Cipaturo 91

Lazaro Wakuwuskika

YESU pamoza na awo ŵakwenda nayo, ŵafika ku dindi la Lazaro. Ni mphanji iyo pa mulyango ŵajarapo libwe. Yesu wakuti: “Wuskanipo libwe.”

Marita wakukana, wacali wandapulikiske ivyo Yesu wakukhumba kucita. Wakuti: “Fumu, sono wakwenera kuti wakununkha, cifukwa ili ni zuŵa lacinayi.”

Kweni Yesu wakumufumba kuti: “Asi nangukuphalira kuti usange ukugomezga uwonenge ucindami wa Ciuta?”

Ntheura ŵakufumyapo libwe. Yesu wakwinuska maso kucanya na kulomba kuti: “Ŵadada, nkhumuwongani kuti mwanipulika. Mbunenesko, nkhumanya kuti nyengo zose mukunipulika; kweni nayowoya cifukwa ca mzinda uwo wimilira pafupi, mwakuti ugomezge kuti imwe muli kunituma.” Yesu wakulomba pakweru mwakuti ŵanthu ŵamanye kuti ivyo wali pafupi kucita vifiskikenge mu nkhongono za Ciuta. Ndipo wakucemerezga na lizgu likuru kuti: “Lazaro, fuma!”

Penepapo Lazaro wakufuma. Mawoko ghake na malundi ghacali ghakukakika na sanda, ndipo cisko cake nchakuvungika na salu. Yesu wakuti: “Musuturani ndipo mulekani walutenge.”

Pakuwona munthondwe uwu, Ŵayuda ŵanandi awo ŵakiza kuzakasanguluska Mariya na Marita ŵakupulikana mwa Yesu. Ndipouli, ŵanji ŵakuluta kukaphalira Ŵafarisi ivyo vyacitika. Nyengo yeneyiyo, Ŵafarisi na ŵalara ŵa ŵasofi ŵakupanga ungano wa mphara yikuru ya Ŵayuda, yakucemeka Sanihedirini.

Mu Sanihedirini muli musofi mukuru Kayafa, kweniso Ŵafarisi na Ŵasaduki, ŵalara ŵa ŵasofi, ndiposo awo kale ŵakaŵa ŵasofi ŵakuru. Aŵa ŵakudandawura kuti: “Kasi ticiteci, cifukwa munthu uyu wakucita vimanyikwiro vinandi? Usange tikumuleka waka ntheura, wose ŵapulikanenge mwa iyo, ndipo Ŵaroma ŵizenge na kupoka malo ghithu na mtundu withu wuwo.”

Nangauli ŵalongozgi ŵa cisopa ŵakuzomera kuti Yesu “wakucita vimanyikwiro vinandi,” kweni ico ŵakufipa naco mtima comene ni udindo na mazaza ghawo. Pakuti Lazaro wawuskika, Ŵasaduki nkhongono zaŵamalira cifukwa iwo ŵakugomezga yayi kuti kuli ciwuka.

Kayafa, uyo panji njumoza wa Ŵasaduki, wakuyowoyapo, wakuti: “Mukumanya cilicose cara, ndipo mukughanaghana cara kuti nchacandulo kwa imwe kuti munthu yumoza wafwire ŵanthu wose, kuti mtundu wose uleke kuparanyika.”

Ciuta ndiyo wakacitiska Kayafa kuyowoya mazgu agha, pakuti mpositole Yohane pamanyuma wakalemba kuti: “Ndipouli, [Kayafa] wakayowoya vya mu mutu wake cara.” Comene ico Kayafa wakung’anamura nchakuti Yesu wakomeke mwakuti waleke kulutilira kuyuyura udindo wawo na mazaza. Kweni mwakuyana na Yohane, ‘Kayafa wakacima kuti Yesu wakwenera kufwira mtundu pera yayi, kweniso kuti ŵana ŵa Ciuta ŵawunganyike pamoza.’ Nadi, ni khumbo la Ciuta kuti Mwana wake wafwe kuŵa ciwombolero ca wose.

Cifukwa ca mazgu gha Kayafa, Sanihedirini yikupangana kuti yikome Yesu. Kweni Yesu wati wamanya za ivi, kwizira mwa Nikodemo, yumoza wa Sanihedirini uyo wakumutemwa, wakufumako ku malo agha. Yohane 11:38-54.

▪ Cifukwa wuli Yesu wakulomba pakweru pambere wandawuske Lazaro?

▪ Kasi nchivici ico awo ŵakuwona apo Lazaro wakuwuskika ŵakucita?

▪ Kasi nchivici cikulongora kuti ŵanthu ŵa mu Sanihedirini mbaheni?

▪ Kasi cilato ca Kayafa cikaŵa cakuti wuli, kweni Ciuta wakamupangiska kuti wacime vici?