Cipaturo 31

Kupulura Mphonje za Tirigu pa Sabata

MWALUŴIRO, Yesu na ŵasambiri ŵake ŵakufumamo mu Yerusalemu na kuwelera ku Galileya. Ni nyengo ya pakati pa Malici na Epulero, ndipo mu minda muli mphonje za tirigu. Ŵasambiri ŵali na njara. Ntheura ŵakupulura mphonje za tirigu na kurya. Kweni pakuti ni Sabata, ŵanthu ŵakuzizwa na ivyo ŵakucita.

Ŵalongozgi ŵa cisopa mu Yerusalemu ŵakukhumba nakale kumukoma Yesu cifukwa ŵakuti wakuswa Sabata. Sono Ŵafarisi ŵakuwuska mulandu, ŵakuti: “Wonani! Ŵasambiri ŵinu ŵakucita ico nchambura kuzomerezgeka kucita pa sabata.”

Ŵafarisi ŵakuti kupulura mphonje, kupikisa mu mawoko na kurya vikuyana waka na kuvuna na kupwantha. Kweni nchinonono kusunga dango la Sabata, cifukwa ca umo ŵakulongosolera ng’anamuro la kugwira nchito pa zuŵa ili. Ndipouli, Sabata yikeneranga kuŵa nyengo yakukondweska ndiposo yakukhozgerana mwauzimu. Ntheura Yesu wakuŵasuska, wakuzunura nkhani ya mu Malemba kulongora kuti khumbo la Yehova Ciuta ndakuti dango lake la Sabata liŵenge lakufyenya nthena yayi.

Yesu wakuyowoya kuti apo Davide na ŵanalume awo wakaŵa nawo ŵakaŵa na njara, ŵakapumura pa cihema na kurya vingwa vyakulongora. Vingwa ivi vikaŵa vyakuti ŵawuskapo kale pamaso gha Yehova, na kuwezgerapo viphya. Ndipo ivyo ŵakawuskapo vikasungikira ŵasofi kuti ŵarye. Kweni, kuyana na umo vinthu vikaŵira, Davide na ŵanalume ŵake ŵakati ŵarya vingwa ivi, ŵakasuskika cara.

Yesu wakuyowoya ciyelezgero cinyake, wakuti: “Kasi mundaŵazge mu Dango kuti pa sabata ŵasofi mu tempele ŵakucita ngati sabata ndambura kupatulika ndipo ŵakuŵa ŵambura mulandu nipera?” Enya, nanga pangaŵa pa Sabata, ŵasofi ŵakulutilira kukoma nyama izo ŵakupeleka sembe pa tempele. Yesu wakuti: “Kweni nkhumuphalirani kuti mukuru wakuluska tempele wali pano.”

Pakucenjezga Ŵafarisi, Yesu wakulutizga kuti: “Mupulikiskenge ng’anamuro la ici, ‘Nkhukhumba cisungusungu, sembe cara,’ mphanyi mwaŵasuska cara ŵambura mulandu.” Ndipo wakumalizga kuti: “Cifukwa Mwana wa munthu ndiyo ni Fumu ya sabata.” Kasi apa Yesu wakung’anamura vici? Yesu wakuyowoya za muwuso wake wamtende wa vilimika cikwi.

Kwa vilimika 6,000 sono, ŵanthu ŵasuzgika comene na Satana Dyabulosi. Vitimbaheti na nkhondo ndivyo mbumoyo waka. Kweni Sabata likuru la muwuso wa Khristu yizamuŵa nyengo ya kupumura ku masuzgo ndiposo kufyenyerezgeka. Mateyu 12:1-8; Leviticus 24:5-9; 1 Samuel 21:1-6; Maŵazgo 28:9; Hoseya 6:6.

▪ Kasi ŵasambiri ŵa Yesu ŵapika mulandu wuli, ndipo Yesu wakuzgora wuli?

▪ Kasi Yesu wakuvumbura kuti Ŵafarisi mbakutondeka wuli?

▪ Kasi Yesu ni “Fumu ya sabata” mu nthowa wuli?