Cipaturo 67

Ŵatondeka Kumukaka

APO Ciphikiro ca Mahema cili mukati, ŵalongozgi ŵa cisopa ŵakutuma ŵalinda kuti ŵakakake Yesu. Kweni iyo wakubisama yayi. M’malo mwake, Yesu wakulutilira kusambizga pakweru, wakuti: “Nicali pamoza namwe kanyengo pambere nindalute kwa mweneuyo wakanituma. Muzamunipenja, kweni muzamunisanga cara, ndipo uko nizamuŵa mungizako cara.”

Ŵayuda ŵakupulikiska yayi, ntheura ŵakufumbana ŵekhaŵekha kuti: “Kasi munthu uyu wakukhumba kuya nkhu, ntheura kuti tizamumusanga cara? Panji kasi wakukhumba kuya ku Ŵayuda awo ŵali kumbininikira pakati pa Ŵagiriki na kusambizga Ŵagiriki? Kasi ghakung’anamuraci mazgu agha, gheneagho wayowoya kuti, ‘Muzamunipenja, kweni muzamunisanga cara, ndipo uko nizamuŵa mungizako cara’?” Kweni Yesu wakuyowoya za nyifwa yake iyo yili pafupi ndiposo kuwuka kuya kucanya, uko ŵalwani ŵake ŵangamulondezga yayi.

Zuŵa lacinkhondi na ciŵiri ilo ndaumaliro la ciphikiro, lafika. Mulenji uliwose pa ciphikiro, musofi wakuthira maji pasi, agho wakunegha pa Ciziŵa ca Siloamu, mwakuti ghakwenda mpaka kusi ku jochero. Yesu wakukumbuska ŵanthu za kaluso ka zuŵa na zuŵa aka, wakucemerezga kuti: “Usange munthu wali na nyota, wize kwa ine na kumwa. Uyo wakupulikana mwa ine, umo Malemba ghayowoyera, ‘Mukati nkhanira mwa iyo muzamufuma tumilonga twa maji ghamoyo.’”

Apa Yesu wakuyowoya za ivyo vizamucitika para mzimu utuŵa wazakapungulika. Cilimika cakulondezgapo, mzimu utuŵa uwu ukupungulika pa Pentekoste. Pa nyengo iyi, tumilonga twa maji ghamoyo tukwenda apo ŵasambiri 120 ŵakwamba kuteŵetera ŵanthu. Kweni pasono palije mzimu mu fundo yakuti palije yumoza wa ŵasambiri ŵa Khristu uyo wali kuphakazgika na mzimu utuŵa na kucemekera ku umoyo wakucanya.

Pakuyowoyapo pa ivyo Yesu wakusambizga, ŵanji ŵakwamba kuyowoya kuti: “Nadi, uyu ni Nchimi.” Ŵakwenera kuti ŵakuyowoya za nchimi yikuru kuluska Mozesi iyo yikalayizgika kuti yizenge. Ŵanji ŵakuti: “Uyu ni Khristu.” Kweni ŵanji ŵakususka kuti: “Khristu wangafuma mu Galileya yayi, ŵati? Asi Malemba ghakati Khristu wafumenge mu mphapu ya Davide, ndiposo wafumenge mu Betelehemu, muzi uwo Davide wakakhalangamo?”

Ntheura mzinda wagaŵikana. Ŵanji ŵakukhumba kuti Yesu wakakike, kweni palije uyo wakumukora. Ŵasilikari ŵati ŵawelera kwambura Yesu, ŵalara ŵa ŵasofi na Ŵafarisi ŵakuŵafumba kuti: “Cifukwa wuli mundize nayo?”

Ŵasilikari ŵakuzgora kuti: “Nanga ni kale, palije munthu uyo wali kuyowoyapo ntheura.”

Pakuzura na ukali, ŵalongozgi ŵa cisopa ŵakwamba kuŵagoska, kuŵayowoyera viheni, na kuŵanena. Ŵakuti: “Namwe mwapuluskika, ŵati? Palije nanga njumoza wa ŵawusi panji Ŵafarisi uyo wapulikana mwa iyo, walipo ngati? Kweni mzinda uwu wambura kumanya Dango mbanthu ŵakutembeka.”

Pakupulika nthena, Nikodemo, Mufarisi ndiposo muwusi wa Ŵayuda (ndiko kuti, yumoza wa Sanihedirini), wakucita cikanga kukhozgera Yesu. Mungakumbuka kuti vilimika viŵiri na hafu ivyo vyajumpha, Nikodemo wakiza kwa Yesu usiku ndipo wakalongora kuti wakupulikana mwa iyo. Sono Nikodemo wakuti: “Kasi dango lithu likweruzga munthu kwambura kuti lamupulika dankha na kumanya ico wakucita?”

Ŵafarisi ŵakukwiya comene pakuwona kuti yumoza wawo wakuvikilira Yesu. Ŵakuyowoya kuti: “Nawe uli wakufuma ku Galileya, ŵati? Penja ndipo uwone kuti palije nchimi yikwenera kuwuskika mu Galileya.”

Nangauli Malemba ghakuyowoya mwakudunjika yayi kuti nchimi yizamufuma mu Galileya, kweni ghakuyowoyapo kuti Khristu wazamufuma ku Galileya, ghakuti “ungweru ukuru” uzamuwoneka mu cigaŵa ici. Kweniso Yesu wakababikira mu Betelehemu, ndipo wakaŵa mphapu ya Davide. Nangauli Ŵafarisi ŵakumanya vyose ivi, ndiwo ŵakwenera kuti ŵakuthandazga nkhani zautesi izo ŵanthu ŵakughanaghanira Yesu. Yohane 7:32-52; Yesaya 9:1, 2; Mateyu 4:13-17.

▪ Nchivici ico cikucitika mulenji uliwose pa ciphikiro, ndipo kasi Yesu wakuŵakumbuska wuli ŵanthu za ici?

▪ Cifukwa wuli ŵasilikari ŵatondeka kukaka Yesu, ndipo ŵalongozgi ŵa cisopa ŵakucita wuli?

▪ Kasi Nikodemo ni njani, iyo wakughanaghana vici vya Yesu, ndipo Ŵafarisi ŵanyake ŵakucita nayo wuli?

▪ Kasi pali ukaboni wuli wakuti Khristu wafumenge mu Galileya?