Cipaturo 15

Munthondwe Wakwamba wa Yesu

PAJUMPHA waka zuŵa limoza panji ghaŵiri kufuma apo Andireya, Petrosi, Yohane, Filipu, Nataniyeli, panyake na Yakobe ŵakaŵira ŵasambiri ŵakwambilira ŵa Yesu. Sono aŵa ŵali pa ulendo, ŵakuluta kukwawo ku Galileya, uko wose ŵali kufuma. Iwo ŵakuya ku Kana, tawuni ya mu mapiri, kwawo kwa Nataniyeli, kutali yayi na Nazarete, uko Yesu wakakulira. Ŵacemeka ku ciphikiro ca nthengwa mu Kana.

Ŵanyina ŵa Yesu nawo ŵiza ku nthengwa iyi. Pakuŵa mubwezi wa mbumba ya awo ŵakutorana, Mariya wakutokatoka comene pakuteŵetera ŵalendo ŵanandi awo ŵiza. Ntheura wakumanya luŵiro vinthu ivyo vyamara, ndipo wakuphalira Yesu kuti: “Ŵalije vinyo.”

Ntheura apo Mariya wakusacizga kuti Yesu wacitepo kanthu pa suzgo la vinyo, pakwamba Yesu wakuŵikako viŵi mahara yayi. Wakufumba kuti: “Nili nawe na kanthu wuli?” Pakuŵa Themba lakusoleka na Ciuta, wakwenera kulongozgeka na mbumba nesi ŵabwezi ŵake yayi pakucita vinthu. Ntheura Mariya mwamahara wakuyileka nkhani iyi mu mawoko gha mwana wake, na kuyowoya ku awo ŵakuteŵetera kuti: “Cilicose ico wangamuphalirani, citani.”

Pali viŵiya vyamalibwe vinkhondi na cimoza, ndipo mu cimoza munganjira malita 40 gha maji. Yesu wakuphalira awo ŵakuteŵetera kuti: “Zuzgani viŵiya na maji.” Ndipo ŵateŵeti ŵakuzuzga mpaka mu kaŵende. Kufuma apo, Yesu wakuti: “Neghanimo sono ndipo lutani nalo kwa mulara wa ciphikiro.”

Mulara wa ciphikiro wakuzukuma comene na uwemi wa vinyo, kwambura kumanya kuti lapangika mwamunthondwe. Wakucema mwenenthengwa na kuyowoya kuti: “Munthu waliyose wakudankha kufumiska vinyo liwemi, ndipo para ŵanthu ŵaloŵera, liheni. Iwe wasunga vinyo liwemi mpaka sono.”

Uwu ni munthondwe wakwamba wa Yesu, ndipo pakuwona ici, cipulikano ca ŵasambiri ŵake ŵaphya cikukhozgeka comene. Paumaliro, iyo pamoza na ŵanyina na ŵanung’una ŵake, ŵakunyamuka kuya ku msumba wa Kaperenaumu kufupi na Nyanja ya Galileya. Yohane 2:1-12.

▪ Mphawuli mu uteŵeti wa Yesu apo nthengwa ya ku Kana yikucitikira?

▪ Cifukwa wuli Yesu wakukana ivyo ŵanyina ŵamuphalira?

▪ Kasi ni munthondwe wuli uwo Yesu wakucita, ndipo ukukhwaska wuli ŵanji?