Cipaturo 36

Cipulikano Cikuru ca Mulara wa Ŵasilikari

PA NYENGO iyo wakuyowoyera Nkhani yake ya pa Lupiri, Yesu wali pakatikati pa uteŵeti uwo wakucita pa caru capasi. Ici cikung’anamura kuti wakhala na cilimika cimoza na myezi yinkhondi na yinayi kuti wamalizge mulimo wake pa caru capasi.

Sono Yesu wakunjira mu msumba wa Kaperenaumu, cikaya ico wacitako vinthu vinandi. Uku, ŵanalume ŵalara ŵa Ŵayuda ŵakwiza kwa iyo na pempho. Ŵatumika na mulara wa ŵasilikari ŵa Ŵaroma, uyo ni Muyuda yayi.

Mulara wa ŵasilikari uyu wali na muteŵeti wakutemweka uyo ni mulwari comene, wali pafupi kufwa, ndipo iyo wakukhumba kuti Yesu wamucizge. Ŵayuda aŵa ŵakuŵeyelera Yesu m’malo mwa msilikari, ŵakuti: “Ngwakwenera kuti mumovwire, cifukwa wakutemwa mtundu withu ndipo iyomwene wali kutizengera sunagoge.”

Mwambura kucedwa, Yesu wakunyamuka nawo. Ndipouli, apo ŵakusendelera kufupi na nyumba yake, mulara wa ŵasilikari wakutuma ŵabwezi ŵake kukayowoya kuti: “Dada, mungasuzgikanga cara, pakuti nili wakwenelera cara kuti imwe mwize kusi ku mtenje wane. Pa cifukwa ici, nkhajiwona namwene kuŵa wambura kwenelera kwiza kwa imwe.”

Msilikari uyu, uyo wazgoŵera kulangura ŵanji kucita vinthu, walongora kujiyuyura kukuru comene. Kweniso wakwenera kuti wakughanaghanira Yesu, pakumanya kuti pali kaluso ako kakukanizga Ŵayuda kucita vinthu na ŵanthu awo Mbayuda yayi. Nanga ni Petrosi wakayowoya kuti: “Mukumanya makora kuti nchambura kuzomerezgeka kwa Muyuda kujibatika iyomwene panji kusendelera kwa munthu wa mtundu unyake.”

Panyake cifukwa cakuti wakukhumba yayi kuti Yesu wasange suzgo cifukwa ca kuleka kulondezga kaluso aka, mulara wa ŵasilikari waphalira ŵabwezi ŵake kuti ŵapemphe Yesu kuti: “Yowoyani waka mazgu, ndipo muteŵeti wane wacizgike. Pakuti nane nili munthu wakuŵikika pasi pa mazaza, nili na ŵasilikari pasi pane, ndipo nkhuti kwa yumoza, ‘Lutanga!’ ndipo wakuluta, ndiposo kwa munyake, ‘Zanga!’ ndipo wakwiza, na kwa muzga wane, ‘Cita ici!’ ndipo wakucita.”

Yesu wati wapulika ivi, wakuzizwa. Iyo wakuti: “Nkhumuphalirani unenesko, Palije na yumoza mu Israyeli uyo namusanga na cipulikano cikuru ntheura.” Wati wacizga muteŵeti wa mulara wa ŵasilikari, Yesu wakulongosora umo ŵanthu ŵa mitundu yinyake awo ŵali na cipulikano ŵazamutumbikikira kuluska Ŵayuda ŵambura cipulikano.

Yesu wakuti: “Ŵanandi kufuma ku vigaŵa vyakuvuma na vigaŵa vyakuzambwe ŵazamwiza na kukhala pa thebulu pamoza na Abrahamu na Yisake na Yakobe mu ufumu wa kucanya; peneapo ŵana ŵa ufumu ŵazamuponyeka kuwaro ku cisi. Kwenekura ndiko kuzamuŵa kulira na kuska mino ghawo.”

‘Ŵana ŵa ufumu awo ŵazamuponyeka kuwaro ku cisi,’ Mbayuda awo ŵakuzomera yayi mwaŵi uwo ŵapika wakuti ŵakawuse na Khristu. Abrahamu, Yisake, na Yakobe ŵakwimira ndondomeko iyo yanozgeka ya Ufumu wa Ciuta. Ntheura Yesu wakuyowoya umo ŵanthu ŵa mitundu yinyake ŵazamupokelelekera pa thebulu la kucanya, panji kuti “mu ufumu wa kucanya.” Luka 7:1-10; Mateyu 8:5-13; Milimo 10:28.

▪ Cifukwa wuli Ŵayuda ndiwo ŵiza kuzakaŵeyelera Yesu m’malo mwa mulara wa ŵasilikari uyo ni Muyuda yayi?

▪ Kasi cingaŵa cifukwa wuli ico mulara wa ŵasilikari watondekera kucema Yesu kuti wanjire mu nyumba yake?

▪ Kasi mazgu ghaumaliro agho Yesu wayowoya ghakung’anamuraci?