Cipaturo 122

Kufuma kwa Pilato Ŵakuya Nayo kwa Herode na Kuweleraso kwa Pilato

NANGAULI Yesu wakukhumba yayi kumubisira Pilato kuti iyo ni themba, wakulongosora kuti Ufumu wake ngwakwimikana na Ŵaroma yayi. Yesu wakuti: “Ufumu wane ngwa caru cino cara. Ufumu wane uŵenge wa caru cino mphanyi ŵateŵeti ŵane ŵarwa nkhondo kuti nileke kupelekeka ku Ŵayuda. Kweni umo uliri, ufumu wane ngwakufuma ku caru cino cara.” Ntheura Yesu wakuzomerezga katatu kuti wali na Ufumu, nangauli ngwakufuma ku caru capasi yayi.

Kweni Pilato wakulutilira kumufumba, wakuti: “Ipo kasi ndiwe themba?” Ndiko kuti, kasi ndiwe themba nangauli Ufumu wako ngwa caru ici yayi?

Yesu wakuzomera kuti Pilato waneneska, apo wakuti: “Iwe wamwene ukuyowoya kuti ndine themba. Pakuti ici ndico nkhababikira, ndipo ici ndico nkhizira mu caru, kuti nicitire ukaboni unenesko. Waliyose uyo wali ku cigaŵa ca unenesko wakupulika mazgu ghane.”

Enya, cilato ico Yesu wali kwizira pa caru capasi nkhucitira ukaboni “unenesko,” comenecomene wakukhwaskana na Ufumu wake. Yesu ngwakunozgeka kukhozgera unenesko uwu nanga wangakomekerapo. Nangauli Pilato wakufumba kuti: “Kasi unenesko nchivici?” wakukhazga kuti wamulongosolerenge vinyake yayi. Ivyo wapulika ni vinandi mwakuti vingamovwira pakweruzga.

Pilato wakuwelera ku mzinda uwo ukulindilira pawaro. Yesu wakwenera kuti wali pafupi na iyo, apo Pilato wakuphalira ŵalara ŵa ŵasofi na awo ŵali nawo kuti: “Nkhusangamo mulandu cara mwa munthu uyu.”

Pakukwiya na udumuliro uwu, mizinda yikwamba kukosera kuti: “Wakuvundura ŵanthu mwa kusambizga mu Yudeya mose, kwambira ku Galileya mpaka kuno.”

Pilato wakwenera kuti wakuzizwa kuti Ŵayuda ŵakukhomeka kwambura fundo. Ntheura apo ŵalara ŵa ŵasofi na ŵanalume ŵalara ŵakulutilira kucemerezga, Pilato wakulazgira kwa Yesu na kufumba kuti: “Kasi ukupulika yayi unandi wa vinthu ivyo ŵakukupanikizgira?” Kweni Yesu wakuzgorapo yayi. Pilato wakuzizwa pakuwona kuti Yesu wali cete nangauli ŵanthu ŵakumuyowoyera viheni.

Wati wamanya kuti Yesu ni Mugalileya, sono Pilato wakusanga pakugwenthera. Muwusi wa mu Galileya, Herode Antipasi (mwana wa Herode Mukuru), wali mu Yerusalemu cifukwa ca Paska, ntheura Pilato wakutuma Yesu kwa iyo. Kumanyuma uku, Herode Antipasi wakadumura mutu wa Yohane Mbapatizi, ndipo wakati wapulika za milimo yaminthondwe iyo Yesu wakacitanga wakacita wofi. Wakaghanaghananga kuti Yesu wakaŵa Yohane uyo wakakomeka ndipo wawuskika ku ŵakufwa.

Sono Herode wakondwa comene kuti wawonenge Yesu. Ici nchifukwa cakuti wakufipira mtima umoyo wa Yesu yayi nesi kukhumba kumanya usange milandu iyo ŵakumupa njaunenesko. M’malo mwake, iyo wakukhumba waka kumuwona ndipo wakugomezga kuti Yesu wacitengepo munthondwe.

Ndipouli, Yesu wakukana kucitira Herode ivyo wakukhumba. Nakuti apo Herode wakumufumba, wakuyowoyapo cilicose yayi. Cifukwa ca kukhuŵara, Herode na ŵasilikari ŵake ŵakwamba kumuhoya Yesu. Ŵakumuvwalika laya lakugabuka na kumuseka. Kufuma apo, ŵakumutumaso kwa Pilato. Pa cifukwa ici, Herode na Pilato awo pakwamba ŵakatinkhananga, sono ŵakuŵa paubwezi.

Yesu wati wawerako, Pilato wakucema ŵalara ŵa ŵasofi, ŵawusi ŵa Ŵayuda, na ŵanthu wose pamoza, ndipo wakuti: “Mwangwiza na munthu uyu kwa ine kuti wakuciska ŵanthu kuwukira, ndipo wonani! nangumufumba panthazi pinu kweni mwa munthu uyu nasangamo kafukwa cara pa milandu iyo mukwiza nayo kwimikana nayo. Nakuti Herode nayo ntheura pera, cifukwa iyo wamuwezgera kwa ise; ndipo wonani! palije kanthu kakwenelera nyifwa ako kacitika na iyo. Ntheura nimuthyapulenge na kumufwatura.”

Ntheura kaŵiri kose, Pilato wakuti Yesu walije mulandu. Iyo ngwakukhumbisiska kumufwatura, pakuti wamanya kuti ŵasofi ŵamupeleka kwa iyo cifukwa ca sanji. Apo Pilato wakukhumba kufwatura Yesu, wakupulika fundo yinyake iyo yikumukhuŵilizga comene kuti wamufwature. Wacali pa citengo cake cakweruzgirapo, muwoli wake wakutuma uthenga, wakumuphalira kuti: “Mulekani munthu murunji uyo, pakuti nangusuzgika comene muhanya uno mu loto [nchakuwonekerathu kuti ndakufuma kwa Ciuta] cifukwa ca iyo.”

Kweni kasi Pilato wangacita wuli kuti wafwature munthu wambura mulandu uyu, nga umo wakughanaghanira? Yohane 18:36-38; Luka 23:4-16; Mateyu 27:12-14, 18, 19; 14:1, 2; Mariko 15:2-5.

▪ Kasi Yesu wakuzgora wuli fumbo lakukhwaskana na ufumu wake?

▪ Kasi Yesu wakacitiranga ukaboni “unenesko” wuli apo wakaŵa pa caru capasi?

▪ Kasi weruzgi wa Pilato ngwakuti wuli, ŵanthu wakucita wuli, ndipo nchivici ico Pilato wakucita na Yesu?

▪ Kasi Herode Antipasi ni njani, cifukwa wuli wakondwa kuwona Yesu, ndipo wakucita vici kwa iyo?

▪ Cifukwa wuli Pilato ngwakukhumbisiska kufwatura Yesu?