Cipaturo 10

Maulendo gha ku Yerusalemu

NYENGO ya vuna yafika. Ndipo ni nyengo iyo mbumba ya Yosefe, pamoza na ŵabwezi na ŵabali, ŵakulutira ku Yerusalemu cilimika cilicose kukacita ciphikiro ca Paska. Wose mbakukondwa apo ŵakwambapo ulendo uwu wa makilomita pafupifupi 100. Sono Yesu wali na vilimika khumi na viŵiri, ndipo ngwakunweka comene na ciphikiro ici.

Kwa Yesu pamoza na mbumba yakwake, ciphikiro ca Paska ncha zuŵa limoza pera yayi. Para Paska lamara, ŵakukhalira kuti ŵacite Ciphikiro ca Vingwa Vyambura Cilungo ca mazuŵa ghankhondi na ghaŵiri, ico ŵakuciwona kuŵa cigaŵa ca Paska. Pa cifukwa ici, ulendo wose, kufuma ku Nazarete, ndiposo kukhala mu Yerusalemu, ukutora pafupifupi sabata ziŵiri. Kweni cilimika ici, cifukwa ca vinthu vinyake ivyo Yesu wakucita, mazuŵa ghakusazgikirako.

Suzgo likusangika apo ŵakuwerako ku Yerusalemu. Yosefe na Mariya ŵakughanaghana kuti Yesu wali mukati mu ŵabali ŵawo na ŵabwezi awo ŵali nawo lumoza. Ndipouli, apo ŵakupumura kuti ŵagone wakuwoneka yayi, ndipo ŵakwamba kufumbilira ku ŵanyawo awo ŵakwenda nawo. Iyo wakusangika yayi. Ntheura Yosefe na Mariya ŵakuwelera ku Yerusalemu kuti ŵakamupenje.

Ŵamupenja zuŵa lose, kweni ŵakumusanga yayi. Zuŵa laciŵiri nalo wakusangika yayi. Paumaliro, pa zuŵa lacitatu, ŵakuluta ku tempele. Ŵati ŵafika mu tempele, ŵakumusanga Yesu wali pakati pa ŵasambizgi ŵa Ŵayuda, mu cimoza ca vipinda, ndipo wakuŵapulikizga na kuŵafumba.

Mariya wakufumba kuti: “Wamwana, wacitiraci nase nthena? Wona, ŵawuso na ine pakusuzgika maghanoghano takupenjanga.”

Yesu wakuzizwa pakupulika kuti ŵamanyanga yayi uko ŵangamusanga. Wakufumba kuti: “Cifukwa wuli mwanipenjanga? Kasi mwamanyanga cara kuti nkhwenera kuŵa mu nyumba ya Ŵadada?”

Yesu wakupulikiska yayi ico ŵapapi ŵake ŵangutondekera kumanya fundo iyi. Penepapo Yesu wakuwelera kukwawo pamoza na ŵapapi ŵake ndipo wakulutilira kujilambika kwa iwo. Wakulutilira kukura mu vinjeru na mu msinkhu kweniso mu kutemweka na Ciuta na ŵanthu. Enya, kufuma ku wanici wake, Yesu wakulongora kuti nchakuzirwa comene kupenja dankha vinthu vyauzimu kweniso kucindika ŵapapi. Luka 2:40-52; 22:7.

▪ Kasi ni ulendo wuli uwo Yesu na mbumba yakwake ŵakuŵa nawo nyengo zose, ndipo ukuŵa wa mazuŵa ghalinga?

▪ Kasi apo Yesu wali na vilimika 12, nchivici cikucitika pa ulendo wawo?

▪ Kasi ŵawukirano mazuŵa ghano ŵakusambiraci kwa Yesu?