Cipaturo 79

Mtundu Wakuzgeŵa, Kweni Wose Cara

NYENGO yicoko waka Yesu wati wadumbirana na awo ŵanguwungana kuwaro kwa nyumba ya Mufarisi, ŵanthu ŵanji ŵakumuphalira “vya Ŵagalileya ŵeneawo ndopa zawo [kazembe wa Ŵaroma Pontiyo] Pilato wakasazga na sembe zawo.” Panyake Ŵagalileya aŵa ni awo ŵakakomeka apo Ŵayuda vikwi vinandi ŵakakwiya kuti Pilato wakatora ndalama mu vyakusungiramo vyuma vya mu tempele na kuzengera mugelo wakulongozgera maji mu Yerusalemu. Awo ŵakuphara nkhani iyi kwa Yesu panji ŵakughanaghana kuti Ŵagalileya aŵa soka likaŵawira cifukwa ca milimo yawo yiheni.

Ndipouli, Yesu wakuŵasambizga kuti ndimo viliri yayi, wakufumba kuti: “Kasi mukughanaghana kuti Ŵagalileya aŵa ŵakaŵa ŵakwananga comene kuluska Ŵagalileya ŵanji wose cifukwa cakuti vinthu ivi vikaŵawira?” Yesu wakuzgora kuti: “Cara nadi.” Ndipo wakusangirapo mwaŵi pa nkhani iyi kuti wacenjezge Ŵayuda, wakuti: “Kwambura kuti mwapera, imwe mose muzamuparanyika mwakuyana waka.”

Pakulutilira, Yesu wakukumbuka soka linyake ilo likacitika, panyake ili nalo likukhwaskana na kuzenga mugelo. Wakufumba kuti: “Panji ŵara khumi na ŵankhondi pacanya ŵatatu (18) ŵeneawo cigongwe ca Siloamu cikaŵawira, na kuŵakoma, kasi mukughanaghana kuti ŵakaŵa na ngongoli yikuru ya zakwananga kuluska ŵanthu ŵanji wose awo ŵakukhala mu Yerusalemu?” Yesu wakuti ŵanthu aŵa ŵakafwa cifukwa ca uheni wawo yayi. M’malo mwake, ‘nyengo na vyakucitika vyamabuci’ ndivyo kanandi vikucitiska masoka agha. Ndipouli, Yesu wakusangiraposo mwaŵi pa cakucitika ici, ndipo wakuŵacenjezga kuti: “Kweni kwambura kuti mwapera, imwe mose muzamuparanyika mwakuyana waka.”

Kufuma apo, Yesu wakuyowoya ntharika, wakulongosora kuti: “Munthu yunji wakaŵa na khuni la mkuyu lakupandika mu munda wake wa mpheska, ndipo wakiza kuzakapenja cipambi mwenemumo kweni wakasangamo kanthu cara. Ndipo wakati kwa wakupwelelera munda wa mpheska, ‘Ni vilimika vitatu sono nkhwiza kuzakapenja cipambi mu khuni ili la mkuyu, kweni nindasangemo kanthu. Ulidumulire pasi! Kwaŵiraci kuti linangenge waka dongo?’ Pakuzgora wakati kwa iyo, ‘Fumu, mulilekeso dankha cilimika cino, mpaka nijime musi mwake na kuŵikamo vundira; ndipo usange lipambikenge cipambi munthazi, nchiwemi; kweni usange cara, muzamulidumulira pasi.’”

Kwa vilimika vyakujumpha vitatu, Yesu wayezga kuwovwira mtundu wa Ŵayuda kuŵa na cipulikano. Kweni ŵasambiri mahandiredi ghacoko waka ndiwo ŵakupimika kuti nchipambi ca milimo yake. Sono mu cilimika cacinayi ici ca uteŵeti wake, wakusazgirako milimo yake, wakuŵa nga ni para wakujima na kuthiramo vundira musi mu khuni la mkuyu la mtunda wa Ŵayuda apo wakupharazga na kusambizga mwamwamphu mu Yudeya na Pereya. Kweni waphyokapo waka. Mtundu uwu ukukana kupera ndipo ukulazga ku pharanyiko. Ŵakukhalapo ŵacoko waka ŵa mtundu uwu ndiwo ŵakuzomera visambizgo vyake.

Pati pajumpha kanyengo, Yesu wakusambizga mu sunagoge pa Sabata. Mwenemura, wakuwona mwanakazi uyo cifukwa ca ciŵanda ico cikumusuzga, wakukhala mwakukokonyara vilimika 18. Pakumucitira lusungu, Yesu wakuyowoya nayo kuti: “Wamwanakazi, wafwatuka ku kutomboloka kwako.” Wati wayowoya nthena, wakuŵika woko lake pa iyo, ndipo nyengo yeneyiyo mwanakazi uyu wakwinuka na kwamba kupeleka ucindami kwa Ciuta.

Ndipouli, mulara wa sunagoge wakwiya. Wakukalipa kuti: “Pali mazuŵa ghankhondi na limoza mu gheneagho nchito yikwenera kugwirika; ntheura mu gheneagha mwizenge na kucizgika, kweni pa zuŵa la sabata cara.” Mulara uyu wakuzomerezga kuti Yesu wali na nkhongono zakucizgira kweni wakususka ŵanthu cifukwa ca kwiza kuzakacizgika pa Sabata!

Yesu wakuzgora kuti: “Ŵapusikizgi, asi waliyose wa imwe pa sabata wakusutura nkhambako yake panji mbunda yake mu ciŵaya na kuyilongozga kuti yikamwe maji? Ipo kasi canguŵa cakwenelera cara kwa mwanakazi uyu, mweneuyo ni mwana wa Abrahamu, ndiposo uyo Satana wakamukaka, wonani! vilimika khumi na vinkhondi pacanya vitatu, kuti wasutulike ku goli ili pa zuŵa la sabata?”

Sono pakupulika ici, awo ŵakwimikana na Yesu soni zikwamba kuŵakora. Ndipouli, mzinda ukusekelera na vinthu vyose vyaucindami ivyo Yesu wakucita. Pakuzgora, Yesu wakuyowoyaso ntharika ziŵiri zaucimi zakukhwaskana na Ufumu wa Ciuta, izo wakaphalira ŵanthu apo wakaŵa mu boti ku Nyanja ya Galileya, pafupifupi cilimika cimoza ico cajumpha. Luka 13:1-21; Mupharazgi 9:11; Mateyu 13:31-33.

▪ Kasi ni masoka wuli agho ghazunulika mu nkhani iyi, ndipo Yesu wakusambizga fundo wuli kufuma pa masoka agha?

▪ Kasi tikusambirapo vici pa khuni la mkuyu lambura kupambika, kweniso pa nchito ya kuyezga kulipangiska kuti lipambike?

▪ Kasi mulara wa sunagoge wakuzomerezga wuli kuti Yesu wali na nkhongono zakucizgira, ndipo Yesu wakuvumbura wuli upusikizgi wa munthu uyu?