Cipaturo 102

Khristu Wakunjira mu Yerusalemu Mwacitonda

MULENJI wakulondezgapo, pa zuŵa la Sabata, Nisani 9, Yesu wakufumako ku Betaniya pamoza na ŵasambiri ŵake ndipo wakuluta ku Lupiri lwa Maolive kulazga ku Yerusalemu. Mwaluŵiro, ŵakufika pafupi na Betifage, muzi uwo uli pa Lupiri lwa Maolive. Yesu wakuphalira ŵasambiri ŵake ŵaŵiri kuti:

“Lutani mu muzi uwo mukuwuwona, ndipo nyengo yeneyiyo mwamusanga mbunda yanakazi yakukakika pamoza na mwana wake; mukazisuture na kwiza nazo kwa ine. Ndipo usange yunji wakuyowoya kanthu kwa imwe, mukati, ‘Fumu yikuzikhumba.’ Pa ici, wamuzituma nyengo yeneyiyo.”

Nangauli pakwamba ŵasambiri ŵakumanya yayi kuti ulongozgi uwu wayowoyeka mwakuti ucimi wa mu Baibolo ufiskike, pamanyuma ŵakumanya. Nchimi Zekariya yikayowoyerathu kuti Themba lakulayizgika la Ciuta lizamwenda pa mbunda pakunjira mu Yerusalemu, enya, “wakukwera pa mbunda, pa mwana wa mbunda yanakazi.” Pakuluta kuti likaphakazgike, Themba Solomoni nalo likakwera pa mwana wa mbunda.

Ŵasambiri ŵati ŵanjira mu Betifage na kutora mwana wa mbunda na nyina, ŵanji awo ŵimilira pafupi ŵakuyowoya kuti: “Kasi mukucita vici?” Kweni ŵati ŵaphalirika kuti Fumu yikuvikhumba viŵeto ivi, ŵakuŵazomerezga ŵasambiri kuti ŵalute navyo kwa Yesu. Ŵasambiri ŵakuŵika malaya ghawo ghakuwaro pa mbunda yanakazi na pa mwana wake, kweni Yesu wakukwera pa mwana wa mbunda.

Apo Yesu wakwenda kuluta mu Yerusalemu, mizinda yikusazgikira. Ŵanthu ŵanandi ŵakutandika malaya ghawo ghakuwaro mu nthowa, apo ŵanji ŵakuphajura minthavi ya makuni na kuyitandika pasi. Ŵakucemerezga kuti: “Wakutumbikika ni Uyo wakwiza nga ni Themba mu zina la Yehova! Mtende kucanya, ndiposo ucindami mu malo gha kucanya nkhanira!”

Ŵafarisi ŵanji pa mzinda uwu, ŵakwiya cifukwa cakuti ŵanthu ŵakucemerezga ntheura, ndipo ŵakudandawulira Yesu kuti: “Msambizgi, ŵalekeskani ŵasambiri ŵinu.” Kweni Yesu wakuzgora kuti: “Nkhumuphalirani kuti, Usange aŵa ŵangakhala cete, malibwe ghacemerezgenge.”

Apo Yesu wakusendelera ku Yerusalemu, wakuwona msumba na kwamba kuwulilira, wakuti: “Iwe, enya iwe, uŵenge kuti wamanya mu zuŵa ili vinthu vya mtende—kweni sono vyabisika ku maso ghako.” Cifukwa ca kulekera dala kupulikira, Yerusalemu wakwenera kulangika, nga umo Yesu wakuyowoyerathu kuti:

“Ŵalwani ŵako [Ŵaroma pasi pa Mulongozgi wa nkhondo Tito] ŵazamuzenga luŵigho mwakuzingilizga na makuni ghakusongoka ndipo ŵazamukuzingilizga na kukujalira mu vigaŵa vyose, ndipo ŵazamukutaya pasi iwe na ŵana ŵako awo ŵali mukati mwako, ndipo ŵazamulekapo libwe pa libwe linyake cara mwa iwe.” Pharanyiko la Yerusalemu ili, ilo Yesu wayowoyerathu, likucitika pati pajumpha vilimika 37, mu 70 C.E.

Masabata ghacoko waka kumasinda, ŵanthu ŵanandi mu mzinda ŵakawona Yesu wakuwuska Lazaro. Sono ŵanthu aŵa ŵakuphalira ŵanyawo za munthondwe uwu. Ntheura, apo Yesu wakunjira mu Yerusalemu, msumba wose wayaghayika. Ŵanthu ŵakufumba kuti: “Kasi ni njani uyu?” Ndipo mizinda yikulutilira kuŵaphalira kuti: “Iyi ni nchimi Yesu, kufuma ku Nazarete wa Galileya!” Pakuwona ivyo vikucitika, Ŵafarisi ŵakudandawura kuti palije ico ŵakucitapo, cifukwa nga umo ŵakuyowoyera: “Caru camulondezga.”

Nga nkhaluso kake para wiza ku Yerusalemu, Yesu wakunjira mu tempele na kusambizga. Apo wali mu tempele, ŵacibulumutira na ŵakupendera ŵakwiza kwa iyo ndipo wakuŵacizga. Ŵalara ŵa ŵasofi na ŵalembi ŵakukwiya ŵati ŵawona vinthu vyakuzizwiska ivyo Yesu wakucita, ndiposo ŵati ŵapulika ŵasepuka ŵakucemerezga mu tempele kuti: “Ponoskani, taŵeya, Mwana wa Davide!” Ŵakuti: “Kasi ukupulika ivyo aŵa ŵakuyowoya?”

Yesu wakuzgora kuti: “Enya. Kasi mundaŵazgepo ici, ‘Mwacitiska milomo ya ŵanici na ŵakonkha kumulumbani’?”

Yesu wakulutilira kusambizga, ndipo wakulaŵiska pa vinthu vyose mu tempele. Ndipo kwafipa. Ntheura Yesu wakufuma pamoza na ŵapositole ŵake 12, ndipo ŵakuwelera ku Betaniya, mtunda wa makilomita ghatatu panji kujumphirapo. Wakugona kwenekura pa Sabata usiku, panji mu nyumba ya mubwezi wake, Lazaro. Mateyu 21:1-11, 14-17; Mariko 11:1-11; Luka 19:29-44; Yohane 12:12-19; Zekariya 9:9.

▪ Mphawuli apo Yesu wakunjira mu Yerusalemu pakuŵa Themba, ndipo wakunjira wuli?

▪ Kasi nchakuzirwa wuli kuti mizinda yilumbenge Yesu?

▪ Kasi Yesu wakujipulika wuli apo wakuwona Yerusalemu, ndipo wakuyowoya ucimi wuli?

▪ Kasi nchivici cikucitika apo Yesu wakunjira mu tempele?