Cipaturo 59

Kasi Yesu ni Njani Comenecomene?

BOTI ilo Yesu na ŵasambiri ŵake ŵakweramo lati lafika ku Betesayida, ŵanthu ŵakwiza na munthu wacibulumutira ndipo ŵakumuŵeya kuti wamukhwaske na kumucizga. Yesu wakumutolera munthu uyu kuwaro kwa muzi, ndipo wati wamuthunyira mata pa maso, wakumufumba kuti: “Kasi ukuwona kalikose?”

Munthu uyu wakuzgora kuti: “Nkhuwona ŵanthu. Ŵakuwoneka nga ni makuni, kweni ŵakwendendeka.” Wati waŵika mawoko ghake pa maso gha munthu uyu, Yesu wakumujura maso mwakuti wakwamba kulaŵiska makoraghene. Yesu wakumutuma munthu uyu kukwake, wakumuphalira kuti waleke kunjira mu msumba.

Sono Yesu na ŵasambiri ŵake ŵakufumapo kuya ku mizi ya ku Kesareya Filipi, kumpoto comene kwa Palestina. Ni mtunda utali comene wacikwezga, makilomita ghakujumpha 48, kulazga ku malo ghakutowa gha Kesareya Filipi, malo agho ngakutumphuka mamita 350 kufuma musi mu nyanja. Ulendo uwu ukwenera kuti ukutora mazuŵa ghanandiko.

Uku ŵali mu nthowa, Yesu wakupatukira pamphepete kuti walombe. Kwakhala pafupifupi myezi yinkhondi na yinayi panji khumi kuti wakomeke, ndipo wakufipira mtima ŵasambiri ŵake. Ŵanandi ŵaleka kale kumulondezga. Ŵanji ŵakwenera kuti ŵatimbanizgika na kukhuŵara cifukwa cakuti wakakana apo ŵanthu ŵakakhumbanga kumukora uthemba ndiposo cifukwa cakuti wakapeleka yayi cimanyikwiro cakufuma kucanya apo ŵalwani ŵake ŵakamulomba, kuti walongore kuti ni themba nadi. Kasi ŵapositole ŵake ŵakugomezga kuti iyo ni njani? Ŵati ŵiza uko wakulombera, Yesu wakuŵafumba: “Kasi mizinda yikuti ndine njani?”

Ŵakuzgora kuti: “Ŵanyake ŵakuti Yohane Mbapatizi, ŵanyake Eliya, ŵanyakeso Yeremiya panji yumoza wa zinchimi.” Enya, ŵanthu ŵakughanaghana kuti Yesu njumoza wa ŵanalume aŵa, uyo wawuskika ku ŵakufwa.

Yesu wakufumba kuti: “Kweni imwe mukuti ndine njani?”

Petrosi wakuzgora luŵiro kuti: “Ndimwe Khristu, Mwana wa Ciuta wamoyo.”

Wati wakhozgera zgoro la Petrosi, Yesu wakuti: “Nkhukuphalira kuti, Ndiwe Petrosi, ndipo pa jalawe ili nizamuzengapo mpingo wane, ndipo vipata vya Hadesi vizamuwuthereska cara.” Aka nkhakwamba kuti Yesu wayowoye kuti wazengenge mpingo ndiposo kuti nanga ni nyifwa yizamuŵakora umikoli yayi ŵanthu ŵake para ŵalutilira kugomezgeka pa caru capasi. Ndipo wakuphalira Petrosi kuti: “Nizamukupa vijuliro vya ufumu wa kucanya.”

Ntheura Yesu wakuvumbura kuti Petrosi wazamupokera milimo yapadera. Ici cikung’anamura kuti Petrosi ndiyo ngwakwamba pakati pa ŵapositole yayi, nesi kuti ndiyo ni lufura lwa mpingo. Yesu iyomwene ndiyo ni Jalawe ilo pazengekenge mpingo wake. Kweni Petrosi wapikenge vijuliro vitatu vyakujulira mwaŵi magulu gha ŵanthu, wakuti ŵanjire mu Ufumu wa kucanya.

Petrosi wagwiliskirenge nchito cijuliro cakwamba pa Pentekoste mu 33 C.E., kulongora Ŵayuda ŵakupera ivyo ŵakwenera kucita kuti ŵaponoskeke. Nyengo yicoko waka kufuma apo, wagwiliskirenge nchito cijuliro caciŵiri kuti wajulire mwaŵi Ŵasamariya ŵakugomezga kuti ŵanjire mu Ufumu wa Ciuta. Ndipo mu 36 C.E., wagwiliskirenge nchito cijuliro cacitatu kuti wajulire mwaŵi ŵanthu ŵambura kukotoleka ŵa mitundu yinyake, Koroneliyo na ŵabwezi ŵake.

Yesu wakulutilira kudumbirana na ŵapositole ŵake. Iwo ŵakukhuŵara cifukwa wayowoya kuti wali pafupi kusuzgika na kukomeka mu Yerusalemu. Pakutondeka kupulikiska kuti Yesu wawuskikenge na kukwera kucanya, Petrosi wakutolera Yesu pamphepete. Wakuti: “Mujilengere lusungu Fumu; ici cimucitikiraninge cara.” Pakuzgokera kumphepete, Yesu wakuzgora kuti: “Luta kumanyuma kwane Satana! Uli cikhuŵazgo kwa ine, cifukwa ukughanaghana maghanoghano gha Ciuta cara, kweni gha ŵanthu.”

Padera pa ŵapositole pakwenera kuti pali ŵanji awo ŵakwenda na Yesu, ntheura sono wakuŵacemera kufupi na kuŵalongosolera kuti ciŵenge cipusu yayi kuti munthu waŵe mulondezgi wake. Wakuti: “Usange yunji wakukhumba kwiza pamanyuma pane, wajipate na kunyamura khuni lake lakusuzgikirapo ndipo wanilondezgenge. Pakuti yose uyo wakukhumba kuponoska umoyo wake wawutayenge; kweni yose uyo wakutaya umoyo wake cifukwa ca ine ndiposo makani ghawemi, wawuponoskenge.”

Enya, usange ŵakukhumba kuti ŵatemweke na iyo, ŵalondezgi ŵa Yesu ŵakwenera kukhwima mtima na kujipata. Wakuti: “Pakuti yose uyo wakukhozgeka soni na ine kweniso mazgu ghane mu muwiro uwu wauleŵi na wakwananga, Mwana wa munthu nayo wazamukhozgeka soni na iyo para wakwiza mu ucindami wa Ŵawiske pamoza na ŵangelo ŵatuŵa.” Mariko 8:22-38; Mateyu 16:13-28; Luka 9:18-27.

▪ Cifukwa wuli Yesu wakufipira mtima ŵasambiri ŵake?

▪ Kasi ŵanthu ŵakuti Yesu ni njani?

▪ Kasi ni vijuliro wuli ivyo vyapika kwa Petrosi, ndipo wakuvigwiliskira wuli nchito?

▪ Kasi Petrosi wakususkika pa vici ndipo cifukwa wuli?