Cipaturo 61

Msepuka Uyo Wanguŵa na Ciŵanda Wacizgika

APO Yesu, Petrosi, Yakobe, na Yohane ŵacali kutali, panji pa Lupiri lwa Hermoni, ŵasambiri ŵanji ŵakusangana na suzgo. Ŵati ŵawerako, nyengo yeneyiyo Yesu wakuwona kuti cinthu cinyake cili makora yayi. Mzinda wawungilira ŵasambiri ŵake, ndipo ŵalembi ŵakususkana nawo. Pakuwona Yesu, ŵanthu ŵakuzizwa ndipo ŵakucimbira kuzakamutawuzga. Yesu wakufumba kuti: “Kasi mukususkana nawo vici?”

Mwanalume munyake wakufuma mu mzinda na kujikama panthazi pa Yesu, wakulongosora kuti: “Msambizgi, nangwiza na mwana wane msepuka kwa imwe cifukwa wali na mzimu uwo ukumutondeska kuyowoya; ndipo para wamukora ukumuponya pasi, ndipo wakumokora mphovu na kuska mino ghake ndipo nkhongono zikumumalira. Ndipo nanguphalira ŵasambiri ŵinu kuti ŵawufumiske, kweni ŵangutondeka.”

Ŵalembi ŵakwenera kuti ŵasangirapo mwaŵi wa kunena ŵasambiri cifukwa ca kutondeka kucizga msepuka, panji na kuŵagoska wuwo. Pa nyengo yeneyiyi, Yesu wakufika. Wakuti: “Muwiro wambura cipulikano, niŵenge namwe mpaka pawuli? Nimuzizipizgiraninge mpaka pawuli?”

Yesu wakuŵa nga wakuyowoya na ŵanthu wose, kweni tikukayika yayi kuti wakunena ŵalembi, awo ŵasuzganga ŵasambiri ŵake. Kufuma apo, Yesu wakuyowoya za msepuka kuti: “Zani nayo kwa ine.” Kweni apo msepuka wakwiza kwa Yesu, ciŵanda ico cili mwa iyo cikumuponya pasi na kumucitiska kuti wazilike comene. Msepuka wakuvivira pasi na kufumiska mphovu ku mulomo.

Yesu wakufumba kuti: “Kasi ivi vikamba pawuli kumucitikira?”

Wiske wakuzgora kuti: “Kufuma pa wanici; ndipo kanandi waka [mzimu uheni] ukumuponya pa moto na mu maji wuwo kuti umukome.” Ndipo dada uyu wakuŵeyelera kuti: “Usange mungamanya kucitapo kanthu, muŵe nase na citima ndipo tovwirani.”

Panji dada uyu wayezga kupenja wovwiri kwa vilimika vinandi comene. Ndipo sono, pakuti ŵasambiri ŵa Yesu ŵatondeka kumovwira, wathika lusoko comene. Pakuwona umo munthu uyu waŵeyera, Yesu wakumukhwimiska kuti: “Ukuti, ‘Usange mungamanya?’ Vinthu vyose vingacitika kwa uyo wali na cipulikano.”

Nyengo yeneyiyo dada uyu wakucemerezga kuti: “Nili naco cipulikano!” Kweniso wakuŵeya Yesu kuti: “Novwirani apo nkhupeleŵera cipulikano!”

Pakuwona kuti mzinda ukucimbilira kwa iwo, Yesu wakucenya ciŵanda kuti: “Iwe mzimu wakutondeska kuyowoya na kupulika, nkhukulangura kuti, fumamo mwa iyo ndipo unganjirangaso mwa iyo cara.” Apo ciŵanda cikufuma, cikumupangiskaso msepuka kukolomoka na kuzilika comene. Msepuka wagona pasi thambalara, mwakuti ŵanthu ŵanandi ŵakwamba kuyowoya kuti: “Wafwa!” Kweni Yesu wakumukora pa woko msepuka ndipo wakuwuka.

Kukwambilira, apo ŵasambiri ŵakatumika kukapharazga, ŵakafumyanga viŵanda. Ntheura sono ŵati ŵanjira mu nyumba, ŵakufumba Yesu kumphepete kuti: “Cifukwa wuli ise tangutondeka kuwufumiska?”

Pakukhumba kulongora kuti nchifukwa ca cipulikano cawo cicoko, Yesu wakuzgora kuti: “Mtundu uwu ungafumiskika na cilicose cara kweni na lurombo pera.” Apa cikulongora kuti ŵakakhumbikwiranga kunozgekera kuti ŵafumiske ciŵanda cankhongono ici. Pakakhumbikwanga cipulikano cakukhora na kulomba, kuŵeya Ciuta kuti waŵape nkhongono.

Ndipo Yesu wakusazgirapo kuti: “Nadi nkhumuphalirani, usange mungaŵa na cipulikano ukuru wa njere ya sinapi, muyowoyenge ku lupiri ulu, ‘Wukapo pano uye para,’ ndipo luwukengepo, ndipo palije ico ciŵenge cambura macitiko kwa imwe.” Cipulikano nchankhongono nadi!

Vyakujandizga na masuzgo ivyo vikutimbanizga pa kuteŵetera Yehova vingaŵa nga ni vikuru na vyambura kusezgeka nga ni lupiri lukuru. Kweni Yesu wakulongora kuti usange tingaŵa na cipulikano ici mu mitima yithu, kucovwira kuti cikure, ciŵenge cakukhora ndipo citovwirenge kutonda vyakujandizga na masuzgo agho ghali nga ni lupiri. Mariko 9:14-29; Mateyu 17:19, 20; Luka 9:37-43.

▪ Kasi Yesu wakusanga vici apo wakufuma ku Lupiri lwa Hermoni?

▪ Kasi Yesu wakukhwimiska wuli wiske wa msepuka wakukoleka na ciŵanda?

▪ Cifukwa wuli ŵasambiri ŵangutondeka kufumya ciŵanda?

▪ Kasi Yesu wakulongora kuti cipulikano cingaŵa na nkhongono wuli?