Cipaturo 24

Cifukwa Ico Yesu Wakizira pa Caru Capasi

YESU na ŵasambiri ŵake ŵanayi ŵakatangwanika comene mayiro mu Kaperenaumu. Ŵanthu ŵa mu Kaperenaumu ŵakiza na ŵalwari ŵawo wose kuti waŵacizge nyengo ya mise. Wakaŵavya nyengo yakuti waŵire payekha.

Sono ni mulenji wa zuŵa lakulondezgapo. Yesu wawuka na kuya kuwaro kwayekha, uku kucali usiku. Wakuluta ku malo gha yii uko wamulomba ku Ŵawiske. Kweni Yesu wakukhala yekha nyengo yitali yayi cifukwa Petrosi na ŵanji ŵati ŵamanya kuti Yesu palije, ŵakwamba kumupenja.

Ŵati ŵamusanga, Petrosi wakuti: “Wose ŵakumupenjani.” Ŵanthu ŵa mu Kaperenaumu ŵakukhumba kuti Yesu wakhalenge nawo. Ŵakuwonga comene ivyo waŵacitira. Kweni kasi Yesu wakiza pa caru capasi kuzakacizga waka mwamunthondwe? Kasi iyo wakuti wuli pa nkhani iyi?

Mwakuyana na nkhani yimoza ya mu Baibolo, Yesu wakuzgora ŵasambiri ŵake kuti: “Tiyeni tilute kunyake, mu vikaya vya pafupi, kuti nkhapharazge na kura wuwo, cifukwa ndico nkhizira.” Nangauli ŵanthu ŵakumuciska kuti wakhale, Yesu wakuŵaphalira kuti: “Ku misumba yinyake nako nkhwenera kupharazga makani ghawemi gha ufumu wa Ciuta, pakuti ndico nkhatumikira.”

Enya, Yesu wakiza pa caru capasi, comene kuzakapharazga vya Ufumu wa Ciuta, uwo uzamutuŵiska zina la Ŵawiske na kumazgirathu masuzgo ghose gha ŵanthu. Ndipouli, kuti walongore kuti wali kutumika na Ciuta, Yesu wakucizga ŵanthu mwamunthondwe. Kale, Mozesi nayo wakacitanga minthondwe kuti walongore kuti wakaŵa muteŵeti wa Ciuta.

Sono apo Yesu wakufumamo mu Kaperenaumu kukapharazga mu misumba yinyake, ŵasambiri ŵake ŵanayi ŵakuluta nayo. Ŵasambiri ŵanayi aŵa ni Petrosi na munung’una wake Andireya, ndiposo Yohane na mukuru wake Yakobe. Mungakumbuka kuti pajumpha sabata yimoza, kufuma apo Yesu wakaŵacemera aŵa kuŵa ŵanchito ŵanyake ŵakwambilira.

Upharazgi wa Yesu mu Galileya pamoza na ŵasambiri ŵake ŵanayi ukwenda makora comene. Nakuti malumbiri gha ivyo Yesu wakucita ghakuthandazgika mpaka mu Siriya mose. Mizinda yikuru kufuma mu Galileya, Yudeya, ndiposo sirya linyake la Mlonga wa Yorodani yikulondezga Yesu na ŵasambiri ŵake. Mariko 1:35-39; Luka 4:42, 43; Mateyu 4:23-25; Exodus 4:1-9, 30, 31.

▪ Kasi cikucitika nchivici mulenji wakuti mayiro ghake Yesu wakatangwanika comene mu Kaperenaumu?

▪ Cifukwa wuli Yesu wakatumika pa caru capasi, ndipo cifukwa wuli wakucita minthondwe?

▪ Kasi mbanjani ŵakuluta na Yesu apo wakukapharazga mu Galileya, ndipo ŵanthu ŵakucita wuli pakuwona ivyo Yesu wakucita?