Cipaturo 54

“Cingwa Canadi Cakufuma Kucanya”

ZUŴA ilo lajumpha Yesu wakacita vinthu vinandi comene. Iyo wakalyeska ŵanthu vikwi vinandi mwamunthondwe ndipo wakagwentha ŵanthu apo ŵakakhumbanga kumukora uthemba. Usiku uwu wakenda pa Nyanja ya Galileya apo pakaŵa cimphupulu; wakathaska Petrosi, uyo wakamba kubira apo wakendanga pa maji; ndipo wakacetamiska majigha kuponoska ŵasambiri ŵake kuti ŵaleke kubira.

Sono ŵanthu awo Yesu wakaŵalyeska kumpoto ca kuvuma kwa Nyanja ya Galileya, ŵamusanga kufupi na Kaperenaumu ndipo ŵakumufumba kuti: “Kasi mwiza pawuli kuno?” Pakuŵacenya, Yesu wakuŵaphalira kuti ŵakumupenja cifukwa ŵakughanaghana kuti waŵapengeso cakurya cinyake cawaka. Wakuŵaciska kuti ŵagwire nchito kuti ŵasange cakurya ico cikuvunda cara, kweni cakurya ico cikukhalilira kupeleka umoyo wamuyirayira. Ntheura ŵanthu ŵakufumba kuti: “Kasi ticiteci mwakuti ticite milimo ya Ciuta?”

Yesu wakuzunura mulimo umoza uwo ngwakuzirwa comene. Wakulongosora kuti: “Uwu ni mulimo wa Ciuta, kuti mupulikane mwa mweneuyo Iyo yura wakamutuma.”

Ndipouli, ŵanthu ŵakupulikana mwa Yesu yayi, nangauli wacita minthondwe yinandi comene. Cakuzizika nchakuti, nangauli Yesu wacita minthondwe yinandi, ŵakufumba nipera kuti: “Kasi mucitenge vici nga nchimanyikwiro, mwakuti ise ticiwone na kumugomezgani? Kasi mucitenge mulimo wuli? Ŵasekuru ŵithu ŵakarya mana mu mapopa, umo vili kulembekera kuti, ‘Wakaŵapa cingwa cakufuma kucanya kuti ŵarye.’”

Pakuzgora pempho lawo lakuti ŵawone cimanyikwiro, Yesu wakuŵaphalira pakweru uko kukufuma vinthu vyaminthondwe, wakuti: “Mozesi wakamupani cingwa cara kufuma kucanya, kweni Ŵadada ŵakumupani cingwa canadi cakufuma kucanya. Pakuti cingwa ca Ciuta ni mweneuyo wakukhira kufuma kucanya ndipo wakupeleka umoyo ku caru.”

Ŵanthu ŵakuti: “Fumu, tipani cingwa ici nyengo zose.”

Yesu wakulongosora kuti: “Ndine cingwa ca umoyo. Uyo wakwiza kwa ine wazamuŵa na njara cara nanga mphacoko, ndipo uyo wakupulikana mwa ine wazamuŵaso na nyota cara nanga mphacoko. Kweni namuphalirani kuti, imwe mwaniwona, ndipouli, mukunigomezga cara. Cilicose ico Ŵadada ŵakunipa cizenge kwa ine, ndipo uyo wakwiza kwa ine nizamumucimbizga cara nanga mphacoko; cifukwa nili kukhira kufuma kucanya, kuzakacita khumbo lane cara, kweni khumbo la uyo wakanituma. Ili ni khumbo la uyo wakanituma, kuti nileke kutayapo nanga njumoza pa wose awo wanipa, kweni kuti nizakaŵawuske wose pa zuŵa laumaliro. Pakuti ili ndilo ni khumbo la Ŵadada, kuti waliyose uyo wakuwona Mwana na kupulikana mwa iyo waŵe na umoyo wamuyirayira.”

Pakupulika ici, Ŵayuda ŵakwamba kunyunyutira Yesu cifukwa wayowoya kuti: “Ndine cingwa ico cili kukhira kufuma kucanya.” Ŵakuwona Yesu nga ni mwana wa munthu bweka, ndipo nga umo ŵakacitira ŵanthu ŵa ku Nazarete, iwo ŵakususka, ŵakuti: “Asi ni Yesu uyu, mwana wa Yosefe, uyo ŵawiske na ŵanyina tikuŵamanya? Vyaŵa wuli apa sono wakuti, ‘Nili kukhira kufuma kucanya’?”

Yesu wakuti: “Lekani kunyunyuta pakati pinu. Palije munthu uyo wangiza kwa ine kwambura kuti Ŵadada, awo ŵakanituma, ŵamuguza; ndipo nizamumuwuska mu zuŵa laumaliro. Kuli kulembeka mu mabuku gha Zinchimi kuti, ‘Ndipo wose ŵazamusambizgika na Yehova.’ Waliyose uyo wapulika ku Ŵadada ndipo wasambira, wakwiza kwa ine. Palije munthu wali kuwonapo Ŵadada, kweni yekha uyo ngwakufuma kwa Ciuta; iyo uyu wali kuŵawona Ŵadada. Nadi, nadi nkhumuphalirani, Uyo wakugomezga wali na umoyo wamuyirayira.”

Pakulutilira kuyowoya, Yesu wakuwerezgapo kuti: “Ine ndine cingwa ca umoyo. Ŵasekuru ŵinu ŵakarya mana mu mapopa, ndipouli, ŵakafwa. Ici nchingwa ico cikukhira kufuma kucanya, ntheura kuti waliyose waryeko ndipo wangafwanga cara. Ndine cingwa ca umoyo ico cikakhira kufuma kucanya; usange munthu wakuryako cingwa ici, wazamuŵa wamoyo muyirayira.” Enya, mwa kuŵa na cipulikano mwa Yesu, uyo wakatumika na Ciuta, ŵanthu ŵangaŵa na umoyo wamuyirayira. Mana, panji cakurya cinyake cilicose cingapeleka yayi umoyo uwu.

Cidumbirano ca cingwa cakufuma kucanya cikwenera kuti cangwamba nyengo yicoko waka ŵanthu ŵati ŵamusanga Yesu pafupi na Kaperenaumu. Kweni cikulutilira, cikufika peneko apo Yesu wakusambizga mu sunagoge mu Kaperenaumu. Yohane 6:25-51, 59; Salmo 78:24; Yesaya 54:13; Mateyu 13:55-57.

▪ Nchivici cikucitika pambere Yesu wandambe kudumbirana na ŵanthu za cingwa cakufuma kucanya?

▪ Pakuwona ivyo Yesu wacita, cifukwa wuli pempho la ŵanthu lakuti ŵawone cimanyikwiro ndambura kwenelera?

▪ Cifukwa wuli Ŵayuda ŵakunyunyuta apo Yesu wayowoya kuti ni cingwa canadi cakufuma kucanya?

▪ Kasi cidumbirano ca cingwa cakufuma kucanya cikucitikira nkhu?