Cipaturo 51

Munthu Wakukomeka pa Ciphikiro ca Zuŵa Lakubabikira

YESU wati waŵaphalira vyakucita ŵapositole ŵake, wakuŵatuma ŵaŵiriŵaŵiri mu cigaŵa. Petrosi na munung’una wake Andireya ŵakwenera kuti ŵali lumoza, Yakobe na Yohane, Filipu na Batulumeyu, Tomasi na Mateyu, Yakobe na Tadeyu, ndiposo Simoni na Yudasi Isikariyoti. Ŵapharazgi magulu ghankhondi na limoza aŵa, ŵakupharazga makani ghawemi gha Ufumu na kucizga ŵanthu mwamunthondwe kulikose uko ŵakuya.

Pa nyengo iyi, Yohane Mbapatizi wacali mu gadi. Wakhalamo pafupifupi vilimika viŵiri sono. Mungakumbuka kuti Yohane wakayowoya pakweru kuti Herode Antipasi wali kubuda kutora Herodiya, muwoli wa mukuru wake Filipu, kuŵa muwoli wake. Pakuti Herode Antipasi wakatenge wakulondezga Dango la Ciuta lakupelekeka kwizira mwa Mozesi, Yohane wakacita makora kuvumbura uleŵi uwu. Ntheura Herode wakaŵika Yohane mu gadi, panyake cifukwa ca kucicizgika na Herodiya.

Herode Antipasi wakumanya kuti Yohane ni munthu murunji ndipo wakukondwa kumupulikizga. Ntheura, cakuti wacite nayo cikumusoŵa. Kweni Herodiya, wakumutinkha Yohane ndipo wakupenja nthowa iyo wangamukomera. Paumaliro mpata uwo wakalindiliranga wasangika.

Nyengo yicoko waka pambere Paska la 32 C.E. lindacitike, Herode wakunozga ciphikiro cikuru ca kukumbukira zuŵa lake lakubabikira. Pa ciphikiro ici, pali ŵanthu ŵa maudindo ghapacanya ŵa Herode na ŵalara ŵa ŵankhondo, kweniso ŵalaraŵalara ŵa mu Galileya. Apo ciphikiro cili mukati, Salome, mwana msungwana wa Herodiya uyo wakababirana na mfumu wake Filipu, wakutumika kukavinira ŵalendo. Madoda ghatoleka mtima comene na kaviniro kake.

Herode wakondwa comene na Salome. Wakuyowoya kuti: “Unilombe cilicose ico ukukhumba, ndipo nikupenge.” Wakucita na kulapa wuwo kuti: “Cilicose ico ungalomba kwa ine, nikupenge, mpaka hafu ya ufumu wane.”

Pambere wandazgore, Salome wakufuma kukafumba ŵanyina. Wakuti: “Kasi nkhalombe vici?”

Mpata wasangika sono! Herodiya wakuzgora kwambura kuziwulika kuti: “Mutu wa Yohane mbapatizi.”

Mwaluŵiro, Salome wakuweleraso kwa Herode na kumulomba kuti: “Nkhukhumba munipe sono nthena mutu wa Yohane Mbapatizi pa ngwembe.”

Herode citima camukora comene. Ndipouli, cifukwa cakuti ŵalendo ŵake ŵangupulika cilapo cake, wakutondeka kuti wamukanire, nangauli wakomenge munthu wambura mulandu. Nyengo yeneyiyo munthu wakutumika ku gadi kukacita ivyo waphalirika. Mwaluŵiro, munthu uyu wakuwerako na mutu wa Yohane pa ngwembe, ndipo wakuwupeleka kwa Salome. Ndipo Salome wakuwupeleka kwa nyina. Ŵasambiri ŵa Yohane ŵati ŵapulika ico cacitika, ŵakwiza na kuwuskamo citanda cake na kucisunga, ndipo ŵakuphalira Yesu nkhani iyi.

Kufuma apo, Herode wati wapulika kuti Yesu wakucizga ŵanthu na kufumya viŵanda, wakutenthema, pakopa kuti Yesu ni Yohane uyo wawuskika ku ŵakufwa. Ntheura wakukhumba comene kuwona Yesu, kuti wapulike ivyo wakupharazga yayi, kweni kuti wasimikizge usange ni Yohane nadi panji yayi. Mateyu 10:1-5; 11:1; 14:1-12; Mariko 6:14-29; Luka 9:7-9.

▪ Cifukwa wuli Yohane wali mu gadi, ndipo cifukwa wuli Herode wakukhumba yayi kuti wakomeke?

▪ Kasi Herodiya wasanga mpata wuli wakuti wakomere Yohane?

▪ Yohane wati wafwa, cifukwa wuli Herode wakukhumba kuwona Yesu?