Cipaturo 106

Ŵavumbukwa Kwizira mu Ntharika ya Munda wa Mpheska

YESU wali pa tempele. Watindika waka ŵalongozgi ŵa cisopa awo ŵakhumbanga kumanya za mazaza agho wakucitira vinthu. Apo ŵacali kutindikika, Yesu wakufumba kuti: “Imwe mukughanaghana wuli?” Ndipo kwizira mu ntharika, wakuvumbura umo iwo ŵaliri.

Yesu wakulongosora kuti: “Munthu wakaŵa na ŵana ŵaŵiri. Wakaluta ku wakwamba, wakati, ‘Wamwana, luta ukagwire nchito muhanya uno mu munda wa mpheska.’ Pakuzgora iyo uyu wakati, ‘Nilutenge dada,’ kweni wakaluta cara. Wakiza ku waciŵiri, wakayowoya mwakuyana waka. Pakuzgora iyo uyu wakati, ‘Niyengeko cara.’ Pamanyuma wakajinyumwa ndipo wakaluta.” Yesu wakuŵafumba kuti: “Pa ŵaŵiri aŵa, ni nju uyo wakacita khumbo la ŵawiske?”

Ŵalwani ŵake ŵakuzgora kuti: “Waciŵiri.”

Ntheura Yesu wakulongosora kuti: “Nadi pano nkhumuphalirani kuti ŵakusonkheska msonkho na ŵanakazi ŵazaghali ŵakumudangilirani kunjira mu ufumu wa Ciuta.” Vili nga ni para ŵakusonkheska msonkho na ŵanakazi ŵazaghali pakwamba ŵakakana kuteŵetera Ciuta. Kweni nga ni mwana waciŵiri, ŵakajinyumwa ndipo ŵakamba kumuteŵetera. Ndipouli, ŵalongozgi ŵa cisopa, nga ni mwana wakwamba, ŵakatenge ŵakuteŵetera Ciuta, kweni Yesu wakuyowoya kuti: “Yohane [Mbapatizi] wakiza kwa imwe mu nthowa ya urunji, kweni imwe mukamugomezga cara. Ndipouli, ŵakusonkheska msonkho na ŵanakazi ŵazaghali ŵakamugomezga, ndipo imwe, nangauli mukawona ici, pamanyuma mukajinyumwa cara mwakuti mumugomezge.”

Kufuma apo, Yesu wakulongora kuti ŵalongozgi ŵa cisopa ŵakutondeka waka kuteŵetera Ciuta cara. Kweni mbaheni, ŵanthu ŵabendezi. Yesu wakulongosora kuti: “Kukaŵa munthu, mwenenyumba, uyo wakapanda munda wa mpheska na kuzenga cipanga zingilizge ndipo wakajima cakukamiramo mpheska mwenemumo na kuzenga cigongwe, ndipo wakalekera ŵalimi, ndipo wakaluta ku caru cinyake. Nyengo ya vipambi yikati yakwana, wakatuma ŵazga ŵake ku ŵalimi ŵara kuti ŵakatore vipambi vyake. Ndipouli, ŵalimi ŵakatora ŵazga ŵake, ndipo yumoza ŵakamutimba, munyake ŵakamukoma, munyake ŵakamuswa na malibwe. Wakatumaso ŵazga ŵanyake, ŵanandi kuluska ŵakwamba, kweni aŵa ŵakaŵacitiraso vyakuyana waka.”

“Ŵazga” ni nchimi izo “mwenenyumba,” Yehova Ciuta, wakazituma ku “ŵalimi” ŵa ‘munda wake wa mpheska.’ Ŵalimi aŵa mbalongozgi ŵa mtundu wa Israyeli, mtundu uwo Baibolo likuti ni “munda wa mpheska” wa Ciuta.

Pakuti “ŵalimi” ŵakuyuzga na kukoma “ŵazga,” Yesu wakulongosora kuti: “Paumaliro, [mweneco wa munda wa mpheska] wakatuma mwana wake kwa iwo, wakati, ‘Ŵamumucindika mwana wane.’ Pakuwona mwana, ŵalimi ŵara ŵakayowoyeskana pakati pawo, ‘Uyu ndiyo ni muhaliri; zaninge, tiyeni timukome ndipo tipoke ciharo cake!’ Ntheura ŵakamutora na kumutaya kuwaro kwa munda wa mpheska na kumukoma.”

Sono pakuyowoya na ŵalongozgi ŵa cisopa, Yesu wakufumba kuti: “Para mweneko wa munda wa mpheska wiza, kasi wazamucitaci na ŵalimi aŵa?”

Ŵalongozgi ŵa cisopa ŵakuzgora kuti: “Cifukwa cakuti mbaheni, wazamwiza na pharanyiko liheni pa iwo ndipo munda wa mpheska wazamulekera ŵalimi ŵanyake, awo ŵazamumupa vipambi para nyengo yake yakwana.”

Ntheura iwo ŵakujeruzga ŵekha kwambura kumanya, pakuti nawo Mbaisrayeli ŵamoza ŵa “ŵalimi” ŵa “munda wa mpheska” wa Yehova, uwo ni mtundu wa Israyeli. Vipambi ivyo Yehova wakukhazga ku ŵalimi aŵa nchipulikano mu Mwana wake, Mesiya mweneco. Cifukwa ca kutondeka kupambika cipambi ici, Yesu wakucenjezga kuti: “Kasi mundaŵazgepo mu Malemba [pa Salmo 118:22, 23] kuti, ‘Libwe ilo ŵakuzenga ŵakalikana ndilo lazgoka libwe lakuzirwa la pa cingodya. Ici cafuma kwa Yehova, ndipo nchakuzizwiska mu maso ghithu’? Ndico cifukwa nkhumuphalirani kuti, Ufumu wa Ciuta utolekengeko kwa imwe ndipo upelekekenge ku mtundu wakupambika vipambi vyake. Kweniso munthu uyo wakuwa pa libwe ili watekenyukenge. Ndipo waliyose uyo lamuwira, limutikinyurenge.”

Sono ŵalembi na ŵalara ŵa ŵasofi ŵamanya kuti Yesu wakunena iwo, ndipo ŵakukhumba kumukoma, “muhaliri” mweneco. Ntheura mwaŵi wa kuŵa ŵawusi mu Ufumu wa Ciuta utolekengeko kwa iwo nga ni mtundu, ndipo mtundu uphya wa ‘ŵalimi ŵa munda wa mpheska’ upangikenge, uwo upambikenge vipambi vyakwenelera.

Cifukwa cakuti ŵalongozgi ŵa cisopa ŵakopa mizinda, iyo yikuwona Yesu kuŵa nchimi, ŵakukhumba cara kuti ŵamukome pa nyengo iyi. Mateyu 21:28-46; Mariko 12:1-12; Luka 20:9-19; Yesaya 5:1-7.

▪ Kasi mu ntharika yakwamba ya Yesu ŵana ŵakwimira njani?

▪ Mu ntharika yaciŵiri, “mwenenyumba,” “munda wa mpheska,” “ŵalimi,” “ŵazga,” ndiposo “muhaliri,” vikwimira ŵanjani?

▪ Nchivici cicitikirenge ‘ŵalimi ŵa munda wa mpheska,’ ndipo mbanjani awo ŵanjirenge mu malo ghawo?