Cipaturo 8

Kucimbira Themba Lankhaza

YOSEFE wakuwuska Mariya kuti wamuphalire nkhani yaluŵiro. Mungelo wa Yehova wamuwonekera, ndipo wamuphalira kuti: “Wuka, tora mwana na nyina ndipo ucimbilire ku Eguputo, ndipo ukakhale kwenekura mpaka nikuphalire kuti uwereko; pakuti Herode wali pafupi kupenja mwana kuti wamukome.”

Mwaluŵiro, wose ŵatatu ŵakucimbira. Ndipo ŵacita makora, cifukwa Herode wamanya kuti ŵakumanya vya nyenyezi ŵamupusika ndipo ŵawelera kukwawo. Kumbukani kuti ŵakenera kuwelera kwa iyo na kumuphalira uko Yesu wali. Herode wakwiya comene. Ntheura pakukhumba kuti wakome Yesu, wakulangura kuti ŵasepuka wose mu Betelehemu na vigaŵa vyake ŵa vilimika viŵiri kukhilira pasi ŵakomeke. Wakusankha ŵana ŵa msinkhu uwu cifukwa ca ivyo ŵakumanya vya nyenyezi ŵakufuma Kuvuma ŵakamuphalira.

Nchinthu cakucitiska citima comene kuwona ŵana ŵasepuka wose ŵakukomeka. Ŵasilikari ŵa Herode ŵakuseca nyumba na nyumba. Ndipo para ŵasanga mwana msepuka, ŵakumukwacapura mu mawoko gha nyina. Tikumanya yayi unandi wa ŵana awo ŵasilikari ŵakoma, kweni ciliro cikuru na citengero ca ŵanyinawo vikufiska ucimi wa mu Baibolo wakulembeka na nchimi ya Ciuta, Yeremiya.

Pa nyengo iyi, Yosefe na mbumba yake ŵafika makora ku Eguputo, ndipo sono ŵakukhala kwenekura. Kweni mu usiku unyake, mungelo wa Yehova wakumuwonekeraso Yosefe mu loto. Mungelo wakuti: “Wuka, tora mwana na nyina ndipo ulutenge ku caru ca Israyeli, cifukwa awo ŵakapenjanga umoyo wa mwana ŵali kufwa.” Ntheura pakufiska ucimi unyake wa mu Baibolo uwo ukuyowoya kuti Mwana wa Ciuta wazamucemeka kufuma mu Eguputo, mbumba iyi yikuwelera kukwawo.

Panji Yosefe wakukhumba kukhala ku Yudeya, uko ŵakakhalanga pakwamba mu msumba wa Betelehemu pambere ŵandalute ku Eguputo. Kweni wakupulika kuti mwana muheni wa Herode, Arikelawu, ndiyo ni themba la Yudeya, ndipo Yehova wakumucenjezga mu loto linyake za ulwani uwu. Ntheura Yosefe na mbumba yake ŵakuluta kumpoto na kukhala mu tawuni ya Nazarete ku Galileya. Yesu wakukulira mu tawuni iyi, iyo yili kutali na cinyina ca cisopa ca Ŵayuda. Mateyu 2:13-23; Yeremiya 31:15; Hoseya 11:1.

▪ Ŵakumanya vya nyenyezi ŵati ŵaleka kwendera kwa Themba Herode, kasi nchinthu wuli cakofya ico iyo wakucita, kweni Yesu wakuvikilirika wuli?

▪ Wati wawera ku Eguputo, cifukwa wuli Yosefe wakukhalaso mu Betelehemu yayi?

▪ Ni maucimi wuli gha mu Baibolo agho ghakufiskika mu nyengo iyi?