Cipaturo 75

Ico Cikupangiska Munthu Kuŵa Wakukondwa

MU UTEŴETI wake wa ku Galileya, Yesu wakacita minthondwe, ndipo sono wakucitaso mu Yudeya. Mwaciyelezgero, wakufumya ciŵanda mwa munthu, ico camutondeskanga kuyowoya. Mizinda yikuzizwa, kweni ŵakususka ŵacali kwimikana nayo nga umo ŵakacitira mu Galileya. Ŵakuti: “Wakufumiska viŵanda na Belezebule muwusi wa viŵanda.” Ŵanji ŵakukhumba ukaboni wakusazgikira kufuma kwa Yesu, ndipo ŵakupempha cimanyikwiro cakufuma kucanya kuti ŵamuyezge.

Pakumanya maghanoghano ghawo, Yesu wakuzgora awo ŵakumususka mu Yudeya nga umo wakazgolera ŵa mu Galileya. Wakuyowoya kuti ufumu uliwose uwo wagaŵikana uwenge. Iyo wakufumba kuti: “Ntheura usange Satana nayo wakujiwukira yekha, ufumu wake wimenge wuli?” Wakulongora kuti awo ŵakumususka ŵali pangozi, apo wakuyowoya kuti: “Usange nkhufumiska viŵanda na munwe wa Ciuta, ipo ufumu wa Ciuta wiza pa imwe mwakubucizga.”

Awo ŵakuwona minthondwe iyo Yesu wakucita ŵakwenera kucita nga umo ŵakacitira ŵanthu ŵakale awo ŵakawona Mozesi wakucita minthondwe. Iwo ŵakacemerezga kuti: “Uwu ndi munwe wa Ciuta!” Ukaŵaso “munwe wa Ciuta” uwo ukalemba Malango Khumi pa viphapha vya malibwe. Ndipo “munwe wa Ciuta,” uwo ni mzimu wake utuŵa panji nkhongono yakugwira nchito, ndiwo ukovwira Yesu kufumya viŵanda na kucizga ŵalwari. Ntheura Ufumu wa Ciuta waŵizira nadi mwakubucizga ŵanthu aŵa, awo ŵakumususka, pakuti Yesu, uyo ni Themba lakusoleka la Ufumu, wali pakati pawo.

Ndipo Yesu wakuyowoya ntharika yakulongora kuti kufumya viŵanda mbukaboni wakuti wali na nkhongono pa Satana, nga umo munthu wankhongono comene wakwizira na kuthereska munthu uyo wali na vilwero, mweneuyo wakulinda nyumba yake. Wakuwerezgapo ntharika iyo wakayowoya mu Galileya ya mzimu waukazuzi. Mzimu uwu ukufuma mwa munthu, kweni usange munthu uyu wakuzuzgamo yayi vinthu viwemi mwa iyo, mzimu uwu ukwizaso pamoza na yinyake yinkhondi na yiŵiri, ndipo munthu uyu wakuŵa muheni comene kuluska umo wakaŵira pakwamba.

Apo ŵanthu ŵakupulikizga visambizgo ivi, mwanakazi yunji mu mzinda wakucemerezga kuti: “Wakukondwa ni mwanakazi uyo nthumbo yake yikayegha imwe na maŵere agho mukawonkha!” Nchakupulikikwa kuti mwanakazi uyu wayowoye nthena, pakuti khumbo la mwanakazi waliyose Muyuda ndakuti waŵe mama wa nchimi, comenecomene Mesiya. Panji mama uyu waghanaghananga kuti Mariya wakwenera kuŵa wakukondwa comene cifukwa ca kuŵa nyina wa Yesu.

Ndipouli, Yesu wakumusambizga mama uyu ico cikupangiska nadi munthu kuŵa wakukondwa. Wakuzgora kuti: “Cara, kweni ŵakukondwa mbeneawo ŵakupulika mazgu gha Ciuta na kughasungilira!” Yesu wandayowoyepo kuti Mariya, nyina wake, wapike nchindi zapadera. M’malo mwake, wakalongora kuti munthu wakuŵa wakukondwa nadi para wakuteŵetera Ciuta mwakugomezgeka, kuti cifukwa ca ubali panji ivyo wacita yayi.

Nga umo wakacitira mu Galileya, Yesu wakucenya ŵanthu ŵa mu Yudeya cifukwa ca kupempha cimanyikwiro cakufuma kucanya. Wakuŵaphalira kuti cimanyikwiro cinyake cipelekekenge yayi kwa iwo, kweni cimanyikwiro ca Yona pera ndico cipelekekenge. Yona wakaŵa cimanyikwiro mu fundo yakuti mazuŵa ghatatu wakaŵa mu somba ndiposo wakapharazga mwacikanga, ico cikapangiska Ŵanineve kupera. Yesu wakuti: “Kweni, wonani! wakuluska Yona wali pano.” Fumukazi ya ku Sheba nayo yikazizwa na vinjeru vya Solomoni. Yesu wakuyowoyaso kuti: “Kweni, wonani! wakuluska Solomoni wali pano.”

Yesu wakulongosora kuti para munthu wakukozga nyali, wakuyiŵika mu malo ghakubisika panji kusi ku cidunga yayi kweni pa cakuŵikapo nyali mwakuti ŵanthu ŵawonenge ungweru. Mutepanji wakung’anamura kuti kusambizga na kucita minthondwe panthazi pa ŵanthu ŵa mitima yinonono aŵa, vikuyana waka na kubisa ungweru wa nyali. Maso gha ŵanthu aŵa ghakulata pa cimoza yayi, ntheura cilato ca minthondwe iyo Yesu wakucita cikufiskika yayi.

Yesu wafumya ciŵanda na kucizga munthu uyo wakaŵa mbuwu. Ici cikwenera kukhuŵilizga ŵanthu awo ŵali na jiso lakulata pa cimoza kumulumba cifukwa ca mulimo ukuru uwu ndiposo cifukwa ca kupharazga makani ghawemi. Kweni ivi ndivyo ŵakususka aŵa ŵakucita yayi. Ndipo Yesu wakumalizga kuti: “Ntheura cenjera. Panyake ungweru uwo uli mwa iwe ni cisi. Ipo usange thupi lako lose ndakungweluka kwambura kacigaŵa ka cisi, lose liŵenge lakungweluka nga ni para nyali yikupeleka ungweru kwa iwe na kuŵala kwake.” Luka 11:14-36; Exodus 8:18, 19; 31:18; Mateyu 12:22, 28.

▪ Kasi ŵanthu ŵakucita wuli apo Yesu wakucizga munthu?

▪ Kasi “munwe wa Ciuta” ni vici, ndipo kasi Ufumu wa Ciuta waŵizira wuli mwakubucizga ŵategherezgi ŵa Yesu?

▪ Nchivici cikupangiska munthu kuŵa wakukondwa nadi?

▪ Kasi munthu wangacita wuli kuti waŵe na jiso lakulata pa cimoza?