuzgora kuti: “Msambizgi, taphyoka usiku wose kwambura kukorapo kanthu, kweni pakuti mwayowoya niponyenge mikwawu.”

Ŵati ŵaponya mikwawu yawo, ŵakukora somba zinandi comene mwakuti mikwawu yikwamba kupaluka. Mwaluŵiro, ŵakucema ŵanyawo awo ŵali mu boti linyake pafupi kuti ŵize kuzakaŵawovwira. Ndipo nyengo yeneyiyo maboti ghose ghakuzura na somba zinandi mwakuti ghakwamba kutitimira. Pakuwona ici, Petrosi wakujikama panthazi pa Yesu na kuyowoya kuti: “Fumaniko kwa ine, cifukwa ndine munthu wakwananga, Fumu.”

Yesu wakuzgora kuti: “Leka kopa. Kufuma sono ukolenge ŵanthu ŵamoyo.”

Yesu wakucemaso Andireya munung’una wa Petrosi. Wakuti kwa iwo: “Londezgani ine, ndipo nimuzgoraninge ŵalovi ŵa ŵanthu.” Ŵalovi ŵanyawo, Yakobe na Yohane, ŵana ŵa Zebediya, nawo ŵakucemeka ndipo ŵakumulondezga nyengo yeneyiyo. Ntheura ŵanayi aŵa ŵakuleka nchito yawo ya ulovi ndipo ŵakwamba kulondezga Yesu nyengo zose. Luka 5:1-11; Mateyu 4:13-22; Mariko 1:16-20; Yesaya 9:1, 2.

▪ Cifukwa wuli Yesu wakucema ŵasambiri ŵake kuti ŵamulondezge, ndipo iwo mbanjani?

▪ Kasi ni munthondwe wuli uwo wamofya Petrosi?

▪ Kasi ni ulovi wa mtundu wuli uwo Yesu wakukhumba kuti ŵasambiri ŵake ŵacitenge?