Cipaturo 108

Ŵatondeka Kumusanga Kafukwa Yesu

CIFUKWA cakuti Yesu wasambizganga mu tempele ndipo waŵaphalira waka ŵalwani ŵake ŵa cisopa ntharika zitatu izo zikuvumbura uheni wawo, Ŵafarisi ŵakwiya ndipo ŵapangana kuti ŵamuthye Yesu kuti wayowoye cinthu cinyake ico ŵangamukakirapo. Ŵakunozga ciŵembu ndipo ŵakutuma ŵasambiri ŵawo pamoza na ŵakulondezga cipani ca Herode kuti ŵakamukore mu kayowoyero.

Ŵanthu aŵa ŵakuti: “Msambizgi, tikumanya kuti muli ŵakuneneska ndipo mukusambizga nthowa ya Ciuta mu unenesko, nakuti mukupwelerako vya munthu cara, cifukwa kuti mukulaŵiska mawonekero ghakuwaro gha ŵanthu cara. Ntheura, mutiphalire, Kasi mukughanaghana wuli? Kasi nchakuzomerezgeka kupeleka msonkho kwa Kesare panji yayi?”

Yesu wakupusikika yayi na malumbo ghawo. Wakumanya kuti usange wangayowoya kuti, ‘Nchambura kuzomerezgeka kupeleka msonkho uwu,’ waŵenge na mulandu wa kuwukira boma la Ŵaroma. Kweni usange wangati, ‘Enya, mupelekenge msonkho,’ Ŵayuda, awo ŵakukhumba yayi kuŵa pasi pa Romu, ŵamutinkhenge. Ntheura wakuzgora kuti: “Cifukwa wuli mukuniyezga, imwe ŵapusikizgi? Nilongorani ndalama ya msonkho.”

Ŵati ŵamupa yimoza, iyo wakufumba kuti: “Kasi cikozgo na zina ili ni vya njani?”

Ŵakuzgora kuti: “Vya Kesare.”

“Ipo wezgerani vinthu vya Kesare kwa Kesare, kweni vinthu vya Ciuta kwa Ciuta.” Sono ŵanthu aŵa ŵati ŵapulika umo Yesu wazgolera mwaluso, ŵakuzizwa. Ndipo ŵakufumapo na kumuleka waka.

Pakuwona kuti Ŵafarisi ŵatondeka kumusanga kafukwa Yesu, Ŵasaduki awo ŵakuti kulije ciwuka ŵakwiza na kumufumba kuti: “Msambizgi, Mozesi wakati, ‘Usange munthu wafwa kwambura kuŵa na ŵana, mwana munyake watore muwoli wake ndipo wamuwuskire mphapu mwana munyake yura.’ Sono tikaŵa na ŵanyamata ŵankhondi na ŵaŵiri ŵa nyumba yimoza; ndipo wakwamba wakatora ndipo wakapotera, ndipo kwambura kuŵa na mphapu, muwoli wake wakalekera mwana munyake. Ndimo vikacitikiraso na waciŵiri ndiposo wacitatu, mpaka wose ŵankhondi na ŵaŵiri ŵakamara. Paumaliro wa wose, mwanakazi wakafwa. Ntheura, pa ciwuka, kasi wazamuŵa muwoli wa njani pa ŵankhondi na ŵaŵiri aŵa? Pakuti wose ŵakamutora.”

Pakuzgora, Yesu wakuti: “Asi ndico cifukwa mukupuvya, mukughamanya Malemba cara panji nkhongono ya Ciuta? Cifukwa para ŵakuwuka ku ŵakufwa, ŵanalume ŵakutora cara nesi ŵanakazi kutengwa, kweni ŵali nga mbangelo kucanya. Kweni pa nkhani ya ŵakufwa, kuti ŵakuwuskika, kasi mundaŵazge mu buku la Mozesi, mu nkhani yakuyowoya vya civwati, umo Ciuta wakayowoyera kwa iyo, ‘Ndine Ciuta wa Abrahamu na Ciuta wa Yisake na Ciuta wa Yakobe’? Iyo ni Ciuta, wa ŵakufwa cara, kweni wa ŵamoyo. Mukupuvya comene.”

Mizinda yikuzizikikaso na zgoro la Yesu. Nanga mbalembi ŵanji ŵakuzomerezga kuti: “Msambizgi, mwayowoya makora.”

Ŵafarisi ŵati ŵawona kuti Yesu wacetamiska Ŵasaduki, ŵakwiza wose pamoza. Kuti wamuyezgeso, yumoza wa ŵalembi wakufumba kuti: “Msambizgi, kasi languro likuru comene mu Dango ni ndi?”

Yesu wakuzgora kuti: “Lakwamba ndakuti, ‘Pulika, iwe Israyeli, Yehova Ciuta withu ni Yehova yumoza, ndipo utemwenge Yehova Ciuta wako na mtima wako wose na umoyo wako wose na maghanoghano ghako ghose na nkhongono zako zose.’ Laciŵiri ni ili, ‘Utemwenge mzengezgani wako umo ukujitemwera wamwene.’ Palije dango linyake likuru kuluska agha.” Nakuti Yesu wakusazgirapo kuti: “Pa malango ghaŵiri agha ndipo pajintha Dango lose na Zinchimi.”

Mulembi uyu wakuzomerezga kuti: “Msambizgi, mwayowoya makora mwakuyana na unenesko, ‘Iyo Njumoza, ndipo kulije munyake padera pa Iyo’; ndipo kumutemwa uku na mtima wako wose na kupulikiska kwako kose na nkhongono zako zose kweniso kutemwa mzengezgani wako umo ukujitemwera wamwene nkhwakuzirwa comene kuluska vyakupeleka vyamsuma vyose vyakocha na zisembe.”

Pakumanya kuti mulembi wazgora mwamahara, Yesu wakumuphalira kuti: “Uli kutali cara na ufumu wa Ciuta.”

Sono mazuŵa ghatatu ghakwana, kwambira pa Sabata, Mande mpaka Ciŵiri, Yesu wakusambizga mu tempele. Ŵanthu ŵategherezga mwakukondwa, kweni ŵalongozgi ŵa cisopa ŵakukhumba kumukoma. Ndipouli, kuzakafika apa, nthowa zawo zose zatondeka. Mateyu 22:15-40; Mariko 12:13-34; Luka 20:20-40.

▪ Kasi Ŵafarisi ŵakunozga ciŵembu wuli kuti ŵakore Yesu, ndipo nchivici cingacitika usange wangazgora kuti enya panji yayi?

▪ Kasi Yesu wakutonda wuli Ŵasaduki apo ŵakukhumba kumusanga kafukwa?

▪ Kasi Ŵafarisi ŵakuyezgaso wuli kuyezga Yesu, ndipo cikucitika nchivici?

▪ Apo Yesu wakuteŵetera kaumaliro mu Yerusalemu, kasi wakusambizga mazuŵa ghalinga mu tempele, ndipo cikucitika nchivici?