Cipaturo 131

Kuwoneka Kaumaliro, na Pentekoste 33 C.E.

PA NYENGO yinyake, Yesu wakupangana na ŵapositole ŵake wose 11 kuti ŵakakumane nayo pa lupiri mu Galileya. Ŵasambiri ŵanyake nawo ŵakwenera kuti ŵaphalirika za ungano uwu, ndipo ŵanthu ŵakujumpha 500 ŵakuwungana. Ŵanthu aŵa ŵakukondwa comene na ungano uwu apo ŵakuwona Yesu wakwiza na kwamba kuŵasambizga.

Apo wakusambizga, Yesu wakulongosolera mzinda kuti Ciuta wamupa mazaza ghose kucanya na pa caru capasi. Ndipo wakuŵaciska kuti: “Ntheura, lutaninge mukazgore ŵanthu ŵa mitundu yose kuŵa ŵasambiri, kuŵabapatiza mu zina la Ŵadada na la Mwana na la mzimu utuŵa, kuŵasambizga kusungilira vinthu vyose ivyo namulangulirani.”

Wonani fundo iyi. Ŵanalume, ŵanakazi na ŵana wuwo, wose ŵakutumika kucitako mulimo wa kuzgora ŵanthu kuŵa ŵasambiri. Ŵakususka ŵayezgenge kulekeska mulimo wa kupharazga na kusambizga, kweni Yesu wakuŵakhwimiska, wakuti: “Wonani! Ine nili namwe mazuŵa ghose mpaka umaliro wa mgonezi.” Yesu wali nawo ŵalondezgi ŵake kwizira mu mzimu utuŵa, kuŵawovwira kuti ŵafiske uteŵeti wawo.

Yesu wajilongora ku ŵasambiri ŵake kuti ngwamoyo, kwa mazuŵa ghakukwana 40 kufuma apo wakawukira. Nyengo zose apo wakukumana nawo, wakuŵaphalira vya Ufumu wa Ciuta, na kuŵalongosolera mulimo wawo pakuŵa ŵasambiri ŵake. Pa nyengo yinyake wakuwoneka nanga nkhwa munung’una wake Yakobe uyo pakwamba wakaŵa wambura kupulikana ndipo wakumukhorweska kuti iyo ni Khristu nadi.

Vikuwoneka kuti apo ŵapositole ŵacali mu Galileya, Yesu wakuŵaphalira kuti ŵawelere ku Yerusalemu. Apo wakukumana nawo kwenekura, wakuŵaphalira kuti: “Mungafumangamo cara mu Yerusalemu, kweni mulindilirenge ico Ŵadada ŵali kulayizga, ico mukapulika kwa ine; cifukwa Yohane wakabapatiza nadi na maji, kweni imwe muzamubapatizika mu mzimu utuŵa mazuŵa ghanandi cara kufuma apa.”

Kufuma pa nyengo iyi, Yesu wakukumanaso na ŵapositole ŵake na kuŵalongozgera kuwaro kwa msumba, wakufika nawo ku Betaniya, muzi uwo uli kuvuma kwa Lupiri lwa Maolive. Cakuzizika nchakuti, nangauli Yesu walongosora makora kuti sonosono apa wakwerenge kucanya, iwo ŵacali kugomezga kuti Ufumu wake uŵenge pa caru capasi. Ntheura ŵakufumba kuti: “Fumu, kasi mukuwezgera ufumu kwa Israyeli pa nyengo iyi?”

M’malo mwakuti waŵawovwireso kuti ŵapulikiske, Yesu wakuzgora waka kuti: “Nkhwa imwe cara kumanya zinyengo panji mazuŵa ghakwimikika agho Ŵadada ŵaŵika pasi pa mazaza ghawo.” Ndipo wakuyowoyaso mulimo uwo ŵakwenera kucita, wakuti: “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane mu Yerusalemu na mu Yudeya mose na Samariya ndiposo ku vigaŵa vyakutali comene vya caru capasi.”

Uku ŵacali kulaŵiska, Yesu wakwamba kukwelera kucanya, ndipo bingu likumusikizga. Wati wavura thupi lawunthu, Yesu wakukwelera kucanya na thupi lauzimu. Apo ŵapositole 11 ŵakudodoliska kucanya, ŵanalume ŵaŵiri awo ŵavwara vituŵa ŵakuwoneka pafupi na iwo. Ŵangelo aŵa, ŵakuwoneka na mathupi gha ŵanthu, ndipo ŵakufumba kuti: “Ŵanalume ŵa mu Galileya, cifukwa wuli mukwimilira na kulaŵiska ku mtambo? Yesu uyu, mweneuyo watolekera kucanya kufuma kwa imwe kuya mu mtambo, wazamwizaso mwakuyana waka umo mwamuwonera wakukwelera mu mtambo.”

Umo Yesu wakwelera kucanya, ŵanthu ŵanandi ŵandamanye, kweni ŵasambiri ŵake ŵakugomezgeka mbwenu. Ntheura ndimo wazamwiziraso, kwambura ŵanthu kumanya, kweni ŵalondezgi ŵake ŵakugomezgeka ndiwo ŵazamumanya kuti wawera ndipo walipo mu nkhongono za Ufumu.

Sono ŵapositole ŵakukhira mu Lupiri lwa Maolive, ŵakujumpha Dambo la Kidroni na kunjiraso mu Yerusalemu. Ŵakukhala mwenemura pakupulikira ivyo Yesu wakaŵaphalira. Pati pajumpha mazuŵa khumi, pa Ciphikiro ca Ŵayuda ca Pentekoste 33 C.E., apo ŵasambiri pafupifupi 120 ŵakuwungana mu cipinda camucanya mu Yerusalemu, mphomo yikuru nga nkhuputa kwa mphepo yankhongono yikuzuzga nyumba yose. Ndipo malulimi nga gha moto ghakuwoneka, ghakukhala pa mutu wa msambiri waliyose uyo walimo, ndipo iwo ŵakwamba kuyowoya mu viyowoyero vyakupambanapambana. Apa, mzimu utuŵa uwo Yesu wakalayizga wapungulika. Mateyu 28:16-20; Luka 24:49-52; 1 Ŵakorinte 15:5-7; Milimo 1:3-15; 2:1-4.

▪ Kasi Yesu wakulayirana na ŵanjani pa lupiri mu Galileya, ndipo wakuŵaphalira vici?

▪ Kasi Yesu wakuŵakhwimiska wuli ŵasambiri ŵake, ndipo waŵenge nawo wuli?

▪ Kasi Yesu wakuwoneka kalinga ku ŵasambiri ŵake kufuma apo wakawuskikira, ndipo wakuŵasambizga vici?

▪ Kasi Yesu wakuwonekera kwa njani uyo wakaŵa msambiri wake yayi pambere iyo wandafwe?

▪ Kasi ni maungano wuli ghaŵiri agho Yesu wakucita na ŵapositole ŵake, ndipo nchivici cikucitika pa maungano agha?

▪ Kasi cikung’anamuraci kuti Yesu wazamwizaso mwakuyana waka na umo wakwelera?

▪ Nchivici cikucitika pa Pentekoste 33 C.E.?