Cipaturo 21

Mu Sunagoge Lakwake kwa Yesu

TIKUKAYIKA yayi kuti ŵanthu mu Nazarete ŵakukondwa comene apo Yesu wakwiza kukwake. Pajumpha cilimika cimoza kufuma apo Yesu wakafumirangapo kuti wakabapatizike na Yohane. Ndipo nyengo iyo wakamanyikwanga kuti ni misiri wa mathabwa. Kweni sono wakumanyikwa kosekose kuti ni munthu wakucita vyaminthondwe. Ŵanthu ŵa mu Nazarete ŵakunweka kuti ŵawone milimo yakuzizwiska iyo wacitenge pakati pawo.

Ŵanthu ŵakunweka comene apo Yesu wakuluta ku sunagoge, mwakuyana na kaluso kake. Pa nyengo ya visopo, Yesu wakwimilira kuti waŵazge, ndipo mpukutu wa nchimi Yesaya ukupika kwa iyo. Wakusanga malo apo pali kulembeka za Wakuphakazgika na mzimu wa Yehova, agho mu Baibolo lithu mazuŵa ghano ni cipaturo 61.

Wati waŵazga za umo Iyo uyu wazamupharazgira kufwatuka kwa ŵamikoli, kuwonaso kwa ŵacibulumutira, ndiposo cilimika cakuzomerezgeka ca Yehova, Yesu wakuwezgera mpukutu kwa muteŵeti na kukhala pasi. Maso gha wose ghali pa iyo dodoli. Kufuma apo, wakuyowoya, panji nyengo yitaliko, wakuti: “Muhanya uno lemba ilo mwapulika lafiskika.”

Ŵanthu ŵakuzizwa na ‘mazgu ghake ghawemi’ ndipo ŵakuti kwa yumoza na munyake: “Asi uyu ni mwana wa Yosefe?” Kweni pakumanya kuti ŵakukhumba kuwona kuti wakucita minthondwe, Yesu wakulutilira kuti: “Kwambura kukayika muyowoyenge ntharika iyi kwa ine, ‘Mcizgi, jicizga wamwene; vinthu ivyo tikapulika kuti vikacitika mu Kaperenaumu, uvicite na muno wuwo mu caru ca kwako.’” Ŵazengezgani ŵake ŵakale ŵakughanaghana kuti mphanyi wamba kucizga ŵanthu ŵakwake, kuti ndiwo ŵambe kusanga candulo. Ntheura ŵakuwona kuti Yesu waŵayuyura.

Pakumanya maghanoghano ghawo, Yesu wakuŵaphalira vinthu vinyake ivyo vikacitika kumanyuma. Wakuŵaphalira kuti mu Israyeli mukaŵa vyokoro vinandi mu mazuŵa gha Eliya, kweni Eliya wakatumika kwa yumoza wa iwo yayi. M’malo mwake, wakaluta kwa cokoro ca ku Sidoni, mwanakazi uyo wakaŵa Muisrayeli yayi, kweneuko wakacitako munthondwe wa kuponoska umoyo. Ndipo mu nyengo ya Elisha, mukaŵa ŵavyoni ŵanandi, kweni Elisha wakatozga Namani pera wakufuma ku Siriya.

Pakukwiya na nkhani izi, zeneizo zikuvumbura unonono wa mitima yawo ndiposo kuŵavya cipulikano, ŵanthu awo ŵali mu sunagoge ŵakuwuka na kumuguzira kuwaro kwa msumba Yesu. Kwenekura pa usendemu wa lupiri ulo pali kuzengeka Nazarete, ŵakukhumba kumugodobolera ku dambo. Kweni Yesu wakufwanthamuka mu mawoko ghawo na kufumapo. Luka 4:16-30; 1 Mathemba 17:8-16; 2 Mathemba 5:8-14.

▪ Cifukwa wuli ŵanthu ŵakukondwa comene mu Nazarete?

▪ Kasi ŵanthu ŵakughanaghana vici pa ivyo Yesu wayowoya, kweni nchivici ico caŵakwiyiska?

▪ Kasi ŵanthu ŵakukhumba kucita nayo vici Yesu?