Cipaturo 27

Kucemeka kwa Mateyu

NYENGO yicoko waka wati wacizga munthu wakufwa viŵaro, Yesu wakufumamo mu Kaperenaumu kuya ku Nyanga ya Galileya. Mizinda ya ŵanthu yikwizaso kwa iyo, ndipo wakwamba kuŵasambizga. Apo wakulutilira kwenda, wakuwona Mateyu, uyo wakucemekaso Levi, wakhala pa nyumba yakusonkherapo msonkho. Yesu wakumucema kuti: “Uŵe mulondezgi wane.”

Mateyu wakwenera kuti wakuvimanya kale visambizgo vya Yesu, nga umo vikaŵira na Petrosi, Andireya, Yakobe, na Yohane apo ŵakacemekanga. Ndipo nga ndiwo, Mateyu nayo wakuzomera mwaluŵiro. Wakuwuka, wakuleka nchito ya kusonkheska msonkho, na kulondezga Yesu.

Kufuma apo, panji kuti wasangwe cifukwa cakuti wacemeka na Yesu, Mateyu wakunozga ciphikiro cikuru mu nyumba yake. Padera pa Yesu na ŵasambiri ŵake, awo Mateyu wakagwiranga nawo nchito nawo ŵalipo. Ŵanthu aŵa kanandi ŵakutinkhika na Ŵayuda ŵanyawo cifukwa cakuti ŵakusonkheskera Ŵaroma msonkho, awo iwo ŵakuŵatinkha comene. Kweniso kanandi ŵakukhumba ndalama zinandi ku ŵanthu kuluska msonkho weneco.

Pakuwona kuti Yesu wali pa ciphikiro pamoza na ŵanthu aŵa, Ŵafarisi ŵakufumba ŵasambiri ŵake kuti: “Cifukwa wuli msambizgi winu wakurya pamoza na ŵakusonkheska msonkho na ŵakwananga?” Wati wapulikako fumbo ili, Yesu wakuzgora Ŵafarisi kuti: “Ŵanthu awo ŵali makora ŵakukhumbikwira mcizgi cara, kweni ŵalwari ndiwo. Ipo lutani, mukasambire ng’anamuro la ici, ‘Nkhukhumba cisungusungu, sembe cara.’ Pakuti nkhiza kuzakacema ŵanthu ŵarunji cara, kweni ŵakwananga.”

Mateyu wakwenera kuti waŵacemera ku nyumba yake ŵakusonkheska msonkho aŵa mwakuti ŵapulike mazgu gha Yesu na kucizgika mwauzimu. Ntheura Yesu wakucezga nawo kuti waŵawovwire kuŵa paubwezi na Ciuta. Yesu wakuŵatinkha yayi ŵanthu ŵantheura, nga umo ŵakucitira Ŵafarisi awo ŵakujiwona kuŵa ŵarunji. M’malo mwake, pakuŵacitira lusungu, wakuŵacizga mwauzimu.

Ntheura pakuti Yesu wakucitira cisungusungu ŵakwananga, cikulongora kuti wakulekelera waka zakwananga zawo yayi kweni cikulongora kuti wakuŵacitira lusungu lwakuyana waka na ulo wakulongora ŵalwari. Mwaciyelezgero, kumbukani kuti cifukwa ca lusungu, wakanyoloska woko lake na kukhwaska munthu wavyoni na kuyowoya kuti: “Nkhukhumba. Tozgeka.” Mphanyi nase talongora cisungusungu mwa kovwira ŵanthu ŵakusoŵerwa, comenecomene mwauzimu. Mateyu 8:3; 9:9-13; Mariko 2:13-17; Luka 5:27-32.

▪ Kasi Mateyu wali nkhu apo Yesu wakumuwona?

▪ Kasi Mateyu wakugwira nchito wuli, ndipo cifukwa wuli ŵanthu ŵanthena aŵa ŵakutinkhika na Ŵayuda ŵanyawo?

▪ Kasi Ŵafarisi ŵakudandawura na Yesu pa fundo wuli, ndipo iyo wakuzgora wuli?

▪ Cifukwa wuli Yesu wakucezga na ŵakwananga?