Cipaturo 114

Mugonero Wacikumbusko

YESU wati wageziska malundi gha ŵapositole ŵake, wakuzunura mazgu gha pa lemba la Salmo 41:9, wakuti: “Uyo wakaryanga cingwa cane watumphuska citende cake kwimikana nane.” Ndipo pakukweŵeka mu mzimu, wakulongosora kuti: “Yumoza wa imwe wanipelekenge.”

Ŵapositole citima cikuŵakora ndipo yumozayumoza ŵakufumba Yesu ŵakuti: “Kasi ndine?” Yudasi Isikariyoti nayo wakufumba. Yohane uyo wali musi mwa Yesu pa thebulu, wakweghama pa nganga ya Yesu wakuti: “Fumu, ni njani?”

Yesu wakuzgora kuti: “Njumoza wa khumi na ŵaŵiri, uyo wakukovya pamoza na ine mu bakule yumoza. Mbunenesko, Mwana wa munthu wakuluta, umo kuli kulembekera vya iyo, kweni soka kwa munthu uyo Mwana wa munthu wakupelekeka kwizira mwa iyo! Mphanyi cikaŵa ciwemi kwa munthu uyu walekenge kubabika.” Kufuma apo, Satana wakunjira mwa Yudasi, wakusangirapo mwaŵi pa mtima wake, uwo wazgoka uheni. Nchakwenelera nadi kuti usiku wenewuwu, Yesu wakucema Yudasi kuti “mwana wa pharanyiko.”

Sono Yesu wakuphalira Yudasi kuti: “Ico ukucita cita mwaluŵiro.” Palije nanga njumoza wa ŵapositole ŵanyake uyo wamanya ico Yesu wakung’anamura. Ŵanji ŵakughanaghana kuti pakuti Yudasi ndiyo wakusunga bokosi la ndalama, ndikuti Yesu wakumuphalira kuti: “Ukagure vinthu ivyo tikukhumbikwira pa ciphikiro,” panji kuti walute na kukapeleka vinthu ku ŵakavu.

Yudasi wati wafumamo, Yesu wakwambiska ciphikiro cinyake ciphya panji cikumbusko pamoza na ŵapositole ŵake ŵakugomezgeka. Wakutora cingwa, wakuwonga na kucimenya ndipo wakuti: “Torani, murye.” Ndipo wakulongosora kuti: “Ici cikwimira thupi lane ilo lipelekekenge cifukwa ca imwe. Lutilirani kucita ici kuti munikumbukenge.”

Waliyose wati walyako cingwa, Yesu wakutora nkhombo ya vinyo, yikwenera kuti ni nkhombo yacinayi iyo ŵakugwiliskira nchito pa Paska. Wakuwongaso na kuŵapa, wakuŵapempha kuti ŵamwepo, ndipo wakuti: “Nkhombo iyi yikwimira phangano liphya cifukwa ca ndopa zane, izo zithiskikenge cifukwa ca imwe.”

Ntheura ici nchikumbusko ca nyifwa ya Yesu. Cilimika cilicose pa Nisani 14, cikwenera kucitika nga umo Yesu wakuyowoyera kuti timukumbukenge. Cikumbuskenge awo ŵakuŵapo ivyo Yesu na Ŵawiske ŵakucanya ŵacita kuti ŵanthu ŵathaskike ku cilango ca nyifwa. Ku Ŵayuda awo ŵazgoka ŵalondezgi ŵa Khristu, ciphikiro ici cikunjira mu malo gha Paska.

Phangano liphya, ilo likugwira nchito cifukwa ca ndopa zakuthiskika za Yesu, likunjira mu malo gha phangano lakale la Dango. Yesu ndiyo ni mukhalapakati wa Yehova Ciuta na Ŵakhristu ŵakuphakazgika ŵa 144,000. Padera pa kupeleka mwaŵi wakuti ŵanthu ŵagowokereke zakwananga, phangano ili likovwira kuti mtundu wakucanya wa mafumu na ŵasofi uŵepo. Mateyu 26:21-29; Mariko 14:18-25; Luka 22:19-23; Yohane 13:18-30; 17:12; 1 Ŵakorinte 5:7.

▪ Kasi Yesu wakuzunura ucimi wuli wa mu Baibolo uwo ukuyowoya za mubwezi, ndipo wakung’anamuraci?

▪ Cifukwa wuli ŵapositole ŵali na citima, ndipo waliyose wakufumba vici?

▪ Kasi Yesu wakuphalira Yudasi kucitaci, kweni ŵapositole ŵanyake ŵakughanaghana vici pa mazgu agha?

▪ Kasi Yesu wakwambiska ciphikiro wuli Yudasi wati wafuma, ndipo nchakuzirwa wuli?

▪ Kasi mbanjani awo ŵali mu phangano liphya, ndipo phangano ili likufiska vici?