Cipaturo 78

Muŵenge Ŵakunozgeka!

WATI wasoka mizinda pa nkhani ya udokezi na kucenjezga ŵasambiri ŵake kuti ŵaleke kuŵika comene mtima pa vinthu vyathupi, Yesu wakuŵaciska kuti: “Kopa cara, kamskambo kacoko, cifukwa Ŵawiskemwe ŵazomerezga kumupani ufumu.” Ntheura wakuvumbura kuti ŵanthu ŵacoko waka (awo pamanyuma ŵakumanyikwa kuti ŵalipo 144,000) ndiwo ŵazamuŵa mu Ufumu wakucanya. Ŵanandi awo ŵazamupokera umoyo wamuyirayira ŵazamukhala pa caru capasi.

“Ufumu” nchawanangwa camaseŵera cara! Pakulongosora ivyo ŵasambiri ŵakwenera kucita kuti ŵawupokere, Yesu wakuŵaciska kuti: “Guliskani vinthu ivyo muli navyo ndipo pelekani vyawanangwa vya cisungusungu.” Enya, ŵakwenera kovwira ŵanji mwauzimu na katundu wawo ndipo ŵajiŵikirenge “usambazi wambura kutondeka kucanya.”

Kufuma apo, Yesu wakusoka ŵasambiri ŵake kuti ŵanozgekerenge kwizaso kwake. Wakuti: “Muvware zikhore mu viwuno vinu ndipo nyali zinu zigolerenge, ndipo imwe mwaŵene muŵenge nga mbanthu awo ŵakulindilira fumu yawo apo yikuwerako ku nthengwa, ntheura kuti para yikwiza na kukhung’uska ŵayijulire nyengo yeneyiyo. Ŵakukondwa mbazga ŵeneawo fumu pakwiza yikuŵasanga ŵakulinda! Nadi pano nkhumuphalirani, Yizamunozgeka na kuŵakhalika pa thebulu ndipo yizamwiza na kuŵateŵetera.”

Mu ntharika iyi, ŵateŵeti ŵakulongora kuti mbakunozgekera kuwera kwa fumu yawo. Ŵakukwinda minjilira yawo yitali na kuyikakilira mu viwuno vyawo na kulutilira kugwira nchito usiku mu ungweru wa nyali izo zili na mafuta ghakukwana. Yesu wakulongosora kuti: ‘Usange fumu yikwiza pa ulinda waciŵiri [kwambira ca m’ma 9 koloko mpaka usiku pakati], nanga ngwacitatu [kwambira usiku pakati mpaka ca m’ma 3 koloko mulenji], ndipo yikuŵasanga ntheura, ŵakukondwa ndiwo!’

Fumu iyi yikupeleka njombe ku ŵateŵeti ŵake mu nthowa yapadera comene. Yikuŵaphalira kuti ŵakhale pa thebulu ndipo yikwamba kuŵateŵetera. Yikucita nawo nga mbazga yayi, kweni nga mbabwezi ŵake ŵakugomezgeka. Ŵakupokera njombe yiwemi comene cifukwa ŵalutilira kugwilira nchito fumu yawo usiku wose uku ŵakulindilira kuti yize. Yesu wakumalizga kuti: “Imwe namwe, muŵenge ŵakunozgeka, cifukwa pa ora ilo mukughanaghana kuti ndilo cara, Mwana wa munthu wakwiza.”

Sono Petrosi wakufumba kuti: “Fumu, kasi mukuyowoya ntharika iyi kwa ise panji na ku wose?”

M’malo mwa kumuzgora mwakudunjika, Yesu wakuyowoya ntharika yinyake. Wakufumba kuti: “Ni njani comenecomene muteŵeti mulara wakugomezgeka, wakucenjera, uyo fumu yimwimikenge pa ciwuru ca ŵateŵeti ŵake kuti waŵapenge cakurya cakukwana pa nyengo yakwenelera? Ngwakukondwa muzga uyo, usange fumu yake pakwiza yizamumusanga wakucita ntheura! Nkhumuphalirani unenesko, Yizamumwimika pa vyose ivyo yili navyo.”

Tikukayika yayi kuti “fumu” iyi ni Yesu Khristu. “Muteŵeti mulara” wakwimira “kamskambo kacoko” ka ŵasambiri nga ni gulu, ndipo “ciwuru ca ŵateŵeti” cikwimira gulu lenelili la 144,000 awo ŵakupokera Ufumu wakucanya. Kweni mazgu agha ghakulongosora mulimo wawo waliyose payekha. Vinthu ivyo fumu ‘yili navyo’ ivyo muteŵeti mulara wakugomezgeka wimikika kulaŵilira ni vinthu vya Ufumu vya pa caru capasi, nga ni ŵanthu awo ŵazamuhara Ufumu pa caru capasi.

Pakulutilira na ntharika iyi, Yesu wakulongora kuti vingacitika kuti ni wose yayi mu gulu la muteŵeti mulara, panji muzga, awo ŵazamuŵa ŵakugomezgeka. Wakulongosora kuti: “Usange muzga yura wayowoyenge mu mtima wake kuti, ‘Fumu yane yikucedwa kwiza,’ na kwamba kutimba ŵateŵeti ŵanalume na ŵateŵeti ŵanakazi, ndiposo kurya na kumwa na kuloŵera, fumu ya muzga yura yizenge pa zuŵa ilo wakuyilindizga cara . . . , ndipo yizamumulanga na kulanga kukuru.”

Yesu wakulongora kuti kwiza kwake kwaŵa nga ni moto ku Ŵayuda, cifukwa ŵanji ŵakuzomera visambizgo vyake ndipo ŵanji ŵakukana. Vilimika vitatu ivyo vyajumpha, Yesu wakabapatizika mu maji, kweni sono wakhala pacoko kuti wamalizge ubapatizo wake mu nyifwa, ndipo wakuti: “Nkhutambura mpaka uzakamare!”

Wati wayowoya mazgu agha ku ŵasambiri ŵake, Yesu wakuyowoyaso ku mizinda. Wakudandawura cifukwa cakuti ŵakukana ukaboni wakuwoneka makora wakuti iyo ni Khristu ndiposo ng’anamuro lake. Iyo wakuti: “Para mwawona bingu likukwera mu vigaŵa vya kuzambwe, nyengo yeneyiyo mukuti, ‘Vula ya mphepo yikwiza,’ ndipo vikucitika ntheura. Ndipo para mwawona mphepo yamwera yikuputa, mukuti, ‘Kuŵenge cithukivu,’ ndipo vikucitika. Ŵapusikizgi, mukumanya kuŵanika kawonekero kakuwaro ka caru capasi na mtambo, kweni vili wuli kuti mukumanya cara kuŵanika nyengo iyi?” Luka 12:32-59.

▪ Kasi ŵa “kamskambo kacoko” ŵalipo ŵalinga, ndipo ŵakupokera vici?

▪ Kasi Yesu wakulongosora wuli kuti nchakukhumbikwa kuti ŵateŵeti ŵake ŵaŵenge ŵakunozgeka?

▪ Mu ntharika ya Yesu, ni njani uyo ni “fumu,” “muteŵeti mulara,” “ciwuru ca ŵateŵeti,” na “ivyo yili navyo”?