Cipaturo 38

Kasi Yohane Wakaŵavya Cipulikano?

YOHANE MBAPATIZI, uyo sono wakhala mu jele pafupifupi cilimika cimoza, wapulika nkhani yakuti mwana wa cokoro ca ku Nayini wawuskika ku ŵakufwa. Kweni Yohane wakukhumba kupulika kwa Yesu iyomwene pakuyowoya za ng’anamuro la ico cacitika, ntheura wakutuma ŵaŵiri mwa ŵasambiri ŵake kukafumba kuti: “Kasi ndimwe Mweneuyo Wakwiza, panji tikwenera kulindizga munyake?”

Fumbo ili lingawoneka nga ndacilendo, comene cifukwa cakuti apo Yohane wakabapatizanga Yesu pafupifupi vilimika viŵiri ivyo vyajumpha, wakawona mzimu wa Ciuta ukukhilira pa Yesu na kupulika lizgu la Ciuta. Fumbo la Yohane lingacitiska ŵanji kughanaghana kuti cipulikano cake calopwa. Kweni ndimo viliri yayi. Yohane waŵenge kuti wamba kukayika, mphanyi Yesu wakumulumba comene yayi, nga umo wakucitira pa nyengo iyi. Ipo cifukwa wuli Yohane wakufumba fumbo ili?

Panji Yohane wakukhumba kupanikizgira waka kufuma kwa Yesu kuti ndiyo ni Mesiya. Ici cingaŵa cinthu cakukhozga comene kwa Yohane pakuti wakutambura mu jele. Kweni pakwenera kuti pali kanthu kanyake ako Yohane wakufumbira fumbo ili. Panji wakukhumba kumanya usange kuŵenge munyake uyo wakwiza, nga muhaliri, uyo wazamumalizga kufiska vyose ivyo vikayowoyekerathu kuti Mesiya wazamufiska.

Mwakuyana na maucimi gha mu Baibolo agho Yohane wakughamanya makora, Wakuphakazgika wa Ciuta wakwenera kuzakaŵa themba na muwomboli. Ndipouli, Yohane wacali mu jele, nangauli pajumpha myezi yinandi kufuma apo Yesu wakabapatizikira. Ntheura Yohane wakwenera kuti wakufumba Yesu kuti: ‘Kasi ndimwe nadi mwimikenge Ufumu wa Ciuta mu nkhongono, panji pali munyake, muhaliri, uyo tikwenera kumulindizga kuti wazakafiske maucimi ghose ghakukhwaskana na ucindami wa Mesiya?’

M’malo mwa kuphalira ŵasambiri ŵa Yohane kuti, ‘Ndine uyo wakeneranga kwiza,’ mu ora lenelili, Yesu wakulongora nkhongono zapadera apo wakucizga ŵanthu ŵanandi ku matenda gha mitundu yose na maulwari. Kufuma apo, wakuphalira ŵasambiri ŵa Yohane kuti: “Lutani, ndipo mukaphare kwa Yohane ivyo mwawona na kupulika: ŵacibulumutira ŵakuwona, ŵakupendera ŵakwenda, ŵavyoni ŵakutozgeka ndipo ŵakumangwa makutu ŵakupulika, ŵakufwa ŵakuwuskika, ndipo ŵakavu ŵakuphalirika makani ghawemi.”

Panji tingayowoya kuti, apo Yohane wakufumba fumbo ili wakukhazga kuti Yesu wacitenge vinandi kuluska ivyo wakucita ndipo panji wamufumiskenge Yohane mu jele. Ndipouli, Yesu wakuphalira Yohane kuti wangakhazganga vinandi yayi padera pa minthondwe iyo wakucita.

Apo ŵasambiri ŵa Yohane ŵakuluta, Yesu wakuzgokera ku mizinda na kuyiphalira kuti Yohane ni “thenga” la Yehova ilo likayowoyeka pa Malaki 3:1 ndiposo ndiyo nchimi Eliya iyo yikayowoyeka pa Malaki 4:5, 6. Ntheura wakulumba Yohane kuti wakuyana waka na nchimi zinyake izo zikaŵako pambere iyo wandaŵeko, wakulongosora kuti: “Nadi pano, nkhumuphalirani imwe mwaŵanthu, Pakati pa awo ŵali kubabika na ŵanakazi, wandawukepo munthu mukuru wakuluska Yohane Mbapatizi; kweni munthu uyo ni mucoko mu ufumu wa kucanya ni mukuru kuluska iyo. Kweni kufuma mu mazuŵa gha Yohane Mbapatizi mpaka sono, ufumu wa kucanya ndico nchikhomo ico ŵanthu ŵakulimbikira kuti ŵafikeko.”

Apa Yesu wakulongora kuti Yohane wazamuŵamo yayi mu Ufumu wakucanya, pakuti mucoko comene mu ufumu uwu ni mukuru kuluska Yohane. Yohane wakunozgera Yesu nthowa, kweni wakufwa pambere Khristu wandacite phangano na ŵasambiri ŵake, lakuti ŵazamuwusa pamoza nayo mu Ufumu wake. Ndico cifukwa Yesu wakuti Yohane wazamuŵamo yayi mu Ufumu wakucanya. M’malo mwake, Yohane wazamukhala pa caru capasi mu Ufumu wa Ciuta. Luka 7:18-30; Mateyu 11:2-15.

▪ Cifukwa wuli Yohane wakufumba usange Yesu ni Mweneuyo Wakwiza panji usange ŵakwenera kulindizga munyake?

▪ Kasi ni maucimi wuli agho Yesu wakuti Yohane wafiska?

▪ Cifukwa wuli Yohane Mbapatizi wazamuŵako yayi kucanya pamoza na Yesu?