Cipaturo 90

Cigomezgo ca Ciwuka

PAUMALIRO, Yesu wakufika kuwaro kwa Betaniya, muzi uwo uli pa mtunda wa makilomita ghatatu kufuma ku Yerusalemu. Pajumpha mazuŵa ghacoko waka kufuma apo Lazaro wakafwira na kusungika. Ŵadumbu ŵake, Mariya na Marita ŵacali kulira, ndipo ŵanthu ŵanandi ŵiza kuzakaŵapembuzga.

Apo ŵakulira, munthu munyake wakuphalira Marita kuti Yesu wali mu nthowa. Ntheura wakufuma na kucimbilira kwa iyo, kwambura kuphalira munung’una wake. Wati wiza kwa Yesu, Marita wakuwerezgapo ivyo iyo na munung’una wake ŵakwenera kuti ŵayowoya kanandi waka mazuŵa ghanayi agho ghajumpha, wakuti: “Fumu, muŵenge kuno mphanyi mudumbu wane wali kufwa cara.”

Ndipouli, Marita wakulongora kuti wali na cigomezgo, wakuyowoya mazgu agho ghakulongora kuti Yesu wangacitapo kanthu pa mudumbu wake. Wakuti: “Nkhumanya kuti vinthu vyose ivyo mulombenge kwa Ciuta, Ciuta wamupaninge.”

Yesu wakumulayizga kuti: “Mudumbu wako wawukenge.”

Marita wakughanaghana kuti Yesu wakuyowoya za ciwuka ca munthazi ico Abrahamu na ŵateŵeti ŵanyake ŵa Ciuta ŵakalindiliranga. Ntheura wakuti: “Nkhumanya kuti wazamuwuka pa ciwuka mu zuŵa laumaliro.”

Ndipouli, Yesu wakuyowoya ivyo vicitikenge sono, wakuti: “Ndine ciwuka na umoyo.” Wakukumbuska Marita kuti Ciuta wali kumupa nkhongono pa nyifwa, wakuti “Uyo wakupulikana mwa ine, nanga wafwe, waŵenge wamoyo; ndipo waliyose uyo ngwamoyo ndipo wakupulikana mwa ine wafwenge cara napacoko.”

Apa Yesu wakuphalira Marita kuti ŵakugomezgeka awo ŵakaŵa ŵamoyo nyengo yira ŵalekenge kufwa yayi. Kweni fundo njakuti para munthu wali na cipulikano mwa iyo, wazamusanga umoyo wamuyirayira. Ŵanthu ŵanandi ŵazamusangwa na umoyo uwu para ŵazakawuskika ku ŵakufwa pa zuŵa laumaliro. Kweni ŵanji awo mbakugomezgeka ŵazamupona umaliro wa mgonezi uwu pa caru capasi, ndipo mazgu gha Yesu ghakuti ŵafwenge yayi ghazamufiskika nadi kwa iwo. Ŵazamufwa cara napacoko! Yesu wati wayowoya fundo yakuzirwa iyi, wakufumba Marita kuti: “Kasi ukugomezga ici?”

Iyo wakuzgora kuti: “Enya, Fumu; nkhugomezga kuti ndimwe Khristu Mwana wa Ciuta, Uyo wakwiza mu caru.”

Ndipo Marita wakucimbira luŵiro kukacema munung’una wake Mariya, wakumuphalira payekha kuti: “Msambizgi wali papano ndipo wakukucema.” Penepapo Mariya wakufumapo pa nyumba. Ŵanji ŵati ŵamuwona kuti wakuluta, ŵakumulondezga, pakughanaghana kuti wakuluta ku dindi.

Wati wiza kwa Yesu, Mariya wakumujikamira uku wakulira. Wakuti: “Fumu, muŵenge kuno, mphanyi mudumbu wane wali kufwa cara.” Yesu citima cikumukora apo wakuwona kuti Mariya na mzinda wa ŵanthu awo ŵakumulondezga ŵakulira. Wakuŵafumba kuti: “Kasi mwamuŵika nkhu?”

Ŵakumuzgora kuti: “Fumu, zani muwone.”

Yesu nayo wakuthiska masozi, ico cikupangiska Ŵayuda kuyowoya kuti: “Wonani, umo wakamutemweranga!”

Ŵanji ŵakukumbuka kuti myezi yicoko waka iyo yajumpha, pa Ciphikiro ca Mahema, Yesu wakacizga munyamata uyo wakababika wacibulumutira ndipo ŵakufumba kuti: “Kasi munthu uyu, mweneuyo wakajura maso gha munthu wacibulumutira, wangutondeka kukanizga kuti iyo uyu wafwe?” Yohane 5:21; 6:40; 9:1-7; 11:17-37.

▪ Kasi mphawuli apo Yesu wakufika kufupi na Betaniya, ndipo vinthu vili wuli kura?

▪ Nchivici ico cikupangiska Marita kuŵa na cigomezgo mu ciwuka?

▪ Kasi Yesu wakukhwaskika wuli na nyifwa ya Lazaro?