Cipaturo 101

Ku Betaniya, mu Nyumba ya Simoni

YESU wati wafuma mu Yeriko, wakuluta ku Betaniya. Ulendo uwu ukutora pafupifupi zuŵa lose, pakuti ni mtunda wacikwezga wa makilomita 19. Yeriko wali musi, ndipo Betaniya wali pa malo ghakukwera. Mungakumbuka kuti ku Betaniya nkhwawo kwa Lazaro na ŵadumbu ŵake. Muzi ucoko uwu uli pa mtunda wa makilomita ghatatu kufuma ku Yerusalemu, ndipo uli kuvuma kwa Lupiri lwa Maolive.

Ŵanthu ŵanandi ŵafika kale ku Yerusalemu uko kuŵenge Paska. Ŵatendekera kwiza kuti ŵajitozge mwakuyana na dango. Panyake ŵali kukhwaska citanda panji kucita cinthu cinyake ico cili kuŵapangiska kuŵa ŵakufipirwa. Ntheura ŵakulondezga ndondomeko ya kujitozga mwakuti ŵacite Paska mwakuzomerezgeka. Apo ŵanthu ŵakutendekera aŵa ŵakuwungana pa tempele, ŵanandi ŵakufumbana usange Yesu wizenge ku Paska panji yayi.

Ŵanthu mu Yerusalemu ŵakupindana vya Yesu. Waliyose wakumanya kuti ŵalongozgi ŵa cisopa ŵakukhumba kumukora na kumukoma. Nakuti ŵalangura kuti usange munthu wamanya uko Yesu wali, waŵaphalire. Ŵalongozgi aŵa ŵayezga kukoma Yesu katatu mu myezi iyo yajumpha, pa Ciphikiro ca Mahema, pa Ciphikiro ca Kupatulira Tempele, ndiposo wakati wawuska Lazaro. Ntheura ŵanthu ŵakujifumba kuti, kasi Yesu wazamuwonekeraso pa wumba? Ŵakufumbana kuti: “Mukuti wuli?”

Pa nyengo iyi, Yesu wakufika mu Betaniya, kwati kwakhala mazuŵa ghankhondi na limoza kuti Paska licitike, ilo likucitika pa Nisani 14 mwakuyana na kalendara ya Ŵayuda. Yesu wakufika mu Betaniya pa Cinkhondi namise, apo mphauyambiro wa Nisani 8. Yesu wangenda yayi ulendo wa ku Betaniya pa Cisulo, pakuti dango la Ŵayuda likukanizga kwenda ulendo pa Sabata, ilo likwamba pa Cinkhondi mise mpaka Cisulo mise. Yesu wakwenera kuti wakuluta ku nyumba ya Lazaro, umo wakucitira nyengo zose, ndipo wakugona kwenekura pa Cinkhondi usiku.

Ndipouli, munthu munyake wa mu Betaniya wakucemera Yesu na ŵabwezi ŵake ku cakurya pa Cisulo mise. Munthu uyu ni Simoni, uyo pakwamba wakaŵa na vyoni, mweneuyo wakwenera kuti wakacizgika na Yesu. Pakuti Marita wakutemwa kutokatoka, wakuteŵetera ŵalendo. Kweni Mariya wakuŵika mahara comene kwa Yesu, pa nyengo iyi, mu nthowa iyo yikuwuska mphindano.

Mariya wakujura supa yasangalawe, umo muli pafupifupi magiramu 500 gha mafuta ghakununkhira, “narido mweneco.” Mafuta agha ngakuzirwa comene. Nadi, mtengo wake ukuyana waka na malipiro gha cilimika cose. Apo Mariya wakupungulira mafuta agha pa mutu wa Yesu na malundi ghake na kupuputa malundi na sisi lake, sungu liwemi likuzura mu nyumba yose.

Ŵasambiri ŵakwiya ndipo ŵakufumba kuti: “Nkhwaci kusakaza uku?” Ndipo Yudasi Isikariyoti wakuti: “Cifukwa wuli mafuta ghakununkhira agha ghanguleka kuguliskika ndalama zakukwana madinari mahandiredi ghatatu na kupelekeka ku ŵanthu ŵakavu?” Kweni Yudasi wakufipira nadi mtima ŵakavu yayi, cifukwa wakwiba ndalama izo ŵasambiri ŵakusunga mu bokosi.

Yesu wakumukhalira kumasinda Mariya. Wakuti: “Mulekani. Cifukwa wuli mukukhumba kumusuzga mwanakazi? Wacita mulimo uwemi kwa ine. Cifukwa nyengo zose muli nawo ŵakavu pamoza namwe, ndipo apo mwakhumbira, mungaŵacitira ciwemi, kweni ine muli nane nyengo zose cara. Wacita ico wakwaniska; waphakazgirathu thupi lane mafuta ghakununkhira pakuwona kuti lisungikenge. Nadi pano nkhumuphalirani, Kulikose uko makani ghawemi ghakupharazgika mu caru cose, ico mwanakazi uyu wacita naco camuyowoyeka nga nchikumbusko cake.”

Sono Yesu wakhala mu Betaniya maora 24, ndipo ŵanthu ŵamanya kuti wali mu Betaniya. Ntheura ŵanandi ŵakwiza ku nyumba ya Simoni kuzakawona Yesu, kweniso kuzakawona Lazaro, pakuti nayo wali kwenekuko. Ntheura ŵalara ŵa ŵasofi ŵakupangana kukoma Yesu kweniso Lazaro. Ici nchifukwa cakuti ŵanthu ŵanandi ŵakupulikana mwa Yesu cifukwa ca kuwona kuti Lazaro, uyo wakawuskika kufuma ku ŵakufwa, ngwamoyo. Nadi, ŵalongozgi ŵa cisopa aŵa mbaheni comene. Yohane 11:55–12:11; Mateyu 26:6-13; Mariko 14:3-9; Milimo 1:12.

▪ Kasi pa tempele mu Yerusalemu ŵanthu ŵakudumbiskana vici, ndipo cifukwa wuli?

▪ Cifukwa wuli Yesu wakwenera kufika mu Betaniya pa Cinkhondi m’malo mwa pa Cisulo?

▪ Apo Yesu wakufika mu Betaniya, kasi Sabata yikwenera kuti yikumumalira nkhu?

▪ Kasi Mariya wakucita vici ico cikwambiska mphindano, ndipo Yesu wakumukhalira wuli kumasinda?

▪ Nchivici cikulongora kuti ŵalara ŵa ŵasofi mbaheni comene?