Cipaturo 85

Kupenja Ŵakuzgeŵa

YESU ngwakunweka kupenja na kusanga awo ŵangateŵetera Ciuta mwakujiyuyura. Ntheura wakupenja na kuyowoya vya Ufumu ku waliyose, na ku ŵakwananga wuwo. Ŵanthu ŵantheura sono ŵakusendelera kwa iyo kuti ŵapulike.

Pakuwona ici, Ŵafarisi na ŵalembi ŵakususka Yesu cifukwa ca kwenda na ŵanthu awo iwo ŵakuwona kuti mbambura kwenelera. Ŵakudandawura kuti: “Munthu uyu wakupokelera ŵakwananga na kurya nawo.” Iwo ŵakuwona kuti ici nchapasi comene. Ŵafarisi na ŵalembi ŵakuwona ŵanthu bweka nga ni cuvu ku malundi ghawo. Nakuti ŵakuŵacema na lizgu la Cihebere lakuti ‛am ha·’aʹrets, ndiko kuti “ŵanthu ŵapasi,” kulongora umo ŵakuŵatinkhira.

Kweni Yesu wakulongora nchindi, lusungu na ciwuravi kwa munthu waliyose. Pa cifukwa ici, ŵanandi ŵa ŵakuyuyulika aŵa, mbakunozgeka kupulikizga kwa iyo, nanga ni awo ŵakumanyikwa kuti mbakwananga. Kweni wuli pakuyowoya za ivyo Ŵafarisi ŵakususka Yesu vyakuti wakovwira ŵanthu awo iwo ŵakuwona kuti mbambura kwenelera?

Yesu wakuŵazgora na ntharika. Wakuyowoya ivyo Ŵafarisi ŵakughanaghana, wakuŵazunura nga ni para mbarunji na ŵakuvikilirika mu ciŵaya ca Ciuta, apo ŵanthu ŵakutinkhika, ‛am ha·’aʹrets ŵapuluka ndiposo mbakuzgeŵa. Pulikizgani apo wakufumba kuti:

“Ni munthu nju wa imwe uyo wali na mberere makumi khumi, para yimoza yazgeŵa, walekenge kusida makumi ghankhondi na ghanayi pacanya zinkhondi na zinayi (99) kumasinda mu mapopa na kuluta kukapenja yakuzgeŵa mpaka wayisange? Ndipo para wayisanga wakuyiŵika pa viŵegha vyake na kusekelera. Ndipo para wafika ku nyumba, wakucema ŵabwezi ŵake na ŵazengezgani ŵake pamoza, wakuti kwa iwo, ‘Sekelerani pamoza na ine, cifukwa nayisanga mberere yane iyo yikazgeŵa.’”

Ndipo Yesu wakuyowoya ng’anamuro la nkhani yake, wakulongosora kuti: “Nkhumuphalirani kuti ntheura ndimo kuzamuŵira cimwemwe cikuru kucanya pa wakwananga yumoza uyo wapera kuluska ŵarunji makumi ghankhondi na ghanayi pacanya ŵankhondi na ŵanayi (99) awo ŵakukhumbikwira kupera cara.”

Ŵafarisi ŵakujiwona kuti mbarunji ntheura kuti ŵakukhumbikwira kupera yayi. Apo ŵanji ŵa iwo ŵakasuskanga Yesu vilimika vicoko waka ivyo vyajumpha cifukwa ca kurya pamoza na ŵakusonkheska msonkho na ŵakwananga, wakaŵaphalira kuti: “Nkhiza kuzakacema ŵanthu ŵarunji cara, kweni ŵakwananga.” Ŵafarisi ŵakujirunjiska aŵa, awo ŵakutondeka kuwona kuti ŵakukhumbikwira kupera, ŵakupangiska kuti kucanya kuŵavye cimwemwe. Kweni kucanya kukuŵa cimwemwe cifukwa ca awo ŵapera nadi.

Pakukhumba kukhozgera fundo yakuti para wakwananga yumoza uyo wazgeŵa wawera kukuŵa cimwemwe cikuru, Yesu wakuyowoya ntharika yinyake. Wakuti: “Ni mwanakazi nju uyo wali na madirakima khumi, usange dirakima limoza lazgeŵa, wakuleka kukozga nyali na kuphyera nyumba yake na kupenja makoramakora mpaka walisange? Ndipo para walisanga wakucema ŵanakazi awo mbabwezi ŵake na ŵazengezgani pamoza, wakuti, ‘Sekelerani pamoza na ine, cifukwa nalisanga dirakima ilo likazgeŵa.’”

Ndipo Yesu wakulongosoraso ng’anamuro la nga ni ilo walongosora kale. Wakuti: “Ntheura nkhumuphalirani kuti, ndimo pakuŵira cimwemwe pakati pa ŵangelo ŵa Ciuta pa wakwananga yumoza uyo wapera.”

Ŵangelo ŵa Ciuta ŵakufipira mtima nadi ŵakwananga ŵakuzgeŵa. Ici cili ntheura, comene pakuti ŵanthu ŵapasi na ŵakuyuyulika, ŵa ‛am ha·’aʹrets, paumaliro ŵakuŵa ŵakwenelera Ufumu wakucanya wa Ciuta. Pa cifukwa ici, ŵakupika mulimo ukuru kucanya kuluska wa ŵangelo. Kweni m’malo mwa kuŵa na sanji panji kujipulika ŵakuyuyulika, ŵangelo ŵakumanya kuti ŵanthu ŵakwananga aŵa ŵasangana na masuzgo mu umoyo na kughatonda, ivyo viŵawovwirenge kuŵa mathemba na ŵasofi ŵacisungusungu kucanya. Luka 15:1-10; Mateyu 9:13; 1 Ŵakorinte 6:2, 3; Uvumbuzi 20:6.

▪ Cifukwa wuli Yesu wakupokelera ŵakwananga, ndipo Ŵafarisi ŵakumususka wuli?

▪ Kasi Ŵafarisi ŵakuŵawona wuli ŵanthu bweka?

▪ Kasi ni ntharika wuli izo Yesu wakuyowoya, ndipo zikutisambizga vici?

▪ Cifukwa wuli nchapadera kuti ŵangelo ŵakusekelera?