Cipaturo 13

Ivyo Tikusambirapo pa Kuyezgeka kwa Yesu

YESU wati wabapatizika waka, wakulongozgeka na mzimu wa Ciuta kuya mu mapopa gha Yudeya. Wali na vinandi vyakuti waghanaghanirepo, cifukwa apo wakabapatizikanga “kucanya kukajulika,” mwakuti wawone vinthu vyakucanya. Nadi, pali vinandi ivyo wakwenera kulangurukapo.

Yesu wakukhala mazuŵa na mausiku 40 mu mapopa kwambura kurya kanthu. Apo Yesu wali na njara comene, Dyabulosi wakwiza na kwamba kumuyezga, wakuti: “Usange ndiwe mwana wa Ciuta, phalira malibwe agha kuti ghazgoke vingwa.” Kweni Yesu wakumanya kuti nchiheni kulongora nkhongono zake zakucitira minthondwe mwakuti wafiske makhumbiro ghake. Ntheura wakukana kucita ivyo Dyabulosi wakukhumba.

Kweni Dyabulosi wakuthera yayi. Wakuyezga nthowa yinyake. Wakuphalira Yesu kuti waduke kufuma pacanya pa ciliŵa ca tempele mwakuti ŵangelo ŵa Ciuta ŵamuthaske. Kweni Yesu wakukhumba yayi kujilongora ntheura. Kwizira mu Malemba, Yesu wakulongora kuti nchiheni kuyezga Ciuta mu nthowa iyi.

Mu ciyezgo cacitatu, Dyabulosi wakulongora Yesu maufumu ghose gha caru mu nthowa yakuzizwiska, ndipo wakuti: “Vinthu vyose ivi nikupenge, usange ungajikama na kunisopa.” Apa napo Yesu wakukana kuthera ku ciyezgo, wakusankha kuŵa wakugomezgeka kwa Ciuta.

Tingasambirako kanthu ku viyezgo ivi. Mwaciyelezgero, vikulongora kuti Dyabulosi ni maghanoghano waka ghaheni yayi, nga umo ŵanthu ŵanji ŵakuyowoyera, kweni waliko nadi, ni munthu wambura kuwoneka. Kweniso viyezgo ivi vikulongora kuti maboma ghose gha caru nga Dyabulosi. Cifukwa, maufumu agha ghalekenge kuŵa ghake, kasi mphanyi cikaŵa ciyezgo nadi apo Dyabulosi wakakhumbanga kughapeleka kwa Khristu?

Ndiposo ghanaghanirani fundo iyi: Dyabulosi wanguti ngwakunozgeka kumupa Yesu njombe para wangamusopa kamoza pera, nanga ghangaŵa maufumu ghose gha caru. Nase Dyabulosi wangatiyezga mu nthowa zakuyana waka, panji wangatinyenga na mwaŵi wa kusanga usambazi wa caru, mazaza, panji udindo. Kweni tingalongora vinjeru comene para tingayezga Yesu mwa kulutilira kugomezgeka kwa Ciuta, nanga tingayezgeka wuli. Mateyu 3:16; 4:1-11; Mariko 1:12, 13; Luka 4:1-13.

▪ Kasi ni vinthu wuli ivyo Yesu wakughanaghanirapo apo wali mu mapopa mazuŵa 40?

▪ Kasi Dyabulosi wakumuyezga wuli Yesu?

▪ Kasi tingasambirapo vici pa kuyezgeka kwa Yesu?