Cipaturo 5

Kasi Yesu Wakubabikira Nkhu, Ndipo Pawuli?

THEMBA la Ufumu wa Ŵaroma, Kesare Augusto, walangura kuti waliyose wawelere ku msumba uwo wakababikira kuti wakalembeske. Ntheura Yosefe wakuluta ku Betelehemu, msumba uwo wakababikira.

Ŵanthu ŵanandi ŵiza mu Betelehemu kuzakalembeska, ndipo malo ghakuti Yosefe na Mariya ŵangagonamo ni mu ciŵaya pera. Mu malo agha, umo mukukhala mbunda na viŵeto vinyake ndimo Yesu wakubabikira. Mariya wakumuvungilizga na salu na kumugoneka mu cakulyeramo viŵeto.

Nadi, Ciuta ndiyo wakapangiska kuti Kesare Augusto wapeleke dango lakuti ŵanthu ŵalembeske. Ici cikawovwira kuti Yesu wababikire mu Betelehemu, msumba uwo Malemba ghakayowoyerathu kuti ndimo muzamubabikira muwusi wakulayizgika.

Uwu mbusiku wakuzirwa comene! Ungweru ukuru ukuŵalira ŵaliska zingilizge awo ŵali ku thengere. Mbucindami wa Yehova! Ndipo mungelo wa Yehova wakuŵaphalira kuti: “Kopa cara, pakuti wonani! nkhumupharazgirani makani ghawemi gha cimwemwe cikuru ico ŵanthu wose ŵaŵenge naco, cifukwa kwababika kwa imwe muhanya uno Mponoski, uyo ni Khristu Fumu, mu msumba wa Davide. Ndipo ici nchimanyikwiro kwa imwe: Mwamusanga bonda wavungilizgika mu salu ndipo wakugona mu cakulyeramo viŵeto.” Mwamabuci, ŵangelo ŵanyake ŵanandi ŵakwiza ndipo ŵakwimba kuti: “Ucindami kucanya nkhanira kwa Ciuta, ndipo pa caru capasi mtende pakati pa ŵanthu awo wakukondwa nawo.”

Ŵangelo ŵati ŵaluta, ŵaliska ŵakuyowoyeskana kuti: “Tiyeni sono nthena tilute mpaka ku Betelehemu na kuwona cinthu ici ico cacitika, ceneico Yehova watimanyiska.” Ŵakuluta mwaluŵiro na kusanga Yesu mu malo agho mungelo wanguyowoya. Apo ŵaliska ŵakulongosora ivyo mungelo wanguŵaphalira, wose awo ŵakupulika ŵakuzizwa. Mariya wakusunga na kughanaghanira mazgu agha mu mtima wake.

Ŵanthu ŵanandi mazuŵa ghano ŵakugomezga kuti Yesu wakababika pa Disembala 25. Kweni ku Betelehemu, Disembala ni nyengo ya vula ndiposo yakuzizima. Ntheura ŵaliska ŵangakhala kuwaro usiku yayi na miskambo yawo mu nyengo iyi. Kweniso nchakukayikiska kuti Kesare wangalangura ŵanthu awo ŵakakhumbanga kale kugalukira muwuso wake kuti ŵende mtunda utali mu nyengo yakuzizima iyi kukalembeska. Nchakuwonekerathu kuti Yesu wakababika mu nyengo ya cihanya. Luka 2:1-20; Mika 5:2.

▪ Cifukwa wuli Yosefe na Mariya ŵakuluta ku Betelehemu?

▪ Kasi nchinthu wuli cakuzizwiska ico cikucitika mu usiku uwo Yesu wakubabikira?

▪ Kasi tikumanya wuli kuti Yesu wakababika pa Disembala 25 yayi?