Cipaturo 130

Ku Nyanja ya Galileya

SONO ŵapositole ŵakuwelera ku Galileya nga umo Yesu wakaŵaphalilira. Kweni ŵakumanya yayi ico ŵamucita kwenekura. Pati pajumpha kanyengo, Petrosi wakuphalira Tomasi, Nataniyeli, Yakobe na Yohane munung’una wake, ndiposo ŵapositole ŵanji ŵaŵiri, wakuti: “Nkhuluta kukaloŵa.”

Ŵankhondi na yumoza aŵa ŵakuti: “Nase tiŵenge pamoza nawe.”

Usiku wose, ŵakukorapo somba nanga njimoza yayi. Ndipouli, kwati kwaca, Yesu wakuwoneka pa mlima, kweni ŵapositole ŵakumanya yayi kuti ni Yesu. Iyo wakucemerezga kuti: “Mwaŵana, kasi muli na cakuti murye?”

Iwo ŵakucemerezga kufuma pa maji, ŵakuti: “Cara!”

Iyo wakuti: “Ponyani mkwawu kumalyero kwa boti ndipo muzisangenge.” Ndipo ŵati ŵaponya mkwawu, ŵakutondeka kuwuguza cifukwa ca unandi wa somba.

Yohane wakucemerezga kuti: “Ni Fumu!”

Pakupulika ici, Petrosi wakuvwara laya lake pakuti wangulivura ndipo wakumphyota mu maji. Kufuma apo, wakuskuŵa mtunda wa mamita 90 kufika ku mtunda. Ŵapositole ŵanyake ŵakwiza mu boti licoko, uku ŵakuguza mkwawu wakuzura na somba.

Ŵati ŵafika pa mlima, pali moto wa makara uwo pali somba, ndiposo cingwa. Yesu wakuti: “Zani na somba zinyake izo mwakora.” Petrosi wakukwera mu boti na kuguzira mkwawu pa mlima. Mu mkwawu muli somba 153 zikuruzikuru.

Yesu wakuŵacema, wakuti: “Zani murye.”

Palije nanga njumoza wali na cikanga kufumba kuti: “Ndiwe njani?” cifukwa wose ŵakumanya kuti ni Yesu. Aka nkhacinkhondi na ciŵiri kuti Yesu wawoneke kufuma apo wakawuskikira, ndipo nkhacitatu kuti wawoneke ku ŵapositole ŵake pa gulu. Sono wakuŵagaŵira cakurya ca mulenji, waliyose wakumupa cingwa na somba.

Ŵati ŵamara kurya, Yesu wakwenera kuti wakulaŵiska somba zinandi izo ŵakora, ndipo wakufumba Petrosi kuti: “Simoni mwana wa Yohane, kasi ukunitemwa ine kuluska izi?” Tikukayika yayi kuti apa wakung’anamura kuti, Kasi ukutemwa comene nchito ya kuloŵa somba kuluska mulimo uwo nakunozgera kuti ucite?

Petrosi wakuzgora kuti: “Mukumanya kuti nkhumutemwani.”

Yesu wakuti: “Leranga twanamberere twane.”

Kaciŵiri, wakufumbaso kuti: “Simoni mwana wa Yohane, kasi ukunitemwa ine?”

Petrosi wakuzgora na mtima wose kuti: “Enya, Fumu, mukumanya kuti nkhumutemwani.”

Yesu wakumulanguraso kuti: “Liskanga tumberere twane.”

Ndipo kacitatu wakufumbaso kuti: “Simoni mwana wa Yohane, kasi ukunitemwa ine?”

Sono Petrosi citima camukora. Panyake wakughanaghana kuti Yesu wakumukayikira kuti ngwakugomezgeka. Nakuti ni kale viŵi yayi, apo Yesu wakayezgekanga, Petrosi wakamukana katatu. Ntheura Petrosi wakuti: “Fumu, imwe mukumanya vinthu vyose; mukumanya kuti nkhumutemwani.”

Yesu wakumulangura kacitatu wakuti: “Liskanga tumberere twane.”

Ntheura pakuyowoya na Petrosi, Yesu ndikuti wakuphaliraso ŵapositole ŵanji mulimo uwo iyo wakukhumba kuti ŵacitenge. Sonosono apa wafumengepo pa caru capasi, ndipo wakukhumba kuti iwo ŵalongozgenge pakuteŵetera awo ŵakuguzikira mu ciŵaya ca Ciuta.

Nga umo Yesu wakakakikira na kukomeka cifukwa ca kucita mulimo uwo Ciuta wakamutuma, sono wakuvumbura kuti Petrosi nayo wazamusuzgika mwakuyana waka. Yesu wakuphalira Petrosi kuti: “Apo ukaŵa mucoko, ukavwaranga wekha ndipo ukendanga uko wakhumba. Kweni para wakura, uzamunyoloska mawoko ghako ndipo munthu munyake wazamukuvwalika na kukuyeghera uko iwe ukukhumba cara.” Nangauli Petrosi wazamufwira cipulikano, Yesu wakumuciska kuti: “Lutilira kunilondezga.”

Pakung’anamuka, Petrosi wakuwona Yohane ndipo wakufumba kuti: “Fumu, uyu ke?”

Yesu wakuzgora kuti: “Usange ni khumbo lane kuti iyo wakhalilire mpaka nize, vili na kanthu wuli kwa iwe? Iwe lutilira kunilondezga.” Ŵasambiri ŵanandi ŵakatenge mazgu gha Yesu agha ghakang’anamuranga kuti mpositole Yohane wafwenge cara. Ndipouli, mpositole Yohane wakazakalongosora kuti Yesu wakang’anamuranga kuti iyo walekenge kufwa yayi, kweni Yesu wakayowoya waka kuti: “Usange ni khumbo lane kuti iyo wakhalilire mpaka ine nize, vili na kanthu wuli kwa iwe?”

Kweniso Yohane wakazakayowoya fundo yinyake yakuzirwa iyi: “Nakuti paliso vinthu vinyake vinandi ivyo Yesu wakacita, ivyo viŵenge kuti vyalembeka vyose, nkhughanaghana kuti, caru cingakwana cara kuŵikapo mipukutu iyo yingalembeka.” Yohane 21:1-25; Mateyu 26:32; 28:7, 10.

▪ Nchivici ico cikulongora kuti ŵapositole ŵakumanya yayi ivyo ŵamucita ku Galileya?

▪ Kasi ŵapositole ŵakumumanya wuli Yesu ku Nyanja ya Galileya?

▪ Kasi Yesu wawonekera kalinga kufuma apo wakawuskikira?

▪ Kasi Yesu wakulongosora wuli nchito iyo wakukhumba kuti ŵapositole ŵacitenge?

▪ Kasi Yesu wakulongora wuli umo Petrosi wazamufwira?

▪ Kasi Yesu wakayowoya mazgu wuli ghakukhwaskana na Yohane agho ŵasambiri ŵanandi ŵakaghapulikiska yayi?