Cipaturo 53

Muwusi Uyo Ŵanthu Ŵakukhumba

ŴANTHU ŵakuzukuma apo Yesu wakulyeska ŵanthu vikwi vinandi mwamunthondwe. Ŵakuti: “Nadi, uyu ni nchimi iyo kukayowoyeka kuti yizenge mu caru.” Ŵakughanaghana kuti Yesu wakwenera kuŵa nchimi yikuru kuluska Mozesi, kweniso wangaŵa muwusi muwemi comene. Ntheura ŵakughanaghana kumukora na kumuzgora themba.

Ndipouli, Yesu wakumanya ivyo ŵanthu ŵakughanaghana. Ntheura mwaluŵiro wakufumapo kopa kuti ŵangamucicizga. Wakuwezga mizinda na kuciska ŵasambiri ŵake kuti ŵakwere mu boti lawo ŵawelere ku Kaperenaumu. Kufuma apo, iyo wakukwelera mu lupiri kukalomba. Usiku uwu Yesu wali yekha mu lupiri.

Nyengo yicoko waka kucali kundace, Yesu wakulaŵiska kufuma mu lupiri ndipo wakuwona kuti nyanja yikuŵinduka cifukwa ca mphepo yankhongono. Na ungweru wa mwezi, pakuti Paska lili pafupi, Yesu wakuwona boti na ŵasambiri ŵake ŵakusuzgika kwenda cifukwa ca majigha. Ŵanalume aŵa ŵakuyezgayezga kuvuŵa na nkhongono zawo zose.

Wati wawona nthena, Yesu wakukhira mu lupiri na kwamba kwenda pa maji kulazga ku boti kujumpha majigha. Boti lili pa mtunda wa makilomita ghankhondi panji ghankhondi na limoza apo Yesu wakulisanga. Ndipouli, wakulutilira kwenda nga ni para wajumphilirenge. Ŵasambiri ŵati ŵamuwona, ŵakucemerezga kuti: “Ni mboniwoni kwali!”

Yesu wakuŵakhwimiska, wakuti: “Ndine; kopa cara.”

Kweni Petrosi wakuti: “Fumu, usange ndimwe, nilangurani kuti nize kwa imwe pa maji.”

Yesu wakuzgora kuti: “Zanga!”

Ntheura Petrosi wakufuma mu boti, wakwenda pa maji kulazga kwa Yesu. Kweni pakuwona cimphepo, Petrosi wakwamba kopa, ndipo apo wakwamba kubira, wakucemerezga kuti: “Fumu, niponoskani!”

Nyengo yeneyiyo, Yesu wakunyoloska woko lake na kumukora, wakuti: “Iwe wa cipulikano cicoko, cifukwa wuli wangukayika?”

Petrosi na Yesu ŵati ŵanjira mu boti, mphepo yikuleka, ndipo ŵasambiri ŵakuzukuma. Kweni kasi ŵakwenera kuzukuma? Ŵamanyenge “ng’anamuro la vingwa” pakukumbuka munthondwe ukuru uwo Yesu wangucita apo wangulyeska vikwi vya ŵanthu na vingwa vinkhondi pera na tusomba tuŵiri maora ghacoko waka agho ghajumpha, mphanyi ŵazukuma yayi kumuwona kuti wakwenda pa maji na kulekeska mphepo. Ndipouli, sono ŵasambiri ŵakumusindamira Yesu na kuyowoya kuti: “Ndimwe Mwana wa Ciuta nadi.”

Mu nyengo yicoko waka, ŵafika ku Genesarete, cidika cakutowa kufupi na Kaperenaumu. Ŵakukhwezga boti lawo kwenekura. Kweni apo ŵakufika pa mlima, ŵanthu ŵamumanya Yesu ndipo ŵakuluta mu caru cakufupi, kupenja awo mbalwari. Apo ŵalwari aŵa ŵakwiza nawo pa ŵakasalasala na kukhwaska waka mphonje za laya lakuwaro la Yesu, ŵakucilirathu.

Pa nyengo iyi, mzinda uwo ukaŵapo apo Yesu wakalyeska ŵanthu vikwi vinandi mwamunthondwe, ukusanga kuti Yesu wafumapo. Ntheura apo maboti ghakufuma ku Tiberiyo ghakufika, ŵakukwera ndipo ŵakuluta ku Kaperenaumu kukapenja Yesu. Ŵati ŵamusanga, ŵakufumba kuti: “Rabi, kasi mwiza pawuli kuno?” Yesu wakuŵacenya, nga umo tiwonerenge sonosono apa. Yohane 6:14-25; Mateyu 14:22-36; Mariko 6:45-56.

▪ Yesu wati walyeska ŵanthu vikwi vinandi mwamunthondwe, kasi iwo ŵakukhumba kucita nayo vici?

▪ Kasi Yesu wakuwona vici apo wali mu lupiri, ndipo wakucita vici?

▪ Cifukwa wuli ŵasambiri ŵakwenera kuzukuma yayi na vinthu ivi?

▪ Kasi nchivici cikucitika ŵati ŵafika pa mlima?