Cipaturo 113

Kujiyuyura pa Paska Laumaliro

PETROSI na Yohane, pakutumika na Yesu, ŵafika kale mu Yerusalemu kunozga vyakukhumbikwira pa Paska. Yesu pamoza na ŵapositole ŵanji khumi, ŵakwenera kuti ŵakufika kumise. Dazi likunjira apo Yesu na gulu lake ŵakukhira Lupiri lwa Maolive. Aka nkhaumaliro kuti Yesu wawone msumba kufuma pa lupiri ulu nyengo ya muhanya mpaka wazakawuke ku ŵakufwa.

Mwaluŵiro, Yesu na gulu lake ŵakufika mu msumba ndipo ŵakuluta ku nyumba iyo ŵamucitiramo Paska. Ŵakukwera masitepu kuya mu cipinda camucanya, uko ŵakusanga kuti vinthu vyose vyanozgeka kuti ŵacitire Paska kwaŵekha. Yesu walindilira cakucitika ici na kunweka, nga umo wakuyowoyera kuti: “Nanweka comene kurya paska ili pamoza na imwe pambere nindasuzgike.”

Mwakuyana na kaluso, pakuŵa nkhombo zinayi za vinyo zakuti ŵanthu ŵamweremo pa Paska. Wati wapoka iyo yikwenera kuti ni nkhombo yacitatu, Yesu wakuwonga na kuyowoya kuti: “Torani iyi ndipo pilanani yumoza na munyake pakati pa mwaŵene; cifukwa nkhumuphalirani kuti, Kufuma sono nimwengeso vyakufuma ku mpheska cara mpaka ufumu wa Ciuta wize.”

Apo ciphikiro ici cili mukati, Yesu wakunyamuka, wakuŵika pamphepete laya lake lakuwaro, wakutora thawulo, ndipo wakuzuzga maji mu beseni. Mwakuyana na kaluso ka Ŵayuda, mweneco wa nyumba ndiyo wakugeziska malundi gha ŵalendo. Kweni pakuti pa cakucitika ici mweneco wa nyumba palije, Yesu ndiyo wakucita uteŵeti uwu. Yumoza wa ŵapositole wakhumbenge mphanyi wangujipeleka kucita mulimo uwu, kweni panji cifukwa cakuti ŵacali kugazgana, palije nanga njumoza uyo wakucita ntheura. Soni zikuŵakora apo Yesu wakwamba kugeziska malundi ghawo.

Apo Yesu wakwiza kwa Petrosi, iyo wakukana, wakuti: “Malundi ghane mughageziskengepo cara.”

Yesu wakuti: “Kwambura kuti nakugeziska, uli pamoza na ine cara.”

Petrosi wakuti: “Fumu, malundi ghane pera cara, kweni mawoko na mutu wuwo.”

Yesu wakuzgora kuti: “Uyo wageza thupi lose wakukhumbikwira kugeziska malundi cara, kweni ngwakutowa fikepo. Ndipo imwe mwaŵanthu muli ŵakutowa, kweni mose cara.” Wakuyowoya ici cifukwa wakumanya kuti Yudasi Isikariyoti wakughanaghana vya kumwendera mphiska.

Yesu wati wamara kugeziska malundi gha wose 12, na gha Yudasi wuwo, uyo wakumwendera mphiska, wakuvwara malaya ghake ghakuwaro na kukhalaso pa thebulu. Ndipo wakufumba kuti: “Kasi mukumanya ico nacita kwa imwe? Imwe mukunicema, ‘Msambizgi,’ ndiposo ‘Fumu,’ ndipo mukuneneska, cifukwa ndimo niliri. Ntheura usange ine, nangauli nili Fumu na Msambizgi, nageziska malundi ghinu, ipo namwe mukwenera kugeziska malundi gha yumoza na munyake. Pakuti namupani cilongolero, kuti, nga ni umo ine nacitira kwa imwe, namwe ndimo mucitirenge. Nadi, nadi nkhumuphalirani, Muzga ni mukuru cara kuluska fumu yake, nesi uyo watumika ni mukuru kuluska uyo wamutuma. Usange mukumanya vinthu ivi, ŵakukondwa ndimwe usange mukuvicita.”

Ili ni sambiro liwemi comene pa nkhani ya kuteŵeterana mwakujiyuyura. Ŵapositole ŵakwenera yayi kupenja malo ghakwamba, kughanaghana kuti mbakuzirwa comene mwakuti ŵanji ŵaŵateŵeterenge nyengo zose. Ŵakwenera kulondezga ivyo Yesu waŵalongora. Ici cikung’anamura kugeziska malundi mwadango waka yayi. Kweni cikung’anamura kukhumbisiska kuteŵetera kwambura kusankha, nanga mulimo ungaŵa wapasi panji wambura kukondweska wuli. Mateyu 26:20, 21; Mariko 14:17, 18; Luka 22:14-18; 7:44; Yohane 13:1-17.

▪ Kasi capadera nchivici kuti Yesu wakuwona Yerusalemu apo wakunjira mu msumba uwu kukacita Paska?

▪ Pa Paska, kasi ni nkhombo nji iyo Yesu wakwenera kuti wakupeleka ku ŵapositole ŵake 12 wati wawonga?

▪ Kasi mbuteŵeti wuli uwo ukacitikanga ku ŵalendo apo Yesu wakaŵa pa caru capasi, ndipo cifukwa wuli ukacitika yayi pa Paska ilo Yesu na ŵapositole ŵake ŵakacita?

▪ Cifukwa wuli Yesu wakacita uteŵeti wapasi wa kugeziska malundi gha ŵapositole ŵake?