Kasi Cakuzomerezgeka Nchivici pa Sabata?
Cipaturo 32
Kasi Cakuzomerezgeka Nchivici pa Sabata?
ZUŴA ili nalo ni Sabata, ndipo Yesu wakunjira mu sunagoge pafupi na Nyanja ya Galileya. Mu sunagoge ili muli munthu uyo ngwakuphapa woko lamalyero. Ŵalembi na Ŵafarisi ŵakulaŵisiska kuti ŵawone usange Yesu wamucizgenge munthu uyu. Paumaliro, ŵakumufumba kuti: “Kasi nchakuzomerezgeka kucizga pa sabata?”
Ŵalongozgi ŵa cisopa ca Ŵayuda ŵakugomezga kuti nchakuzomerezgeka kucizga pa Sabata pekha usange umoyo uli pangozi. Mwaciyelezgero, ŵakusambizga kuti nchambura kuzomerezgeka pa Sabata kunyolora lundi para munthu waguzguka panji kukaka bandeji pa cilonda. Ntheura ŵalembi na Ŵafarisi ŵakufumba Yesu na cilato cakuti ŵamusange kafukwa.
Ndipouli, Yesu wakumanya maghanoghano ghawo. Kweniso wakumanya kuti ivyo ŵakughanaghana vikukolerana yayi na malemba pa nkhani ya dango ilo likukanizga kugwira nchito pa Sabata. Ntheura pakukhumba kuŵasuska, Yesu wakuphalira munthu wakuphapa woko kuti: “Wuka ndipo wize pakati.”
Sono pakung’anamukira ku ŵalembi na Ŵafarisi, Yesu wakuti: “Ni munthu nju pakati pinu uyo wali na mberere yimoza ndipo usange yawa mu mbuna pa sabata walekenge kuyikora na kuyifumiska?” Pakuti mberere mbusambazi, ŵangayileka mu mbuna yayi mpaka zuŵa lakulondezgapo, panyake kuti yilware na kufwa. Nakuti Malemba ghakuti: “Murunji wakupwelelera umoyo wa cakuŵeta cake.”
Pakukhumba kuyaniska, Yesu wakulutilira kuti: “Ntheura munthu ngwakuzirwa comene kuluska mberere! Ipo nchakuzomerezgeka kucita cinthu ciwemi pa sabata.” Ŵalongozgi ŵa cisopa ŵakutondeka kususka fundo yakupulikikwa makora na ya kulongora lusungu iyi, ndipo ŵakukhala waka cete.
Pakukwenyelera, ndiposo kuŵa na citima cifukwa ca unonono wa mitima yawo, Yesu wakulaŵiska uku na uku. Ndipo wakuti kwa munthu wakuphapa woko: “Nyoloska woko lako.” Wakunyoloska woko lake ndipo likuwelerapo.
M’malo mwa kusekelera kuti woko la munthu lawelerapo, Ŵafarisi ŵakuluta kuwaro ndipo mwaluŵiro ŵakwamba kupangana na ŵakulondezga cipani ca Herode kuti ŵakome Yesu. Gulu la cisopa la Ŵasaduki likwenera kuti nalo lili mu cipani ici. Ŵa cipani ici na Ŵafarisi ŵakupulikana viŵi yayi, kweni mbakukolerana comene pakwimikana na Yesu. Mateyu 12:9-14; Mariko 3:1-6; Luka 6:6-11; Zintharika 12:10; Exodus 20:8-10.
▪ Kasi nchivici cikucitika kuti Yesu ŵasuske ŵalongozgi ŵa cisopa ca Ŵayuda?
▪ Kasi ŵalongozgi ŵa cisopa ca Ŵayuda aŵa ŵakugomezga vici pa nkhani ya kucizga pa Sabata?
▪ Kasi Yesu wakuyowoya ciyelezgero wuli kuti wasuske maghanoghano ghawo ghakubudika?
