Cipaturo 29

Kucita Milimo Yiwemi pa Sabata

NI MWEZI wa Malici panji Epulero mu 31 C.E. Pajumpha myezi yicoko waka kufuma apo Yesu wakayowoyera na mwanakazi pa cisimi mu Samariya pakufuma ku Yudeya kuya ku Galileya.

Sono wati wasambizga nyengo yitali mu Galileya, Yesu wakufumakoso wakuya ku Yudeya, uko wakupharazga mu masunagoge. Baibolo likuyowoya vinandi vya uteŵeti wa Yesu mu Galileya, kuluska ivyo wakucita mu Yudeya pa ulendo uwu ndiposo mu myezi iyo wakaŵira mu malo agha pamanyuma pa Paska ilo lajumpha. Ukaboni ukulongora kuti ŵanthu mu Yudeya ŵakuŵikako mahara viŵi yayi ku ivyo Yesu wakucita pakuyaniska na umo ŵakucitira ku Galileya.

Yesu wanyamuka kuya ku Yerusalemu, uwo ni msumba ukuru wa Yudeya, kuti wakacite Paska la 31 C.E. Mu Yerusalemu, pa Cipata ca Mberere, pali ciziŵa cakucemeka Betizata, apo ŵanthu ŵanandi ŵalwari, ŵacibulumutira na ŵakupendera ŵakwiza. Iwo ŵakugomezga kuti munthu wangacira para wabira mu maji gha mu ciziŵa para ghavundulika.

Ni Sabata, ndipo Yesu wakuwona munthu pafupi na ciziŵa ici uyo walwara kwa vilimika 38. Pakumanya kuti munthu uyu walwara nyengo yitali, Yesu wakumufumba kuti: “Kasi ukukhumba kucira?”

Iyo wakumuzgora Yesu kuti: “Dada, nilije munthu wakuti waniŵike mu ciziŵa para maji ghavundulika; kweni para nkhwiza, munyake wakukhiliramo panthazi pane.”

Yesu wakumuphalira kuti: “Wuka, nyamura kasalasala wako na kwenda.” Nyengo yeneyiyo munthu uyu wakucira, wakunyamura kasalasala wake, na kwamba kwenda.

Kweni Ŵayuda ŵati ŵamuwona munthu uyu, ŵakuti: “Ni Sabata, nchakuzomerezgeka cara kuti uyeghe kasalasala.”

Munthu uyu wakuŵazgora kuti: “Uyo wanicizga ndiyo wanguti kwa ine, ‘Nyamura kasalasala wako na kwenda.’”

Iwo ŵakuti: “Ni njani munthu uyo wangukuphalira kuti, ‘Nyamura kasalasala na kwenda’?” Yesu wangung’anamukira kunyake mu mzinda, ndipo uyo wacizgika wangulimanya yayi zina la Yesu. Ndipouli, Yesu na munthu yura ŵakumanaso mu tempele, ndipo munthu uyu wamanya kuti Yesu ndiyo wamucizga.

Ntheura munthu wakucizgika uyu wakuwona Ŵayuda na kuŵaphalira kuti Yesu ndiyo wamucizga. Pakupulika ici, Ŵayuda ŵakuluta kwa Yesu. Kasi ŵamucitaci? Kasi ŵakukhumba kuti ŵakamanye nkhongono izo wakucitira vinthu vyakuzizwiska ivi? Yayi. Kweni ŵakukhumba kukamusanga kafukwa pakuti wakucita vinthu viwemi ivi pa Sabata. Ndipo ŵakwamba na kumutambuzga wuwo. Luka 4:44; Yohane 5:1-16.

▪ Kasi pajumpha nyengo yitali wuli kufuma apo Yesu wakizira ku Yudeya?

▪ Cifukwa wuli ciziŵa ico cikucemeka Betizata nchakumanyikwa comene?

▪ Kasi Yesu wakucita munthondwe wuli pa ciziŵa, ndipo Ŵayuda ŵakucita wuli?