Cipaturo 20

Munthondwe Waciŵiri mu Kana

APO Yesu wakuwelera kukwake wati wapharazga nyengo yitali mu Yudeya, wakupumura yayi. Kweni wakwamba uteŵeti wakusazgikira mu Galileya, uko wakakulira. Kweni m’malo mwa kukhala nayo, ŵasambiri ŵake ŵakuwelera ku mbumba zawo na ku nchito zawo zakale.

Kasi Yesu wakwamba kupharazga uthenga wuli? Wakupharazga uthenga wakuti: “Ufumu wa Ciuta waneng’enera. Perani, imwe mwaŵanthu, ndipo muŵe na cipulikano mu makani ghawemi.” Kasi ŵanthu ŵakuti wuli? Ŵagalileya ŵakupokelera Yesu. Wose ŵakumucindika. Ndipouli, ici nchifukwa ca uthenga wake yayi, kweni cifukwa cakuti ŵanandi ŵa iwo ŵakaŵapo pa Paska mu Yerusalemu mu myezi yajumpha ndipo ŵakawona vimanyikwiro ivyo wakacita.

Yesu wakwenera kuti wakwambira mu Kana uteŵeti wake ukuru wa ku Galileya. Mungakumbuka kuti apo wakafumanga ku Yudeya, wakazgora maji kuŵa vinyo pa ciphikiro ca nthengwa mu Kana. Pa cakucitika caciŵiri ici, mwana wa mulara wa boma wa Themba Herode Antipasi ni mulwari comene. Mulara wa boma uyu wati wapulika kuti Yesu wiza ku Kana kufuma ku Yudeya, wakwenda kufuma kukwake ku Kaperenaumu kuzakakumana na Yesu. Na citima, munthu uyu wakuŵeya kuti: ‘Zani luŵiro, pambere kana kane kandafwe.’

Yesu wakuzgora kuti: ‘Welera kukwako. Mwana wako wacira!’ Wanchito wa Herode wakugomezga ndipo wakwamba kuwelera kukwake. Apo wakuluta wakukumana na ŵateŵeti ŵake, awo ŵizanga kuzakamuphalira kuti vyose vili makora, mwana wake wacira. Iyo wakufumba kuti: ‘Kasi wakacira pawuli?’

Ŵakumuzgora kuti: ‘Mayiro nyengo ya 1 koloko muhanya.’

Mulara wa boma wakupanikizga kuti pa ora ili ndipo Yesu wakamuphalira kuti, ‘Mwana wako wacira!’ Kufuma apo, munthu uyu na mbumba yake yose ŵakuzgoka ŵasambiri ŵa Khristu.

Ntheura Kana ni malo agho Yesu waghatemwa ndipo wacitako minthondwe yiŵiri, kuŵa cilongolero cakuti wiza kufuma ku Yudeya. Ndipouli, ni minthondwe iyi pera yayi iyo Yesu wacita kuzakafika nyengo iyi, kweni njapadera cifukwa nchilongolero cakuti wawelera ku Galileya.

Sono Yesu wakuluta kukwake ku Nazarete. Kasi kwamuŵa vici? Yohane 4:43-54; Mariko 1:14, 15; Luka 4:14, 15.

▪ Apo Yesu wakuwelera ku Galileya, ŵasambiri ŵake ŵakucita vici, ndipo ŵanthu ŵakumupokelera wuli?

▪ Kasi Yesu wakucita munthondwe wuli, ndipo ukukhwaska wuli awo ukuŵacitikira?

▪ Kasi Yesu wakulongora wuli kuti wakutemwako ku Kana?