Cipaturo 41

Jando la Mphindano

WATI wacezga mu nyumba ya Simoni, mwaluŵiro, Yesu wakwamba ulendo waciŵiri kukapharazga mu Galileya. Pa ulendo wake wakwamba mu cigaŵa ici, wakaŵa pamoza na ŵasambiri ŵake ŵakwambilira, Petrosi, Andireya, Yakobe na Yohane. Kweni sono wali pamoza na ŵapositole 12, kweniso ŵanakazi ŵanji, awo ŵakwenda nayo. Ŵanakazi aŵa ni Mariya wa ku Magadala, Suzana, na Yohana, uyo mfumu wake ni mulinda wa Themba Herode.

Peneapo uteŵeti wa Yesu ukusazgikira, ŵanthu nawo ŵakupindana comene za ivyo wakucita. Munthu wakukoleka na ciŵanda, uyoso ngwacibulumutira na wambuwu, wakutolekera kwa Yesu. Yesu wati wamucizga, ndipo nkhongono za ciŵanda zafumamo mwa iyo mwakuti wakuwona na kuyowoya, mizinda yikutoleka mtima comene. Yikwamba kuyowoya kuti: “Kasi ni Mwana wa Davide yayi uyu?”

Mizinda yikuwungana mu unandi kuzingilizga nyumba iyo Yesu wakukhalamo, mwakuti iyo na ŵasambiri ŵake ŵakutondeka na kurya wuwo. Padera pa awo ŵakughanaghana kuti wakwenera kuŵa “Mwana wa Davide” wakulayizgika, pali ŵalembi na Ŵafarisi awo ŵafuma ku Yerusalemu kuzakamususka. Ŵabali ŵa Yesu ŵati ŵapulika za civundungwele ico ŵanthu ŵakuwuska cifukwa ca iyo, ŵakwiza kuzakamukora. Cifukwa wuli?

Nanga mbanung’una ŵa Yesu ŵacali ŵandagomezge kuti iyo ni Mwana wa Ciuta. Kweniso mwakuyana na umo ŵakamumanyiranga apo wakakuranga mu Nazarete, caŵazizika kuti vivundungwele na vivulupi vyawuka cifukwa ca iyo. Ntheura, ŵakughanaghana kuti Yesu watimbanizgika mutu. Ŵakuyowoya kuti “wafuntha,” ndipo ŵakukhumba kumukora na kuluta nayo.

Ndipouli, pali ukaboni wose wakuti Yesu wacizga munthu wakukoleka na ciŵanda. Ŵalembi na Ŵafarisi nawo ŵawona kuti ici cacitika nadi. Ntheura kuti ŵamulengeske Yesu, ŵakuphalira ŵanthu kuti: “Munganya uyu wakufumiska waka cara viŵanda, kweni na Belezebule muwusi wa viŵanda.”

Pakumanya maghanoghano ghawo, Yesu wakucemera ŵalembi na Ŵafarisi kwa iyo ndipo wakuti: “Ufumu uliwose uwo ukugaŵikana ukupasuka, ndipo msumba panji nyumba yiliyose iyo yikugaŵikana yiyimenge cara. Mwakuyana waka, usange Satana wakufumiska Satana, ndikuti wazgoka wakugaŵikana; ipo ufumu wake wimenge wuli?”

Iyi ni fundo yakupulikikwa makora comene! Pakuti Ŵafarisi ŵakuti ŵanthu awo ŵali mu gulu lawo ŵakufumya viŵanda, Yesu wakufumbaso kuti: “Usange ine nkhufumiska viŵanda na Belezebule, kasi ŵana ŵinu ŵakuvifumya na njani?” Apa ndikuti milandu iyo ŵakumubatika nayo Yesu nawo yikuŵakhwaska. Ndipo Yesu wakucenjezga kuti: “Kweni usange nkhufumiska viŵanda na mzimu wa Ciuta, ipo ufumu wa Ciuta wiza pa imwe mwakubucizga.”

Pakukhumba kulongora kuti kufumya viŵanda mbukaboni wakuti wali na nkhongono kuluska Satana, Yesu wakuti: “Kasi munthu wanganjira wuli mu nyumba ya munthu wankhongono na kupoka katundu wake, kwambura kumukaka dankha munthu wankhongono yura? Penepapo ndipo wayorenge vya mu nyumba yake. Uyo wali ku cigaŵa cane cara, wakwimikana nane, ndipo uyo wakuleka kuwunjika pamoza na ine, wakuparanya.” Vikuwonekerathu kuti Ŵafarisi ŵakwimikana na Yesu, kulongora kuti mbanchito ŵa Satana. Ŵakucimbizgira Ŵaisrayeli kutali na Yesu.

Ntheura, Yesu wakucenjezga ŵanthu ŵa Satana aŵa kuti “muyuyuro wakwimikana na mzimu uzamugowokereka cara.” Wakulongosora kuti: “Yose uyo wayowoya mazgu kwimikana na Mwana wa munthu, wazamugowokereka; kweni yose uyo wakuyowoya mwakwimikana na mzimu utuŵa, wazamugowokereka cara, cara nadi, kwali muŵe mu mgonezi uwu, panji uwo ukwiza.” Ŵalembi na Ŵafarisi aŵa ŵacita kwananga kwambura cigowokero cifukwa ŵayowoya msinjiro wakuti minthondwe iyo Yesu wakucita njakufuma kwa Satana, uku nchilongolero cakuti mzimu utuŵa wa Ciuta ukugwira nchito. Mateyu 12:22-32; Mariko 3:19-30; Yohane 7:5.

▪ Kasi ulendo waciŵiri wa Yesu mu Galileya ukupambana wuli na wakwamba?

▪ Cifukwa wuli ŵabali ŵa Yesu ŵakukhumba kumukora?

▪ Kasi Ŵafarisi ŵakuyezga wuli kususka minthondwe iyo Yesu wakucita, ndipo Yesu wakuŵasuska wuli?

▪ Kasi Ŵafarisi aŵa ŵali na mulandu wuli, ndipo cifukwa wuli?