Cipaturo 1

Mauthenga Ghakufuma Kucanya

BAIBOLO lose ni uthenga wakufuma kucanya, wakupelekeka na Ŵadada ŵithu ŵakucanya kuti ŵatisambizge. Ndipouli, pali mauthenga ghaŵiri ghapadera agho ghakapelekeka pafupifupi vilimika 2,000 ivyo vyajumpha na mungelo uyo “wakwimilira pafupi panthazi pa Ciuta.” Zina la mungelo uyu ni Gabriyeli. Tiyeni tiwone umo vinthu vikaŵira apo maulendo ghaŵiri ghakuzirwa agha ghakacitikira ku caru capasi.

Ni mu cilimika ca 3 B.C.E. Mu mizi ya ku mapiri gha Yudeya, kufupi na Yerusalemu, mukukhala musofi wa Yehova zina lake Zekariya. Munthu uyu ni mucekuru, ndipo muwoli wake, Elizabeti, nayo ni mucekuru. Ndipo ŵalije ŵana. Zekariya wakucita mulimo wake wausofi mu tempele la Ciuta mu Yerusalemu. Apo wali mukati, Gabriyeli wakuwonekera cadera kumalyero kwa jochero la vyakununkhira.

Zekariya wofi ukumukora comene. Kweni Gabriyeli wakumukhwimiska, wakuti, “Kopa cara Zekariya, cifukwa luŵeyelero lwako lwapulikikwa, ndipo muwoli wako Elizabeti wakubabirenge mwana msepuka, ndipo zina lake umuthyenge Yohane.” Gabriyeli wakulutilira kuyowoya kuti Yohane “wazamuŵa mukuru panthazi pa Yehova” kweniso kuti ‘wazamunozgera Yehova ŵanthu ŵakunozgeka.’

Ndipouli, Zekariya wakugomezga yayi makani agha. Wakuwona kuti nchambura macitiko kuti iyo na muwoli wake Elizabeti ŵaŵe na mwana pa msinkhu wawo. Ntheura Gabriyeli wakumuphalira kuti: “Uŵenge citutu kweniso wambura kumanya kuyowoya mpaka pa zuŵa ilo vinthu ivi vizamucitikira, cifukwa wagomezga cara mazgu ghane.”

Pa nyengo iyi, ŵanthu awo ŵali kuwaro ŵakwamba kuzizwa kuti Zekariya wakucedwa kufuma mu tempele. Wati wafuma, ŵakuwona kuti wakutondeka kuyowoya kweni wakuyowoya waka na mawoko, ndipo ŵakumanya kuti wawona mboniwoni.

Mazuŵa gha uteŵeti wake ghati ghamara, Zekariya wakuwelera ku nyumba yake. Ndipo mwambura kutaya nyengo yitali, mazgu agho mungelo wakayowoya ghakufiskika nadi. Elizabeti wakuŵa na nthumbo. Apo wakulindilira kuti mwana wake wababike, Elizabeti wakutandara waka pa nyumba yake, kwambura kuwonekera ku ŵanthu kwa myezi yinkhondi.

Nyengo yati yajumphapo, Gabriyeli wakuwonekeraso. Kasi panyengo iyi wakuyowoya na njani? Na Mariya, mwanakazi wambura kutengwa wa mu tawuni ya Nazarete. Kasi sono wiza na uthenga wuli? Pulikizgani. Gabriyeli wakuphalira Mariya kuti: “Watumbikika na Ciuta. Wona! uzuwukenge mu nthumbo yako ndipo ubabenge mwana msepuka, ndipo zina lake umuthyenge Yesu.” Gabriyeli wakusazgirapo kuti: “Iyo uyu wazamuŵa mukuru ndipo wazamucemeka Mwana wa Wapacanya Nkhanira; . . . ndipo wazamuwusa nga ni themba pa nyumba ya Yakobe muyirayira, ndipo ufumu wake uzamumara cara.”

Tikugomezga kuti Gabriyeli wakuwona kuti ni mwaŵi ukuru comene kuyowoya mauthenga agha. Ndipo apo tikuŵazga vinandi vyakukhwaskana na Yohane na Yesu, tiwonenge cifukwa ico mauthenga ghakufuma kucanya agha ghaliri ghakuzirwa comene. 2 Timote 3:16; Luka 1:5-33.

▪ Ni mauthenga wuli ghaŵiri ghakuzirwa agho ghakupelekeka kufuma kucanya?

▪ Ni njani uyo wakuyowoya mauthenga agha, ndipo wakughayowoya kwa njani?

▪ Cifukwa wuli nchinonono kughagomezga mauthenga agha?