Cipaturo 47

Masozi Ghazgoka Cimwemwe Cikuru

YAYIRO wati wawona kuti mwanakazi uyo wasuluranga ndopa wacira, kwambura kukayika, cigomezgo cake cakuti Yesu wali na nkhongono zakucitira minthondwe cikusazgikira. Ku mulenji, Yayiro wangupempha Yesu kuti walute ku nyumba yake na kovwira mwana wake msungwana wa vilimika 12, uyo wakhala pa singo pera. Ndipouli, ico Yayiro wakopa ndico cikucitika. Apo Yesu wacali kuyowoya na mwanakazi, ŵanthu ŵanyake ŵakwiza na kuphalira Yayiro pasipasi kuti: “Mwana wako msungwana wafwa! Cifukwa wuli ukumusuzgaso msambizgi?”

Nkhani iyi njakugulura nkhongono comene! Ghanaghanani waka: Munthu uyu, mweneuyo ngwakucindikika comene mu cikaya, sono apo wakupulika za nyifwa ya mwana wake, wakusoŵa pakukora. Ndipouli, Yesu wakupulikako ivyo ŵakudumbiskana. Ntheura pakung’anamukira kwa Yayiro, wakumukhozga kuti: “Kopa cara, kweni uŵe na cipulikano.”

Yesu wakulongozgana na munthu wacitima uyu kuya ku nyumba yake. Ŵati ŵafika, ŵakusanga ŵanthu ŵakulira na kutengera comene. Mzinda wa ŵanthu wawungana, ndipo ukujitimba cifukwa ca citima. Yesu wati wanjira mu nyumba, wakufumba kuti: “Cifukwa wuli mukucitiska kapomezi na kulira? Mwana wandafwe, kweni wakugona.”

Pakupulika ici, ŵanthu ŵakwamba kumuseka Yesu mwamsinjiro cifukwa ŵakumanya kuti msungwana wafwa nadi. Ndipouli, Yesu wakuti msungwana wakugona waka tulo. Na nkhongono izo Ciuta wali kumupa, walongorenge kuti nchipusu kuti ŵanthu ŵaŵeso ŵamoyo nga ni para ŵakuwuskika mu tulo tukuru.

Sono Yesu wakufumiskira waliyose kuwaro, kulekapo Petrosi, Yakobe, Yohane, ndiposo adada na amama ŵa msungwana wakufwa. Ndipo wakutora ŵanthu ŵankhondi aŵa kuya nawo apo msungwana wagonekeka. Wati wakora woko la msungwana, Yesu wakuti: “Talita kumi,” agho ghakung’anamulika kuti: “Msungwana, nkhukuphalira, Wuka!” Ndipo nyengo yeneyiyo msungwana wakuwuka na kwamba kwenda! Pakuwona ici, ŵapapi ŵake ŵakukondwa comene.

Wati waŵaphalira kuti ŵamupe cakurya mwana, Yesu wakulangura Yayiro na muwoli wake kuti ŵaleke kuphalira waliyose ico cacitika. Nangauli Yesu wayowoya nthena, nkhani iyi yikuthandazgika mu cigaŵa cose cira. Aka nkhaciŵiri kuti Yesu wawuske munthu ku ŵakufwa. Mateyu 9:18-26; Mariko 5:35-43; Luka 8:41-56.

▪ Kasi Yayiro wakupulika nkhani wuli, ndipo Yesu wakumukhozga wuli?

▪ Apo iwo ŵakufika pa nyumba ya Yayiro, kasi ŵanthu ŵakucita vici?

▪ Cifukwa wuli Yesu wakuyowoya kuti mwana wakufwa wakugona waka tulo?

▪ Kasi ŵanthu ŵankhondi awo ŵakuwonelera Yesu wakuwuska mwana mbanjani?